28, జనవరి 2019, సోమవారం

రాజకీయ కామెడీ!

ప్రియాంక రాజకీయాల్లోకి వస్తున్నారట!’’
‘‘చిరంజీవి సినిమాల్లోకి వస్తారట అన్నట్టుగా ఉంది నీ మాట’’
‘‘చాల్లే జోకులు.. ఇప్పటి వరకు అప్పుడప్పుడు ప్రచారం చేసేవారు ఇకపై పూర్తి స్థాయిలో రాజకీయాల్లో ఉంటారన్నమాట’’
‘‘ఎన్నికలు వస్తున్నాయి కదా? ప్రియాంకనే కాదు పవన్ కూడా క్రియాశీలక రాజకీయాల్లోకి వచ్చేస్తాడు’’
‘‘నువ్వు ఏదీ సరిగా మాట్లాడవుకదా?’’
‘‘ఎంత శక్తివంతమైన ఆయుధమైనా సకాలంలో ఉపయోగిస్తేనే ఫలితం..’’
‘‘అంటే అరవై ఏళ్ల వయసు, పాతికేళ్ల కాంగ్రెస్ పాలనపై వ్యతిరేకత, విపరీతమైన సినీగ్లామర్ ఇంతకు మించి కలిసొచ్చే కాలం లేదని ఎన్టీఆర్ రాజకీయ రంగ ప్రవేశం చేశారు చూడు.. అదే సరైన సమయంలో సరైన నిర్ణయం తీసుకోవడం అంటే’’
‘‘సరైన సమయంలో సరైన నిర్ణయానికి ఎన్టీఆర్ పాజిటివ్ ఉదాహరణ ఐతే చిరంజీవి దీనికి సరిగ్గా వ్యతిరేక ఉదాహరణ’’
‘‘అంటే ప్రియాంక చిరంజీవిలా ఫైయిలవుతుందా?’’
‘‘ఇందిరాగాంధీ ఫీచర్స్ ఉండొచ్చు కానీ ఆమెలా విజయవంతమయ్యే పరిస్థితులు కనిపించడం లేదు..’’
‘‘అది నువ్వెలా నిర్ణయిస్తావు. నిర్ణయించాల్సింది ప్రజలు’’
‘‘కాదని ఎవరన్నారు? ప్రజలే నిర్ణేతలు. నేను నా అంచనా చెబుతున్నాను. శంకరాభరణం ఇప్పుడు తీస్తే హిట్టవుతుందా?’’
‘‘కాదు..’’
‘‘ఎందుకు కాదు అది అద్భుతమైన సినిమా కదా? పోనీ మిస్సమ్మ, గుండమ్మ కథ, మాయాబజార్ ఇప్పుడు తీస్తే హిట్టవుతాయా?’’
‘‘ఆ స్థాయిలో తీయలేరు’’
‘‘ఎందుకు తీయలేరు? అప్పుడు లేని టెక్నాలజీ ఇప్పుడు ఉంది. ఇంకా అద్భుతంగా తీయవచ్చు కదా?’’
‘‘నీతో వాదించలేను. ఆ కాలానికి శంకరాభరణం అవసరం కాబట్టి అది హిట్టయింది. టెక్నాలజీ పెరిగింది కానీ కాలం మారింది. ఈ కాలానికి మిస్సమ్మలు, గుండమ్మలు అవసరం లేదు. కొత్తనీరు వస్తున్న దశలో దాన్ని గుర్తించకుండా కాలం తీరిన తరువాత వాణిశ్రీ హీరోయిన్‌గా కాంతారావు సినిమా తీసి నిండా మునిగిపోయారు. 2004లో ఓ చానల్‌ను టాప్‌లో నిలిపిన తింగరి వేషాలిచ్చిన ఫార్ములాతో 2019లో మరో చానల్ వస్తే పట్టించుకున్నవాడే లేడు. అప్పుడు సక్సెస్ ఐన ఫార్ములా ఎల్లకాలం సక్సెస్ కావాలని లేదు. దేనికైనా కాలం ముఖ్యం.’’
