16, నవంబర్ 2014, ఆదివారం

ఆ హీరోయిన్ టై మ్ మ్యాగజైన్ ముఖచిత్రంగా నిలిచింది - అనాధలా మరణించింది



మూడు రోజుల నుంచి ఆ శవం మంచంపై పడి ఉంది. తలుపులు విరగ్గొట్టి లోనికి వెళ్లి శవాన్ని చూసి దిగ్భ్రాంతి చెందారు. ముక్కు మూసుకున్నారు. అంబులెన్స్‌లో ఆస్పత్రికి తరలించారు. చాలా సేపటి వరకు ఆ శవాన్ని శుభ్రం చేసేందుకు ఎవరూ రాలేదు. మరణించి మూడు రోజులు కావడం వల్ల కుళ్లి పోయింది.
హే భగవాన్ ఆమెమీద ఎందుకంత కక్ష.. పగవానికి కూడా ఇలాంటి మరణం వద్దు అని వౌనంగా రోదించారు ఆ శవాన్ని చూసిన వారు...


***
భగవంతుడు ఉల్లాసంగా ఉన్నప్పుడు ఆమె కోసం ప్రత్యేంగా సమయం కేటాయించి పోత పోసినట్టున్నాడు. లేకపోతే ఆమె అంత అందంగా ఎలా ఉంటుంది. సృష్టి ధర్మం అని ఆమెను భూమిపైకి పంపించాడు కానీ ఏ మాత్రం అవకాశం ఉన్నా ఆమెను తన లోకంలోనే ఉంచుకునే వాడేమో ఆ దేవుడు. అందమే ఆమెలా ఉంటుంది అని చెప్పాల్సినంత అందం ఆమెది. కోట్లాది మంది అభిమానులే కాదు... సాటి మేటి నటులు సైతం ఆమె అందానికి ఫిదా అయ్యారు. ఇతర అందగత్తెలు ఆమె అందాన్ని చూసి ఈర్ష్య పడ్డారు. ప్రపంచ ప్రఖ్యాత 
టై మ్ మ్యాగజైన్ సైతం ఆమె అందానికి దాసోహం అంది. తన ముఖ చిత్రంగా మార్చుకుంది.
ఇంతకూ ఎవరామె?

అనాధలా మరణించింది, అందగత్తె ఇద్దరూ ఒకరే .. దాదాపు దశాబ్ద కాలం పాటు హిందీ సినిమా అప్సరసగా కోట్లాది మంది హృదయాలను కొల్లగొట్టిన పర్వీన్ బాబీ . బాలీవుడ్ తొలి మహిళా సూపర్ స్టార్, హిందీ సినిమాలకు ఫ్యాషన్‌ను నేర్పిన అందగత్తె అమె.
కోట్లాది మందికి నిద్ర లేకుండా చేసిన ఆ అందగత్తె శాశ్వత నిద్రలోకి జారుకున్న విషయం మూడు రోజుల తరువాత కానీ ప్రపంచానికి తెలియలేదు.
ఆమె అందంగా ఉండడానికి, దయనీయమైన మరణానికి దేవుడికి ఎలాంటి సంబంధం లేదు. మనిషి తన చేతులతో, తన చేతలతోనే తన జీవితాన్ని తీర్చిదిద్దుకుంటారు.

***
గుజరాత్‌లోని జునాఘడ్‌లో ముస్లిం కుటుంబంలో జన్మించిన పర్వీన్ బాబీ అహమ్మదాబాద్‌లోని స్కూల్‌లో చదువుకుంది. పదేళ్ల వయసులో ఉండగానే తండ్రి మరణించాడు. బహుశా ఆమె జీవితంలో ఈ ప్రభావం చాలా తీవ్రంగా ఉండి ఉంటుంది. తండ్రి ద్వారా పిల్లలకు ఆత్మవిశ్వాసం అలవడుతుంది. బాల్యంలోనే ఆ భరోసాను కోల్పోయిన పర్వీన్ బాబీ ప్రేమ కోసం పరితపించినట్టు ఆమె ప్రవర్తనను బట్టి అర్థమవుతుంది. అహ్మదాబాద్‌లో కాలేజీలో చదువుకుంటున్న సమయంలోనే సినిమాల్లో అవకాశాలు వచ్చాయి. 1972లో మోడల్‌గా గ్లామర్ ప్రపంచంలో అడుగుపెట్టిన ఆమెకు 73లోనే చరిత్ర అనే సినిమాలో హీరోయిన్‌గా నటించే అవకాశం లభించింది. సినిమా ఫ్లాప్, కానీ పర్వీన్ బాబి అందానికి హిందీ సినిమా రంగం ఫ్లాట్ అయింది. 74లో అమితాబ్‌తో కలిసి నటించిన బజ్‌బూర్ పెద్ద హిట్.. అవకాశాలు వెల్లువెత్తాయి. భారతీయ సినిమా హీరోయిన్ల ఇమేజ్‌ను మార్చేసిన నటిగా గుర్తింపు పొందింది. తన కాలంలో ఆమె ఎంత తీవ్రమైన ప్రభావం చూపిందంటే... 73లో సినిమా రంగంలోకి ప్రవేశిస్తే, 76జూలైలో ప్రపంచ ప్రఖ్యాత టైమ్స్ మ్యాగజైన్ ముఖ చిత్రంగా నిలిచింది. టైమ్స్ ముఖ చిత్రంగా వెలిగిపోయిన తొలి బాలీవుడ్ నటి. అమితాబ్‌తో కలిసి ఆమె ఎనిమిది సినిమాల్లో నటిస్తే, అవన్నీ సూపర్ హిట్టయ్యాయి. 1970-80ల కాలంలో టాప్ హీరోలైన అమితాబ్, శశికపూర్, ఫిరోజ్ ఖాన్, ధర్మేంద్ర, రాజేష్‌ఖన్నా, వినోద్ ఖన్నా, మనోజ్‌కుమార్, రిషికపూర్, మనోజ్ కుమార్‌లతో హీరోయిన్‌గా నటించింది. 75లో వచ్చిన దీవార్‌లో ఆమె అందం ఇప్పటికీ నిత్యనూతనంగా అభిమానులను అలరిస్తుంది. 77లో వచ్చిన అమర్ అక్బర్ అంథోనీ సినిమాల్లో అమితాబ్‌కు జంటగా నటించింది.

