5, సెప్టెంబర్ 2012, బుధవారం

మన్మోహన మౌనాయుధం

మౌనాన్ని 
మేరే పాస్ గాడీ హై, బంగ్లా హై అంటూ ఇంకా ఏమేం హైలో అమితాబ్ వరుసగా చెప్పుకుంటూ పోతుంటే శశికపూర్ మెల్లగా మేరే పాస్ మా హై అంటాడు. దివార్‌లో ఈ డైలాగు హిందీ సినిమాలు ఉన్నంత కాలం గుర్తుండిపోతుంది.  ఇలానే పార్లమెంటులో బిజెపి వాళ్లు కాంగ్రెస్ కుంభకోణాల జాబితా చదువుతుంటే, తనతో తాను కూడా మాట్లాడుకోని మన్మోహన్‌సింగ్ ఏదో చెప్పడానికి సన్నద్ధం అవుతున్నారు. స్పీకర్ ఆప్ బైటియే ఆప్ బైటియే అంటూ తాను లేచి ఎంత మొత్తుకున్నా ఒక్కరూ కూర్చోలేదు. కానీ మన్మోహన్ సింగ్ లేవగానే అంతా బిత్తర పోయారు. ఆయుధం చేపట్టను అని మహాభారత యుద్ధం ప్రారంభ సమయంలోనే శ్రీకృష్ణుడు షరతు విధిస్తాడు. అలాంటి శ్రీకృష్ణుడికి సైతం యుద్ధంలో ఒకసారి కోపం వచ్చి తానే స్వయంగా యుద్ధం చేసేందుకు ముందుకు వస్తాడు. ఈ చర్యతో పాండవులు కౌరవులు బెంబేలెత్తిపోతారు . అలానే మన్మోహన్‌గారే స్వయంగా మాట్లాడేందుకు లేవడంతో ఇరుపక్షాలు బిత్తరపోయాయి. 

చాలా రోజుల నుంచి ఉపయోగించకపోవడం వల్ల పని చేస్తుందో లేదో అని మన్మోహన్‌సింగ్ గొంతు సవరించుకున్నారు. నీళ్లు తాగారు. చాలా కాలం ఉపయోగించని వాహనాలకు స్టార్టింగ్ ప్రాబ్లం ఉంటుంది. అలానే మన్మోహన్‌కు కొద్దిసేపటి తరువాత తన గొంతు తన అదుపులోకి వస్తున్నట్టు అనిపించింది. అటువైపు చూశాడు. సోనియాగాంధీ గుడ్లు ఉరుమి చూస్తున్నట్టు అనిపించిది. తన అనుమతి లేకుండా మన్మోహన్ ఏదో మాట్లాడేందుకు ప్రయత్నిస్తున్నాడని గ్రహించి, క్రమశిక్షణా రాహిత్యాన్ని సహించేది లేదని సోనియా ముఖ కవళికలతోనే ఆదేశాలను పంపించారు. 

నిశ్శబ్దంలో గట్టిగా మాట్లాడితే మన మాట మనకే ఎంతో మధురంగా వినిపిస్తుంది. ఆ విషయం సుష్మా స్వరాజ్‌కు బాగా తెలుసు ఆమె ఆ చాన్స్ వదలుకోదలుచుకోలేదు. హమారే పాస్ బోఫోర్స్‌కా రికార్డ్స్ హై, 2జికా రిపోర్ట్స్ హై... అబ్ బొగ్గు కుంభకోణంకా కాగ్ రిపోర్ట్ హై ఆప్‌కే పాస్ క్యా హై అంటూ సుష్మా స్వరాజ్ ఆవేశంగా ఫైళ్ల దొంతరను టేబుల్‌పై వేశారు. మన్మోహన్ గొంతు సవరించుకుని మేరే పాస్మౌన్ హై... వెయ్యి ప్రశ్నలకు సరితూగే సమాధానం మౌనమే అని ఆయన పంజాబిలో చదువుకున్న ఉర్దూ కవితను హీందీలో చెప్పి ఇక చెప్పడానికి ఇంతకు మించి ఏమీ లేదన్నట్టు కూర్చుండి పోయారు. సోనియా ముఖం సంతోషంతో విప్పారింది.  చదువుకునే పిల్లాడు బంధువుల ఇంటికి వెళ్లినప్పుడు వాళ్లింట్లో అనుమతి లేకుండా ఏ ఆటవస్తువును ముట్టుకోవద్దు, బుద్ధిగా కూర్చోవాలి అని తల్లి చెబితే, ఆ పిల్లాడు ఆ మాటను తూచా తప్పకుండా పాటిస్తే, ఆ తల్లి ఎంతగా సంతోషిస్తుందో సోనియా అంతగా సంతోషించారు. ఇంట్లో కార్టూన్ నెట్ వర్క్ చూస్తున్న కొడుకుతో బాబు నాకిష్టమైన కలవారి కోడలు సీరియస్ రెండువేల ఒకటో ఎపిసోడ్ చూడాలి అనగానే బుడిబుడి అడుగులతో రిమోట్ పట్టుకొచ్చి తల్లి వళ్లో వేస్తే ఆ తల్లి ఎంతగా సంతోషిస్తుందో మన్మోహన్‌ను చూసి సోనియా అంతగా సంతోషించింది. కలిసొచ్చే కాలానికి నడిచొచ్చే కొడుకు వస్తే తల్లిదండ్రులు ఎంతగా సంతోషిస్తారో, కలిసొచ్చే కాలానికి మౌనంగా ఉండే ప్రధాని లభించడం ఏ పార్టీ నాయకురాలికైనా సంతోషకరమే కదా! మీ వెయ్యి ప్రశ్నలకు నా ఒక్క మౌనమే సమాధానం అని ఆయన చెప్పగానే ముందు సోనియా ఆ తరువాత కాంగ్రెస్ సభ్యులు చప్పట్లు కొట్టి అభినందించారు.