‘‘అంటే ప్రియాంక రావడానికి ఇంకా కాలం రాలేదంటావా?’’
‘‘కాలం రాకపోవడం ఏంటి? ఎప్పుడో వచ్చి వెళ్లిపోయింది. ఒకటిన్నర దశాబ్దాల ఆలస్యం అయింది! దేశానికి అవసరమైన కాలానికి ఇందిర నాయకత్వం లభించింది. ఆమెను ప్రధాని పదవి వరించింది. ఎన్టీఆర్ అవసరం అయిన కాలానికి ఆయనను జనం ఆదరించారు. కాలం మారాక అదే ఎన్టీఆర్ తనను వెన్నుపోటు పొడిచారని నల్లదుస్తులు వేసుకుని ఎంత తిరిగినా స్పందన రాలేదు.’’
‘‘అమ్మ ప్రేమకు కాలం చెల్లడం ఉంటుందా?’’
‘‘అమ్మ ప్రేమ, సమాజమే దేవాలయం, ప్రేమికుల ప్రేమ సినిమా డైలాగులు కాదు.. రాజకీయాల గురించి చెబుతున్నా..’’
‘‘వచ్చే ఎన్నికల ఫలితాలు ఎలా ఉంటాయంటావు’’
‘‘ప్రజలు ఎవరికి ఓటు వేస్తే వారు గెలుస్తారు’’
‘‘అబ్బో.. ఇంతోటి గొప్ప విషయం మీరే చెప్పాలి! మాకు తెలియదు. ఆయనెవరో ఈవీఎంలను ట్యాంపర్ చేశారని విదేశాల్లో విలేఖరుల ముందు చెప్పాడు..’’
‘‘2004లో అధికారంలోకి వచ్చిన కొత్తలో వైఎస్‌పై కేఏ పాల్ ఆరోపణలు చేయడం సంచలనం సృష్టించింది. ఆయన మరింతగా రెచ్చిపోయి వైఎస్‌తో మొదలుపెట్టి సోనియా, అటు నుంచి అమెరికా అధ్యక్షుడు, ప్రపంచ నాయకులందరినీ తాను ఎలా నడుపుతున్నది చెప్పేసరికి వ్యవహారం సీరియస్ నుంచి కామెడీ సీరియల్‌గా మారిపోయింది. మొగలిరేకులు కన్నా కొంచం తక్కువ వయసు, జబర్దస్తీని కన్నా ఎక్కువ కాలం నుంచి సాగుతోంది ఈ కామెడీ సీరియల్. ’’
‘‘నిజమే జబర్దస్త్ ఓ ఎంటర్‌టైన్‌మెంట్ చానల్‌ను బతికిస్తుంటే, కేఏ పాల్ న్యూస్ చానళ్లను బతికిస్తున్నాడు.’’
‘‘పాల్‌కు, ఈవీఎంల ట్యాంపరింగ్‌కు సంబంధం ఏంటి?’’
‘‘ఈవీఎంల ట్యాంపరింగ్ తెలిసిందని 11 మందిని హైదరాబాద్‌లో ఎన్‌కౌంటర్ చేశారని, ఓ కేంద్రమంత్రిని రోడ్డుమీద చంపేశారని, ట్యాంపరింగ్ గురించి తెలిసిందనే జర్నలిస్టు గౌరీ లంకేశ్‌ను చంపేశారని చెబుతుంటే ఎందుకో పాల్ గుర్తుకొచ్చాడు..’’
‘‘నాకూ అలానే అనిపించింది. అద్వానీని పక్కన పెట్టడం, ఆంధ్రకు ప్రత్యేక హోదా ఇవ్వకపోవడం, జగన్‌పై కేసులు.. వీటన్నిటికీ ఈవీఎంల ట్యాంపరింగే కారణమని చెబుతాడేమో అనిపించింది ఆ జాబితా చూశాక’’