***
తండ్రి లేడు, బంధువులకూ పర్వీన్ బాబీకి సంబంధాలు లేవు. గ్లామర్ ప్రపంచంలో హీరోయిన్ గ్లామర్ ఆమెను ఆకాశానికి ఎత్తేస్తుంది. ఎంతో మంది చుట్టూ చేరేట్టు చేస్తూంది. అదే అందం ఆమెను అగాధంలోకి తోసేస్తుంది. సినిమా ప్రపంచం మాయ గురించి చెబుతూ ఓ సందర్భంలో తెలుగు నటి రమాప్రభ జీవిత అనుభవంతో ఓ మాట చెప్పారు. వయసు, డబ్బు ఈ రెండింటికే మగాడు ఆకర్షితుడవుతాడు. కానీ స్ర్తి ఆలోచనలు మాత్రం భిన్నంగా ఉంటాయంది. ఎంతో మంది సినిమా హీరోయిన్ల మాదిరిగానే పర్వీన్ బాబీ విషయంలో అదే జరిగింది. మంచి అందగత్తె... విపరీతంగా చదివే అలవాటుంది. ఆధునిక భావాలు. ప్రేమ కోసం తపిస్తోంది. ఇంత కన్నా ఇంకేం కావాలి. ఇదే సమయంలో సినిమాల్లో అవకాశాల కోసం చకోర పక్షిలా ఎదురు చూస్తున్న నేటి మేటి దర్శకుడు మహేశ్‌భట్ పర్వీన్ బాబీకి చేరువయ్యారు. ఆమె కోరుకున్నది, అతను కోరుకున్నది వేరు వేరు, కానీ ఇద్దరూ ఏకమయ్యారు. పర్వీన్ బాబీ తరుచూ మానసికంగా తీవ్రమైన సంఘర్షణలోకి లోనయ్యేది. పర్వీన్ బాగా చేరువైన తరువాత మహేశ్‌భట్ 82లో అర్త్ అనే సినిమాకు దర్శకత్వం వహించారు. కథ తానే రాశారు. ఇది పర్వీన్‌బాబీ, భట్‌ల ప్రేమ కథ అనే ప్రచారం ఉంది. ఈ సినిమా తరువాత పర్వీన్‌బాబి మానసికంగా తీవ్రంగా దెబ్బతిన్నారు.

ఎన్నో హిట్ చిత్రాల్లో నటించి టాప్ పొజిషన్‌లో ఉన్న సమయంలోనే పర్వీన్ ఎవరికీ చెప్పకుండా 83లో కనిపించకుండా పోయారు. ముంబై మాఫియా ఆమెను కిడ్నాప్ చేసిందని రకరకాల పుకార్లు వినిపించాయి. ప్రముఖ తత్వవేత్త యుజి కృష్ణమూర్తి, తన స్నేహితుడు వాలైంటెన్‌తో కలిసి ఆ సమయంలో ఆమె అనేక దేశాలు తిరిగింది. కాలిఫోర్నియాలో ఎక్కువ రోజులు ఉన్నారు.

నమ్మిన వ్యక్తులు మోసం చేయడం, ప్రేమించిన వారు అవమానించడం వంటి సంఘటనలు ఆమె మానసిక స్థితిపై తీవ్రంగా ప్రభావం చూపించాయి. చివరకు తానెవరో తనకే తెలియని స్థితికి చేరుకుంది. 84లో జాన్ ఎఫ్ కెన్నడి అంతర్జాతీయ విమానాశ్రయంలో తన ఐడెంటిటీ చెప్పలేక పిచ్చి పిచ్చిగా మాట్లాడుతున్న అమెను పోలీసులు అదుపులో తీసుకుని మరో 30 మంది పిచ్చివాళ్ల మధ్య ఉంచారు. విషయం తెలిసి యుజి కృష్ణమూర్తి తన పలుకుబడితో ఆమెను బయటకు తీసుకు వచ్చారు. కొంత కాలం తరువాత హఠాత్తుగా ముంబైలో ప్రత్యక్షమయ్యారు. అమితాబ్ మొదలుకుని అనేక మంది తనపై కుట్ర చేస్తున్నారని ఏమేమో మాట్లాడసాగింది. తన వారు అనేవారు ఎవరూ లేరు, ఒక్క మత్తు మందు తప్ప . ఆ మత్తులోనే అనంత లోకాలకు పయనమైంది.

పత్రికలు, పాల ప్యాకెట్లు మూడు రోజులైనా తీసుకోక పోవడంతో అనుమానం వచ్చి తలుపు బద్దలు కొడితే పర్వీన్ బాబీ శవం కనిపించింది. హిందీ చిత్ర సీమ మొత్తం తరలి వస్తుందేమో అనుకుని ఆస్పత్రికి వెళ్లాను కానీ ఏ ఒక్కరూ అక్కడ కనిపించలేదు అంటూ ఆనాటి సంఘటనను తలుచుకుంటూ ఓ హిందీ దర్శకుడు గద్గద స్వరంతో పలికాడు.
ఐశ్వర్యం అంటే బంగారం, డబ్బు , భూముల రూపం లోనే కాదు .. మానవ సంబంధాల రూపం లో కూడా ఉంటుంది అని మన పూర్వీకులు ఎప్పుడో గుర్తించారు .. అందుకే అష్ట 
ఐశ్వర్యా లలో కుటుంబం , సంతానం , బందు  గ నా న్ని కూడా చేర్చారు .. బలమైన కుటుంబం కూడా ఐశ్వర్యమే. మానసికంగా ఆందోళనలో ఉన్నప్పుడు   , ఏది మంచో ఏది చెడో  నిర్ణయించు కోలేనప్పుడు,  సరైన  నిర్ణయం తీసుకోవడానికి కుటుంబం అండగా నిలుస్తుంది . 

ఆమె సంపన్న కుటుంబం లో పుట్టింది కానీ సినిమాల్లోకి వచ్చాక ఆమెకు కుటుంబం తప్ప అన్నీ ఉన్నాయి .  గొప్ప అందగత్తె ఎంతో సంపాదించింది. కానీ కుటుంబ సంబంధాల విషయంలో నిరుపేదగానే మిగిలిపోయింది. మానసికమైన ఒత్తిడి ఏ వృత్తిలోని వారికైనా ఎంతో కొంత సహజమే. గ్లామర్ పోటీ ప్రపంచంలో అది మరీ ఎక్కువగా ఉండొచ్చు. తల్లితండ్రి, భార్యాభర్తలు, పిల్లలు, బంధువులు, మంచి మిత్రులు అనే బలమైన రక్షణ కవచం  ఉన్నప్పుడు ఇలాంటి ఒత్తిడి నుంచి ఉపశమనం లభిస్తుంది. లేకపోతే జీవితం పర్వీన్ బాబీలా విషాదంగా ముగుస్తుంది. సంపదను నిలబెట్టుకోవడమే కాదు బంధాలను కూడా నిలబెట్టుకున్నవారే ఐశ్యర్యవంతులు.

ఏప్రిల్ 4, 1949లో జన్మించిన పర్వీన్ బాబీ, జనవరి 20, 2005లో మరణించారు.

 ‘ఆమె రెండుసార్లు మరణించారు, మానసికంగా మొదటిసారి, శారీరకంగా రెండవ సారి మరణించింది’ అని మహేశ్‌భట్ ఆమె మరణించినప్పుడు కామెంట్ చేశారు. 

మానసికంగా మరణించిన పర్వీన్ బాబీలు నేటి మెటీరియలిస్టిక్ ప్రపంచంలో లెక్కలేనంత మంది ఉన్నారు. 
*  

11, నవంబర్ 2014, మంగళవారం

నాయకుల చివరి కోరిక!