బిజెపి సభ్యులు కోయ్‌లా గొటాలా హాయ్.. హాయ్ అని నినాదాలు చేస్తుంటే కాంగ్రెస్ సభ్యులు హమారే పాస్ మౌన్ హై మౌన్ హై అంటూ నినాదాలు చేయసాగారు. దేశం అట్టుడికిపోతుంటే ఈ బిజెపి వాళ్లేంది కోయిల ... కొయిలా అంటారు అని రాయపాటి పక్కనున్న గారపాటిని అడిగారు. వెనక వైపు నుంచి ఈ మాటలు విన్న మరో ఎంపి కోయ్‌లా అంటే కోయిలా కాదు బొగ్గు. వాళ్లు బొగ్గు కుంభకోణం గురించి నినాదాలు చేస్తున్నారు. అని నవ్వాడు. ఇదిగో మనకెందుకు మనమేమన్నా మాట్లాడితే మన కుంభకోణాలు బయటపెడతారు. అసలే అధికారంలో ఎవరున్నారో, ఎవరి కుంభకోణాలు ఎవరు భయటపెడుతున్నారో అర్ధం కాని పరిస్థితి అని తెలుగు ఎంపి ఒకరు చెప్పగానే అంతా మాట్లాడడం మానేశారు.

మొండివాడు రాజుకున్నా బలవంతుడట! మొండివాడి కన్నా మౌనంగా ఉండేవాడు మరింత శక్తివంతుడు. మౌనాన్ని నమ్ముకున్నవాడికి ఎలాంటి సమస్య ఉండదు. మహాభారత యుద్ధంలో ప్రతి వీరుడి వద్ద ఒక శక్తివంతమైన ఆయుధం ఉంటుంది. ఆ ఆయుధాన్ని ఒకసారి ప్రయోగిస్తే మరోసారి ప్రయోగించడానికి చాన్స్ ఉండదు. కానీ మౌనం మాత్రం ఎన్ని సార్లయినా ప్రయోగించడానికి అవకాశం ఉన్న శక్తివంతమైన ఆయుధం. నిండు సభలో ద్రౌపది వస్త్రాపహరణ జరుగుతుంటే భీష్ముడు మౌనంగానే ఉన్నాడు కానీ పల్లెత్తు మాట అనలేదు. ధర్మరాజు జూదంలో ముందు తాను ఓడిపోయి తరువాత నన్ను ఓడిపోయాడా? లేక నన్ను ఓడిపోయాక తాను ఓడిపోయాడా? కనీసం ఈ ప్రశ్నకన్నా సమాధానం చెప్పమని ద్రౌపది అడిగితే, భీష్ముడు మౌనంగానే ఉంటాడు. సమాధానం తెలియ కాదు. సమాధానం చెబితే బాస్‌కు కోపం వస్తుంది. ఆవెంటనే ఊస్టింగ్ లెటర్ వస్తుంది. కార్పొరేట్ కంపెనీ అయినా కౌరవ కొలువులోనైనా, రాజకీయ పదవిలోనైనా ఉద్యోగాన్ని నిలుపుకోవడానికి మౌనాన్ని మించిన లౌక్యం లేదు. తన వౌనాయుధంతో మన్మోహన్ ఇటు సొంత పక్షాన్ని సంతృప్తి పరుస్తున్నారు, అటు ప్రతిపక్షానికి చిక్కడం లేదు. మౌనాన్ని మించిన ఆయుధం లేదని నిరూపిస్తున్నారు.

2 కామెంట్‌లు:

  1. Excellent! Very well said.. "మొండివాడు రాజుకున్నా బలవంతుడట! మొండివాడి కన్నా మౌనంగా ఉండేవాడు మరింత శక్తివంతుడు." ...ఈ వాఖ్య నూటికి నూరు పాళ్ళు నిజం!

    రిప్లయితొలగించండి
  2. మౌనమే నీ భాష ఓ మూగ మనసా అంటూ చెవులకు చిల్లులు పడేటట్టు బిగ్గరగా పాడే గాయకోత్తములకు, హమారే పాస్ మౌన్ హై అంటూ దిక్కులు పెల్లటిల్లేలా నినాదాలు చేసే కాంగీయులకు అట్టే తేడా లేదు.

    Silence is louder than words, especially when you shout it out!

    రిప్లయితొలగించండి

మీ అభిప్రాయానికి స్వాగతం