‘‘ఎంతవరకు మాట్లాడాలో అంతవరకే మాట్లాడాలి.. ఈ సంగతి తెలిస్తే ఎవరైనా మన్మోహన్ సింగ్ అవుతారు. తెలియకపోతే పాల్ అవుతారు. ’’
‘‘ఇన్ని చెబుతున్నావుకదా? ఎన్నికల ఫలితాలు ఎలా ఉంటాయో చెప్పు’’
‘‘ఆంధ్రలో ముఖ్యమంత్రిని అవుతానని పాల్ అంత ధీమాగా చెప్పిన తరువాత కూడా నీకు అనుమానంగా ఉందా?’’
‘‘నేను సీరియస్‌గా అడుగుతున్నా..?’’
‘‘నేనే కాదు, పాల్ కూడా సీరియస్‌గానే చెబుతున్నాడు. తనకు ఇష్టం లేదని, గత్యంతరం లేకనే ముఖ్యమంత్రి పదవి చేపట్టాల్సి వస్తుందని అంటున్నాడు..’’
‘‘ఔను.. ప్రపంచానికి నాయకత్వం వహించి 200 దేశాల నాయకులను తన చెప్పు చేతుల్లో ఉంచుకునే వాడికి ఒక రాష్ట్రానికే పరిమితం కావాలంటే ఇబ్బందే కదా?’’
‘‘పాల్ రెండు వందల దేశాలు అని చెప్పలేదు’’
‘‘ఏదో అభిమానంతో నేనో పది దేశాలు కలిపాను. ఏం నాకు ఆ మాత్రం స్వేచ్ఛ లేదా? పాల్ అంటే అభిమానం ఉంటే తప్పా?’’
‘‘సీరియస్‌గా అడిగితే జోక్ చేస్తావేం?’’
‘‘ప్రజలు ఎవరికి ఓటు వేస్తే వారు గెలుస్తారు అంటేనేమో అబ్బో ఈ మాత్రం మాకు తెలియదా? అంటావు. నేనే గెలుస్తానని పాల్ చెప్పిన సంగతి చెబితే సీరియస్‌గా చెప్పమంటావు?’’
‘‘నీకు రాజకీయాలంటే కామెడీగా కనిపిస్తున్నాయా?’’
‘‘కాదు.. బాధను కలిగిస్తున్నాయి. ప్రజలకు వినోదం, విజ్ఞానం పంచాల్సిన ఎంటర్‌టైన్‌మెంట్ చానళ్లు హత్యలు, నేరాలు చేయడం నేర్పించే శిక్షణ సంస్థలుగా మారితే, ప్రజల జీవితాలను శాసించే, ప్రభావం చూపే రాజకీయాలు కామెడీగా మారిపోవడానికి మించిన దురదృష్టం ఏముంటుంది?’’
*బుద్దామురళి ( జనాంతికం 25-1-2019)

2 కామెంట్‌లు:

  1. నాలుగేళ్ల బుడతడు పెద్ద కోటీశ్వరుడు కావడమే కాక ప్రభుత్వ ఖర్చుతో కట్టబడిన కాలనీకి తన పేరు పెట్టబడేంత గొప్పోడు కావడం మన అదృష్టం. ఆ బ్లడ్ వేరే ఆ బ్రీడ్ వేరే!

    రిప్లయితొలగించు

  2. అద్భుతః

    ***ప్రజలకు వినోదం, విజ్ఞానం పంచాల్సిన ఎంటర్‌టైన్‌మెంట్ చానళ్లు హత్యలు, నేరాలు చేయడం నేర్పించే శిక్షణ సంస్థలుగా మారితే, ప్రజల జీవితాలను శాసించే, ప్రభావం చూపే రాజకీయాలు కామెడీగా మారిపోవడానికి మించిన దురదృష్టం ఏముంటుంది?’’


    సూపర్ మాటన్నారు


    జిలేబి

    రిప్లయితొలగించు

మీ అభిప్రాయానికి స్వాగతం