చివరి కోరిక తీరకుండా పోతే ఆత్మలుగా మారి వెంటాడతారు అనేదో నమ్మకం. అందుకే ఎంతో ఘోరమైన నేరం చేసిన వాడికి ఉరిశిక్ష అమలు చేసేప్పుడు కూడా చివరి కోరిక అడుగుతారు. ఉరి నుంచి తప్పించుకోవాలనేది వాని చివరి కోరిక అయినా అది తీర్చరు కాబట్టి ఆ మాట చెప్పరు.


వెకటికో గజదొంగ రాజుగారి సైనికులకు చిక్కాడు. ఉరిశిక్ష అమలు చేసే సమయంలో చివరి కోరిక ఏమిటి?అని అడిగారు. అతనికి ఇంకా చాలా కాలం బతకాలని ఉంది, ఆ కోరిక తీర్చరు కదా! ఏమో ప్రయత్నిస్తే ఫలించవచ్చు అని మనసులోనే అనుకుని ఏమీ చెప్పకుండా నవ్వాడు. దొంగ తప్పించుకొని పోయినా రాజు సహిస్తాడే కానీ తన ముందు నవ్వడం అస్సలు సహించడు. రాజైనా, బాసైనా బానిసల నవ్వును అస్సలు సహించలేరు. ఎలాగూ ఉరిశిక్ష అనుభవించబోతున్న వాడికి నవ్వినందుకు అంతకన్నా మించి ఇంకేం శిక్ష విధిస్తారు. చాన్స్ లేదు కాబట్టి రాజే ఒక అడుగు కిందికి దిగి, కారణం అడుగుతాడు. గుర్రాన్ని ఎగిరించే విద్య తెలిసిన నా లాంటి వాడిని ఉరితీస్తున్న మూర్ఖులను చూసి నవ్వు ఆపుకోలేకపోయాను అని మళ్లీ నవ్వుతాడు. నీకా విద్య తెలిస్తే ఆరునెలల గడువు ఇస్తున్నాను, గుర్రాలను, వాటిని ఎగిరించేందుకు కావలసిన సౌకర్యాలను నీకు అందుబాటులో ఉంచుతాను, ఆరునెలల్లో గుర్రాలు ఎగరకపోతే నీ ప్రాణాలు ఎగిరిపోతాయంటాడు రాజు. 

ఆరునెలల తరువాత ఏమవుతుంది అని తోటి ఖైదీ ఆసక్తిగా అడిగితే, ఏమో ఎవడు చెప్పొచ్చాడు... ఏమైనా కావచ్చు, నాకు శిక్ష విధించిన రాజు యుద్ధంలో ఓడిపోవచ్చు, ఈ రాజ్యాన్ని ఎవరైనా ఆక్రమించుకోవచ్చు. రాణిగారే విషం పెట్టి రాజును చంపొచ్చు ... ఇవేవీ జరగకపోతే ఆరునెలల్లో ఏమో గుర్రం ఎగరావచ్చు.. కానీ ఆరునెలలైతే రాజభోగం అనుభవించవచ్చు కదా? ఇదే నా చివరి కోరిక అని మనసులోని మాట చెబుతాడు గజదొంగ.
గజదొంగకే ఇన్ని తెలివి తేటలు ఉండి ఆరునెలల్లో ఏమైనా జరగవచ్చు అనుకుంటే ఇంత కన్నా ఎన్నో తెలివి తేటలు ఉన్న రాజకీయ నాయకులు ఐదేళ్లలో ఏమైనా జరగవచ్చు అనుకోకుండా ఉంటారా? ఏమో గుర్రం ఎగరావచ్చు అని నాయకులు అనుకుంటే వింతేముంది. 


విదేశాల్లోని నల్లధనం తెచ్చేస్తామని హామీ ఇచ్చేస్తే, జనం నమ్మి అధికారం అప్పగించేస్తారు. మరి తెస్తారా? అంటే ఐదేళ్లయితే అధికారం ఉంటుంది కదా? ఐదేళ్లలో ఏమైనా జరగవచ్చు, ప్రజలు ఈ విషయం మరిచిపోవచ్చు, ఏమో గుర్రం ఎగిరినట్టు, గోడకు కొట్టిన బంతి తిరిగి వచ్చినట్టు నల్లధనం రావచ్చూ!


రాజకీయ నాయకుల మనసులో చివరి కోరిక ఏముంటుందో కానీ పైకి మాత్రం ఓట్లు రాల్చే కోరికలే చెబుతారు. పేదరికం లేని సమాజాన్ని చూడాలనేది నా చివరి కోరిక అంటాడో నాయకుడు. ప్రపంచంలో పేదరికం లేని దేశమే లేదు. ఒకవేళ భవిష్యత్తులో చంద్ర గ్రహమో, ఇంద్ర గ్రహమో ఏదో ఒక గ్రహం మీద మనుషుల ఉనికి తేలినా? లేక మనుషులే అక్కడికి పోయి నివసించడం మొదలు పెట్టినా వారితో పాటే పెదరికం అక్కడికి వెళ్లి తీరుతుంది. జీవ సంచారం ఉన్న ప్రతి చోట పేదరికం ఉంటుంది. జీవితాంతం అధికారంలో ఉండాలని, బతికి ఉన్నంత వరకు నన్ను గెలిపించండి అని ఇదే నా చివరి కోరిక అని పైకి చెబితే బాగోదు కానీ పేదరికం లేని సమాజ నిర్మాణమే నా చివరి కోరిక అంటే ఓట్లు రాలకుండా ఉంటాయా?
ముందుంది మంచి కాలం అని ముఖ్యమంత్రిగా ఉన్నప్పుడు కిరణ్ కుమార్‌రెడ్డి చెబితే పాపం ఆయన్ని ఎవరూ సరిగా అర్ధం చేసుకోలేదు. లాస్ట్‌బాల్‌తో తెలంగాణను అడ్డుకుంటానన్నారు కాబట్టి ముందున్నది సమైక్యాంధ్ర అనే ఉద్దేశంతో ఆయనా మాట అన్నారేమో అనుకొని తెలంగాణ వాళ్లు వ్యతిరేకించారు. చివరకు సొంత నియోజక వర్గం వాళ్లు కూడా ఆయన్ని పట్టించుకోలేదు. 


బహుశా ముందుంది మంచి కాలం అని ఆయన మాటల ఉద్దేశం తెలంగాణ వచ్చే రోజులు ముందున్నాయి అని చెప్పదలుచుకున్నారేమో? అని తెలంగాణ వాళ్లు ఇప్పుడనుకుంటున్నారేమో! అయ్యో ఆయన కాంగ్రెస్ వాళ్లను ఉద్దేశించి ఆ మాట అన్నారేమో అని అప్పుడనుకున్నాం, టిడిపికి మంచి కాలం ముందుందనే ఉద్దేశంతో ఆ నినాదం ఇచ్చినట్టు ఉందని ఆంధ్ర టిడిపి నాయకులు ఇప్పటికి గ్రహించి ఉంటారు. చివరకు కాంగ్రెస్ వాళ్లు కూడా ఆయన మాటలను సరిగా అర్ధం చేసుకోలేదు. తమకు మంచి కాలం ముందుందని ఆయన చెబుతున్నారేమో అనుకున్నారు కానీ తెలంగాణలో టిఆర్‌ఎస్‌కు ఆంధ్రలో టిడిపికి ముందుంది మంచి కాలం అని చెప్పడమే ఆయన ఉద్దేశం అని ఇప్పుడనుకుంటున్నారు. రాష్ట్ర రాజకీయాల్లో కిరణ్ కుమార్‌రెడ్డి అంత నిస్వార్థ నాయకుడు మరొకరు కనిపించరు. తనకు ముఖ్యమంత్రి పదవి ఇచ్చిన పార్టీని సర్వనాశనం చేసి తన గురించి కాక తమ వ్యతిరేక పార్టీల బాగు కోసం పని చేశారంటే ఆయనలో ఎంత నిస్వార్థపరుడైన నాయకుడుండాలి. ఇప్పుడు బిజెపిలో చేరేందుకు ఆయన ఉత్సాహం చూపిస్తున్నా, పొరుగు వారిని ప్రేమించమనే ఆయన సుగుణాన్ని చూసి వారూ భయపడుతున్నారేమో! ఏ విధంగానైతేనేం ఆయన నాయకత్వంలో కాంగ్రెస్ కొత్త రికార్డు సృష్టించింది. ఉమ్మడి మద్రాసు రాష్ట్రం నుంచి ఇప్పటి వరకు ఎవరికీ సాధ్యం కానీ రికార్డును ఆయన సృష్టించారు. బహుశా ఇదే ఆయన చివరి కోరిక కావచ్చు. ప్రస్తుత రాజకీయాల్లో ఆయన కోరికలు తీరే అవకాశాలు లేవు కాబట్టి ఇదే చివరి కోరిక అనుకోవాలి.
తన అవసరాలను మించి తన జీతం ఉండాలనేది సామాన్యుడి చిరకాల కోరిక, చివరి కోరిక. కానీ ఆ కోరిక ఎప్పటికీ తీరదు.


మన హీరోయిన్లు నిండుగా చీర కట్టుకుని నటిస్తే చూడాలనేది నా చివరి కోరిక అని ఓ సినిమా అభిమాని తీరని కోరికను బయటపెట్టాడు. అదేదో సినిమాలో జ్యోతిలక్ష్మి చీర కట్టింది చీరకే సిగ్గేసింది అని పాడినట్టు ఈ కోరిక గురించి తెలిస్తే హీరోయిన్లు సిగ్గుపడి పోరూ! మారుతున్న కాలంలో హీరోయిన్లు బట్టలను పూర్తిగా త్యజించే రోజులు వస్తాయేమో కానీ నిండుగా చీరకట్టుకుని నటించే రోజులు వస్తాయా? ఒకవైపు నడిరోడ్డు మీద ముద్దులు పెట్టుకోవడం మా జన్మహక్కు అని కొందరు ఉద్యమిస్తుంటే.. హీరోయిన్లు నిండుగా కనిపించాలని కోరుకోవడం ఎప్పటికీ తీరని కోరికే కాదు అత్యాశ కూడా.

 

9, నవంబర్ 2014, ఆదివారం

హాస్యనట చక్రవర్తి రాజబాబు జీవితం అలా రోడ్డున పడింది

తుపాను బాధితుల కోసం విరాళాలు అందజేసిన సందర్భంగా ఇందిరా గాంధీతో రాజబాబు



మానవత్వం మనిషి లక్షణం. అది లేకపోతే అసలు మనిషే కాదు. కానీ ఆ మానవత్వం మితిమీరితే మనిషి రోడ్డున పడతాడు. అచ్చం మన హీరో హాస్యనట చక్రవర్తి రాజబాబులా! !
***
ఒక సినిమాలో హీరోగా ఎన్టీఆర్ పారితోషికం 35వేల రూపాయలు. రాజబాబు పారితోషికం 20వేల రూపాయలుగా నిర్ణయించారు నిర్మాత. తనకూ 35వేల రూపాయలు కావలసిందే అని పట్టుపట్టాడు రాజబాబు. ఎన్టీఆర్ హీరో మీరు కమెడియన్ అని నిర్మాత నసిగితే.. ఐతే హీరోనే కమెడియన్‌గా చూపించి సినిమాను విడుదల చేయండి అని రాజబాబు సమాధానం చెప్పారు. ఈ విషయం ఓ సందర్భంలో రాజబాబు తమ్ముడు చిట్టిబాబు స్వయంగా చెప్పారు. జగపతి వారి అంతస్తులు సినిమాలో నటించినందుకు 13వందల రూపాయల పారితోషికం ఇచ్చారు. అదే రాజబాబు తొలిసారిగా తీసుకున్న పెద్ద మొత్తం. ఆ తరువాత హీరోలతో సమానంగా పారితోషికం తీసుకున్న సందర్భాలు చాలా ఉన్నాయి రాజబాబు సినీ జీవితంలో. గంటల చొప్పున నటించిన నటుడు. ఒక గంట ఎన్టీఆర్‌తో నటిస్తే, మరో గంట శోభన్‌బాబు సినిమాలో ఇతరుల సినిమాల్లో నటించిన రికార్డు రాజబాబుది.
డబ్బుకు, పరపతికి కొదవ లేదు. కుటుంబంతో గడపలేంత బిజీగా, తన గురించి తాను ఆలోచించుకోలేంత బిజీగా మారిపోయాడు.
ఒకప్పుడు మద్రాస్‌లో పంపునీళ్లు తాగి రోజులు వెళ్లదీసిన రాజబాబు కమెడియన్ గా హీరోను మించిన పాపులారిటీ సంపాదించారు, డబ్బు సంపాదించారు. ఆ రోజుల్లోనే రాజబాబు లక్షల్లో పారితోషికం తీసుకున్నారు. అగ్ర హీరోల పారితోషికం కూడా ఆ కాలంలో అంతే.
బహుశా వ్యక్తిగత జీవితంలో ఎన్నో ఎదురుదెబ్బలు తిన్నవారే హాస్యనటులుగా రాణిస్తారేమో! చార్లీ చాప్లిన్ మొదలుకొని రాజబాబు వరకు ఎంతో మంది హాస్యనటులు వ్యక్తిగత జీవితంలో ఎన్నో ఎదురు దెబ్బలు తిన్నారు. ఏమీ లేని కాలంలో ఎన్నో కష్టాలు అనుభవించిన రాజబాబు, ఎంతో ఉన్నత స్థితికి చేరుకున్న తరువాత కూడా కష్టాలు ఆయన్ని వీడలేదు. కష్టాలు తమ రూపాన్ని మార్చుకుని రాజబాబును వెంబడించాయి. తన పుట్టిన రోజు నాడు రాజబాబు ఒక తారను సత్కరించేవారు. బాలకృష్ణ (పాతాళభైరవి అంజిగాడు) తో ప్రారంభించారు. సావిత్రిని సత్కరించినప్పుడు ఆమె పరిస్థితి చూసి వేదికపైనే బోరున ఏడ్చేశారు. ఆరంభం నుంచి ముగింపు వరకు ఆయన జీవితం సమస్యల మయమే. కానీ తాను మాత్రం కోట్ల మంది ప్రేక్షకులకు చక్కని హాస్యం అందించారు, కడుపుబ్బా నవ్వించారు.


తుఫాను వస్తే జోలె పట్టి ప్రజల నుంచి విరాళాలు వసూలు నటులున్నారు. రాజకీయ ప్రవేశానికి వారికి ఆ జోలె ఉపయోగపడింది. రాజబాబు అలా కాదు.. ప్రకృతి వైపరీత్యాలు వచ్చినప్పుడు విరాళాలు సేకరించి అప్పటి ప్రధానమంత్రి ఇందిరాగాంధీకి అందజేశారు. రాజబాబు పేదలకు ఏకంగా ఒక కాలనీ కట్టి ఇచ్చారు. రాజమండ్రిలో పాకిపనివారి దుస్థితి చూసిన ఆయనలోని మనిషి కదిలిపోయి వారి కోసం ఏకంగా కాలనీ కట్టించారు. తెలుగునాట బహుశా ఏ మహానటుడు కూడా ఇలా చేసి ఉండరు. రాజమండ్రిలో ఏకంగా ఒక జూనియర్ కాలేజీని కూడా కట్టించారు.
1937 అక్టోబర్ 20న తూర్పు గోదావరి జిల్లాలో ఉమా మహేశ్వరరావు, రమణమ్మ దంపతులకు జన్మించిన రాజబాబు ఇంటర్ మీడియట్ చదివి, తెలుగు టీచర్‌గా ఉద్యోగంలో చేరారు. రాజబాబు అసలు పేరు పుణ్యమూర్తుల అప్పల రాజు. ఇంటి పేరును సార్థకం చేసే విధంగా ఆయన దాన ధర్మాలు చేశారు. దాని వల్ల వచ్చే జన్మకోసం ఆయన ఎంత పుణ్యం మూట కట్టుకున్నారో తెలియదు కానీ కష్టాల్లోనే కడతేరారు. ఎంతో మందికి సహాయం చేశారు. పేదలకు పెళ్లిళ్లు చేశారు. తాను ఆకలితో ఇబ్బంది పడినప్పుడు పట్టెడన్నం పెట్టి ఆదుకున్న అందరినీ గుర్తుంచుకొని వారికి సహాయం చేశారు. వేషాల కోసం మద్రాస్‌లో తిరుగుతున్నప్పుడు ఆకలి గుర్తించి అన్నం పెట్టిన రాజసులోచన తోటమాలిని సైతం ఎదిగిన తరువాత గుర్తుంచుకుని ఆదరించిన మానవత్వం ఆయనది. 20 ఏళ్ల కాలంలో 589 సినిమాల్లో నటించారు. వరుసగా 13 సార్లు ఫిల్మ్‌ఫేర్ అవార్డు పొందిన రికార్డు రాజబాబుదే.


సినిమాలో రాజబాబు ఉన్నాడా? లేడా? అని చూసి డిస్ట్రిబ్యూటర్లు సినిమా కొనే పరిస్థితి ఏర్పడింది. రాజబాబు ఉంటేనే సినిమాకు కాసులు రాలుతాయని వారు నమ్మారు. వారి నమ్మకం వమ్ము కాలేదు. ఎన్నో సినిమాలు రాజబాబు వల్ల విజయవంతం అయ్యాయి. నిర్మాతలు బాగుపడ్డారు. ముందు చూపు లేకపోవడంతో చివరకు తన వారికి కీర్తిని తప్ప ఏమీ మిగల్చకుండానే వెళ్లిపోయారు.
తాతా మనవడు, పిచ్చోడి పెళ్లి, తిరుపతి, మనిషి రోడ్డున పడ్డాడు, ఎవరికి వారే యమునా తీరే, తాతా మనవడు సినిమాల్లో హీరోగా నటించి, మెప్పించారు. నటనా ప్రతిభా ఉన్నా అవకాశాలు అంత ఈజీగా దొరకలేదు. దాంతో పొట్టపోసుకోవడానికి ట్యూషన్లను నమ్ముకున్నారు. అడ్డాల నారాయణరావు తీసిన సమాజం సినిమాలో హాస్యనటునిగా తొలి అవకాశం లభించింది. ఆ తరువాత అవకాశాల ప్రవాహం మొదలైంది.
హాస్యనటుడు అయినా రాజబాబు మాటల్లో తాత్విక ధోరణి ఎక్కువగా ఉండేదంటారు. రాజబాబు నుంచి ప్రజలు హాస్యాన్ని కోరుకుంటారు. కానీ రాజబాబు మాత్రం ప్రజలకు మంచి సందేశాన్ని ఇవ్వాలని ప్రయత్నించారు. మనిషి రోడ్డున పడ్డాడు వంటి సందేశాత్మక చిత్రాలు నిర్మించారు. సినిమా అద్భుతంగా ఉంది. మంచి సందేశం ఉంది కానీ ప్రేక్షకులకు నచ్చలేదు. ప్రేక్షకులు మెచ్చే దారిలోనే నిర్మాత వెళ్లాలి అనే సందేశం రాజబాబు లాంటి వారికి ఈ సినిమా ఇచ్చింది. కానీ ఈ అనుభవం రాజబాబుకు ఆర్థికంగా బాగానే భారం అయింది.
***
పనీ పనీ పనీ రాజబాబుకు తెలిసింది ఇదొక్కటే. భార్య పిల్లలను తీసుకొని పుట్టింటికి వెళ్లిపోయింది, ఆ ప్రభావం రాజబాబుపై బాగా పడింది అని ఆయనతో దాదాపు 250 సినిమాల్లో జంటగా నటించిన రమాప్రభ ఓ సందర్భంలో తెలిపారు. కుటుంబ కలహాలు సున్నిత మనస్కుడైన రాజబాబుపై తీవ్రమైన ప్రభావం చూపించాయి. రాజబాబు మద్యానికి బానిసయ్యారు. సినిమాలు లేక మద్యాన్ని నమ్ముకున్నాను అనేది రాజబాబు చెప్పిన మాట, మద్యానికి బానిస అయ్యారు కాబట్టి అవకాశాలు ఇవ్వలేదు అనేది సినిమా వారి మాట. ఎవరి మాటల్లో ఎంత నిజముందో కానీ రాజబాబు మాత్రం విషాదంగానే ముగిసిపోయింది. కేవలం 45 ఏళ్ల వయసు. సినిమా రంగంలో ఉన్న కొందరి వ్యసనాలు బయట పడతాయి, కొందరివి రహస్యంగా ఉండిపోతాయి. అంతే తేడా..
1960లో మద్రాసుకు వచ్చి సినిమా యాత్రను ప్రారంభించిన రాజబాబు దాదాపు 20 ఏళ్లపాటు సినిమా సామాజ్య్రంలో నట చక్రవర్తిగా జీవించి ఏమీ లేకుండానే ఖాళీ చేతులతోనే జీవితం ముగించారు. 1983 ఫిబ్రవరి 14న హైదరాబాద్‌లోని అస్పత్రిలో తుది శ్వాస విడిచారు. అంతకు ముందు రోజే మాట్లాడాలని ఉంది వస్తావా? అని రమాప్రభకు ఫోన్ చేశారు. అమె రాకముందే, చివరకు ఆ చిన్న కోరిక కూడా తీరకుండానే కన్ను మూశారు. రాజమండ్రిలో రాజబాబు విగ్రహాన్ని ఏర్పాటు చేశారు. ఏటా రాజబాబు కుటుంబం ఇక్కడకు వచ్చి రాజబాబు జయంతి, వర్థంతి నిర్వహిస్తుంది. జీవితాన్ని ఎక్కడ ప్రారంభించారో మళ్లీ అక్కడికే చేరుకున్నారు. మరణించే నాటికి రాజబాబు వయసు 45 సంవత్సరాలు. చివరి సినిమా గడసరి అత్త సొగసరి కోడలు. 1965లో లక్ష్మీ అమ్ములుతో రాజబాబు వివాహం జరిగింది. అమె మహాకవి శ్రీశ్రీ మరదలు. రాజబాబు సోదరులు చిట్టిబాబు, అనంత్ సినిమాల్లో నటిస్తున్నారు. రాజబాబు ఇద్దరు కుమారులు నాగేంద్ర బాబు, మహేశ్‌బాబు అమెరికాలో ఉన్నారు.
*

***
కష్టాలతో కాలం గడుపుతున్న రోజుల్లో  రాజబాబు తాను బాగా సంపాదించి కారు కొని  తన ప్రయోజకత్వాన్ని తల్లికి  చూపాలనుకొన్నారు .. రాజబాబుకు ఆ అవకాశం ఇవ్వకుండానే   తల్లి కన్ను మూశారు .. రాజబాబు కుమారులు ఎదిగి అమెరికాలో సొంత ఐ టి కంపెనీ నడుపుతున్నారు .. వారి ప్రయోజకత్వాన్ని చూడకుండానే పిన్న వయసులోనే రాజబాబు తనువు చాలించారు .  .   

4, నవంబర్ 2014, మంగళవారం

మోదీ మీద మీకు నమ్మకం లేదా?

ఇన్నాళ్లకు నా నోములు ఫలించాయి. మీమ్ములను ఇలా చూస్తుంటే నాకెంత సంతోషంగా ఉందో తెలుసా? అని శ్రీమతి ఏదేదో అంటుంటే శ్రీపతి అయోమయంగా చూస్తున్నాడు. ఇదే నండి నేను అన్ని దేవతలను కోరుకున్నది.. మీలో ఈ మార్పు కోసమే నేను ఉప వాసాలు ఉన్నాను. ప్రాంతాలకు, మతాలకు అతీతంగా అన్ని గుళ్లు, చర్చిలు, దర్గాలు తిరిగాను. సీమలోని తిరుపతికి వెళ్లాను, తెలంగాణలోని యాదగిరి గుట్టకెళ్లాను. ఉత్తరాంధ్రలోని సింహాచలం కోస్తాలో అన్నవరం వెళ్లాను. ఆ దేవుళ్లు నన్ను కరుణించారు. అంటూ శ్రీమతి చెప్పుకుంటూ పోతూనే ఉంటే శ్రీవారు అడ్డుకున్నారు. ఈరోజు మీరు ఎన్నయినా అనండి. నా దృష్టిలో ఈ రోజు మీరు మారిన మనిషి.. మనుషుల్లో దేవుడు అంటూ తనకు గుర్తున్న  దేవుడి సినిమా పేర్లన్నీ శ్రీమతి చదివేసింది.

ఏంటి ఈ రోజు ఇంకా మందు ముట్టుకోలేదని దేవుడంటున్నావా? ఏంటి? అలాంటి భ్రమలేమీ పెట్టుకోకు. మా లాంటి వాళ్లు మందు మానేస్తే ఆదాయాలు లేక ప్రభుత్వాలు పడిపోతాయి. ఉద్యోగులకు జీతాలు కూడా ఇవ్వలేరు. అన్న కాలంలో మద్యనిషేధ ఉద్యమం జరిపి, అన్న అధికారంలోకి రాగానే నిషేధం విధించి, అన్నను తప్పించి నిషేధం ఎత్తివేయించారు అల్లుడు గారు. అధికారం పోగానే దశలవారీగా మద్యనిషేధం అంటూ ఉద్యమాలు చేశారు. ఇప్పుడు మద్యం ఉత్పత్తిని పెంచాలని మందు చూపుతో నిర్ణయం తీసుకున్నారు. దీన్ని బట్టి నీకు ఏమర్ధం అయింది? అన్న, అల్లుడు, తమ్ముడు, మామ ఎవరు అధికారంలో ఉన్నా మందు ఆదాయం లేనిదే అలా ముందుకు వెళ్లలేరు. మందు లేనిదే ప్రభుత్వాలే నడవనప్పుడు నేను నడుస్తానని ఎలా అనుకున్నావు డియర్’’ అని శ్రీవారు మందంగా చెప్పుకొచ్చాడు.

అది కాదు ఇన్నాళ్లకు మీరు పిల్లల చదువుపై దృష్టి పెట్టారు నాకదే చాలు అని శ్రీమతి కళ్లు తుడుచుకుంది. ఇవి కన్నీళ్లు కాదండి ఆనంద భాష్పాలు అని రోటీన్ డైలాగు చెప్పకు నాకు చిరాకు అంటూ చిరాగ్గా పలికి పిచ్చి దానా నోట్ బుక్‌లో లెక్కలతో కుస్తీ పడుతుంటే అనవసరంగా ఏదేదో ఊహించుకుంటున్నావు.

కాగితాల్లో లెక్కలు, కంప్యూటర్‌లో అకౌంట్స్, పక్కన క్యాలుక్యులేటర్ ఇవన్నీ పిల్లల చదువు గురించి కాకుంటే మరెందుకండి... రాత్రంతా నిద్ర లేకుండా ఆ లెక్కలతో గడుపుతున్నారు. మీలో మీరే ఏదో లెక్కిస్తున్నారు. పిల్లల కోసం మీరింతగా మారిపోతారని కలలో కూడా అనుకోలేదు. ఇంజనీరింగ్ చదివే మన పెద్దది కూడా సరిగ్గా ఇలానే కూర్చుంటుంది. నాకు తెలియదనుకోకండి నేను మరీ అంత అమాయకురాలినేమీ కాదు అని శ్రీమతి చెప్పింది.
దాచెపల్లి బుక్ డిపోవారి లెక్కల పుస్తకాలన్నీ అక్కడ కుప్పగా పోసినట్టుగా ఉందా వాతావరణం. నోట్‌బుక్‌లో ఏవో అంకెలు కొట్టివేతలు, తీసివేతలు, భాగ హారాలు. శ్రీమతి ఎంత చెప్పినా వినేట్టు లేదని శ్రీవారు తన పనిలో తాను పడ్డాడు. కొట్టివేతలు, తీసివేతలతో బుర్ర వేడెక్కుతోంది.
లెక్క చిక్కిందనే ఉత్సాహంతో శ్రీవారు ఉందో లేదో స్వర్గం నా వాటా నాకిచ్చేసేయ్ అంటూ కూనిరాగం తీయసాగాడు. కథకు సంబంధం లేకుండానే తెలుగు సినిమాలో హాస్యనటులు ప్రత్యక్షం అయినట్టు శ్రీమతి వెంటనే అక్కడికి వాలిపోయింది. ఆ పాటను అలా పాడొద్దండి. అది నాకు చాలా ఇష్టమైన పాట. అలా ఖూనీ చేస్తే భరించలేను. నా వాటా నాకిచ్చేసేయ్ కాదు. నా బాల్యం నాకిచ్చేసేయ్ అనాలి. ఆ గాయకుడు గజల్ శ్రీనివాస్ నా చిన్నప్పటి నుంచి ఆ బాల్యం పాట మీదే బండి లాక్కొస్త్తున్నాడు. మీరేంటి ఇలా పాడుతున్నారు’’ అని శ్రీమతి కోపగించుకుంది.

ఇదిగో ఇందుకే నాకు చిరాకేస్తుంది. అసలు విషయం తెలియకుండా మధ్యలో మాట్లాడేస్తావు అని శ్రీవారు కోపగించుకున్నారు.
అది సర్లే కానీ నీకో శుభవార్తోయ్.. ఇంత కాలం ఏమీ సంపాదించలేదు. పిల్లల భవిష్యత్తు ఏమిటి? అంటూ ఓ తెగ ఇదయ్యావు కదా! ఇప్పుడే లెక్క తేలింది. చెబుతున్నాను విను అంటూ శ్రీవారు చెప్పబోతుంటే శ్రీమతి సెల్‌ఫోన్ రింగైంది. శ్రీమతి మాట్లాడుతూ అలాగా అంటూ ఎగిరి గంతేసింది. ఏమండోయ్ శుభవార్త. మా పిన్ని మూడవ మనవరాలికి పిల్లలు లేరంటే సంతాన లక్ష్మి వ్రతం చేయమని నేను చెప్పాను కదా? పూజలు ఫలించాయి లక్ష్మీదేవి లాంటి బిడ్డను కందట ఇప్పుడే ఫోన్ చేసింది అని శ్రీమతి సంతోషంగా చెప్పింది.
కలిసొచ్చే కాలానికి ఎవరో ఒకరు ఇలా అడ్డుతగులుతుంటారు అని చిరాకు పడ్డాడు.
అదేంటండి వారెవరికో అమ్మాయి పుడితే మనకు వచ్చిన నష్టం ఏమిటి? అని శ్రీమతి ఆశ్చర్యపోయింది.

‘‘ఎంతో కాలం నుంచి ఎదురు చూస్తున్న ఆస్తి చేతిలో పడే సమయానికి ఇలా కొత్త వారసులు పుట్టుకొస్తుంటే కోపం రాకుండా ఉంటుందా?’’ అని శ్రీవారు చిరాకుగా అన్నాడు.
శ్రీవారు చిరాకుగా ముఖం పెట్టి కాస్సేపు ఆగు అంటూ మళ్లీ లెక్కలు చేస్తూ ఆ ఇప్పుడు లెక్క తేలింది. మీ పిన్ని మనవరాలి సంతానానికి కూడా వాటా వేశాక తేలిన లెక్క ప్రకారం మనకు త్వరలోనే 20లక్షల 16వేల 222 రూపాయల 54 పైసల వాటా దక్కుతుంది. అని శ్రీవారు లెక్క తేల్చారు. ఇష్టం వచ్చినట్టు ఖర్చు చేసుకో, వడ్డాణం చేయించుకుంటావో, అపార్ట్‌మెంట్ కొంటావో, యాత్రలకు వెళ్లొస్తావో, పిల్లల పేర్లమీద ఫిక్స్‌డ్ డిపాజిట్ చేసుకుంటావో నీ ఇష్టం..’’ శ్రీవారు ఉదారంగా వరం ఇచ్చేశాడు.
వారసులు లేని బంధువులు ఎవరైనా పోయారా? ఆస్తి కలిసొచ్చిందా? అని శ్రీమతి ఆసక్తిగా అడిగింది.
సరే నా మాటల మీద నీకు నమ్మకం ఎప్పుడుంది కానీ నీకు నామీద నమ్మకం లేకపోయినా మోదీ మీద నమ్మకం ఉంది కదా?
‘‘మొన్న జన్‌ధన్ యోజన పేరుతో బ్యాంకు అకౌంట్ ఓపెన్ చేయించాడు గుర్తుందా? విదేశాల్లో లక్షల కోట్ల నల్లధనం ఉంది. ప్రధానమంత్రిని కాగానే అది తెప్పిస్తాను ఒక్కొక్కరికి ఎంతొస్తుందో లెక్కలు చెప్పాడు గుర్తుందా? ఆ డబ్బుకు వడ్డీ, ఆ తరువాత పుట్టిన పిల్లలు ఇవన్నీ లెక్కిస్తే మన వాటా తేలింది. రోజుకోసారి బ్యాంకుకు వెళ్లిరా ఏ రోజైనా మన అకౌంట్‌లో డబ్బు జమ అవుతుంది,’’అని శ్రీవారు శ్రీమతికి భరోసా ఇచ్చారు.
మీరు కూడా ఓ సారి బ్యాంకుకు వెళ్లి రండి...
ఏం మోదీ మీద  మీకు నమ్మకం లేదా?

2, నవంబర్ 2014, ఆదివారం

ఆ.. విషాద గీతం లానే ముగిసింది ఆ సంగీత దర్శకుని జీవితం





ఈ జీవన తరంగాలలో ఆ దేవుని చదరంగంలో
ఎవరికి ఎవరు సొంతము
ఎంత వరకీ బంధము
ఈ పాట ఆనాటి తరాన్ని తీవ్రంగా కదిలించింది. పాట వింటేనే మనసు భారంగా మారుతుంది. ఇక సినిమాలోని ఆ దృశ్యాలను చూస్తూ పాట వింటే మనుషులపై ప్రభావాన్ని ఊహించలేం. ఇంతగా కదిలించిన ఆ పాటలో సంగీతం గొప్పదా? సాహిత్యమా? గాయకుడి గాత్రమా? ఏది అంటే చెప్పలేం. మూడు కలిశాయి కాబట్టే ఆ పాట మనసున్న వారిని కదిలించింది.
సరిగ్గా నాలుగు దశాబ్దాల తరువాత తన జీవితం కూడా ఆ పాట చరణాల్లో చెప్పినట్టు విషాదంగా ముగుస్తుందని, ఆ పాటకు సంగీతం అందించిన జెవి రాఘవులు ఊహించి ఉండరు.  
ఎవరీ జెవి రాఘవులు అంటే?

***
‘‘బాగున్నారా? ’’
‘‘ఓ మీరా బాగున్నాం సార్...’’
‘‘నా పరిస్థితి బాగాలేదు. వైద్యం ఖర్చులు భరించలేకపోతున్నాను. ఏమైనా సహాయం చేస్తారా? ’’
‘‘సారీ సార్ మేమిప్పుడు సినిమాలకు ఫైనాన్స్ మాత్రమే చేస్తున్నాం, సహాయం చేయలేం’’
జెవి రాఘవులు ఫోన్ చేసినప్పుడు పలువురు దర్శక నిర్మాతలు చెప్పిన మాటలు ఇవి.
***
1973లో పుట్టిన ఆ పాట 2013లో జెవి రాఘవులు విషాద జీవితాన్ని తలపించేట్టుగా ఉంది.
పాటకు ఆయన సంగీతం ప్రాణం పోస్తుందని, తమ సినిమా హిట్టు కావడానికి దోహదం చేస్తుందనే నమ్మకంతో ప్రముఖ నిర్మాత, దర్శకులు రాఘవులు ఇంటి వద్ద వేచి చూసేవారు.
‘‘ఒకప్పుడు ఎంతో మంది ప్రముఖ నిర్మాతలు జెవి రాఘవులు కోసం నిరీక్షించారు, ఇప్పుడు ఆయన తనను ఆదుకోవడానికి దాతలు ఎవరైనా ముందుకు వస్తారేమోనని నిరీక్షిస్తున్నారు. ఆయన్ని ఆదుకోండి. వైద్య చికిత్స చేయించుకోలేని స్థితి, ఇల్లు గడవని పరిస్థితి దాతలు ఆదుకోండి ’’ రాజమండ్రిలో జెవి రాఘవులు అభిమానులు విలేఖరుల సమావేశంలో చెప్పిన మాటలివి. చివరి రోజుల్లో ఆయన పరిస్థితికి అద్దం పడుతున్నాయి ఈ మాటలు. అభిమానులు ఎందుకు చెప్పారు అంటే ఒకప్పుడు శ్రావ్యమైన సంగీతం వినిపించిన ఆయన అప్పుడు తన దుస్థితి కూడా తాను చెప్పుకోలేని స్థితిలో ఉన్నారు. పక్షవాతం వల్ల మాట్లాడలేని పరిస్థితి ఉండడంతో అభిమానులే ఆయన పక్కన ఉండగా, ఆయన దీన గాథను వివరించారు. ఎంత మంది ఆదుకున్నారు, ఎంత మంది స్పందించారో కానీ ఆయన మాత్రం ఏమీ లేకుండానే ఈ జీవన తరంగాలలో ఆ దేవుని చదరంగంలో ఎవరికి ఎవరు సొంతము అనే పాటలోని మాటలు అక్షర సత్యాలు అని నిరూపించి తన జీవితాన్ని ముగించారు.

82లో ఎన్టీఆర్ తెలుగుదేశం పార్టీని ఏర్పాటు చేశారు. ఆ సమయంలో వచ్చిన సూపర్ హిట్ సినిమా బొబ్బిలిపులి టిడిపి సూపర్ హిట్‌కు తన వంతు పాత్ర పోషించింది. జననీ జన్మభూమిశ్చ స్వర్గాదపీ గరీయసి పాట సినిమాకు కనక వర్షం, టిడిపికి ఓట్ల వర్షం కురిపించింది. ఆ పాటకు సంగీతం అందించిన జెవి రాఘవులు జీవితంలో చివరి రోజుల్లో మాత్రం కాసు లేకుండానే కన్ను మూశారు.
మనసు గతి ఇంతే, వీణనాది తీగనీది తీగ చాటు రాగముంది వంటి ఎన్నో సూపర్ హిట్ పాటలకు సంగీతం అందించారు. భగవద్గీతకు ఘంటసాలతో కలిసి పని చేశారు.

ఆకాశవాణి రికార్డింగ్ థియేటర్‌లో జెవి రాఘవులు పాడిన పాట విన్న ఘంటసాల అద్భుతంగా పాడావు, ఆసక్తి ఉంటే మద్రాసు వచ్చి కలవమని చిరునామా ఇచ్చారు. అప్పటి నుంచి ఘంటసాలతో రాఘవులు అనుబంధం కొనసాగింది. అనేక సినిమాలకు కలిసి పని చేశారు. నెలకు వంద రూపాయల జీతంతో ఘంటసాల వద్ద జీవితాన్ని ప్రారంభించిన రాఘవులు సినిమా రంగంలో ఎంతో ఉన్నత స్థాయికి వెళ్లారు.
సంగీత దర్శకుడిగా తొలి చిత్రానికి 15వేల రూపాయల పారితోషికం తీసుకున్నారు. బొబ్బిలి పులికి రెండు లక్షల పారితోషికం. అప్పట్లో అది చాలా ఎక్కువ మొత్తం.

సంగీతం రోగాలను నయం చేస్తుందని, శిశువులు, పశువులను సైతం గాన రసం మైమరిపిస్తుందని అంటారు. కోట్లాది మంది ప్రజలను తన సంగీతంతో మైమరిపించేట్టు చేసిన ఆయన మాత్రం ఆనారోగ్యంతో యుద్ధం చేయలేక ఓడిపోయారు. ఒకవైపు అనారోగ్యం, మరోవైపు ఆర్థిక సమస్యలు మద్రాసులోని భవనం అమ్మేశారు. ఆస్తులు కరిగిపోయాయి. చివరి దశలో రాజమండ్రిలో ఉన్న కుమారుడి వద్దకు వచ్చారు. తన కాళ్ల మీద తాను నిలబడలేని ఆయన నిస్సహాయ స్థితి చూసి అభిమానులు చలించి పోయారు.

1970లో వచ్చిన ద్రోహి సినిమా జెవి రాఘవులు సంగీత దర్శకత్వం వహించిన తొలి సినిమా. 2000లో వచ్చిన ఛలో అసెంబ్లీ చివరి సినిమా. ఆ తరువాత అనారోగ్యం ఆయన పాలిట శాపంగా మారింది. తెలుగు, తమిళం, మరాఠా, కన్నడ భాషల్లో 172 సినిమాలకు సంగీత దర్శకత్వం వహించారు. వంద వరకు సినిమా పాటలు పాడారు. లవకుశ సినిమాకు ఘంటసాల వద్ద సహాయకునిగా పని చేశారు.
జూబ్లీ హిల్స్ ఫిల్మ్ నగర్‌లో సినిమా వారి బంధువులకు కూడా ప్లాట్లు ఉంటాయి కానీ జెవి రాఘవులు, వేటూరి లాంటి వారికి ఎందుకు ఉండవు. ఇలాంటి వారు అద్దె ఇళ్లల్లో కాలం వెళ్లదీస్తారు ఎందుకు? అంటే సమాధానం అందరికీ తెలుసు కానీ ఎవరూ చెప్పరు.
ప్రముఖ సంగీత దర్శకులు ఇళయరాజా, ఏఆర్ రహమాన్, మణిశర్మ  లాంటి వారు ప్రారంభ రోజుల్లో రాఘవులు వద్ద పని చేశారు.

జెవి రాఘవులుగా పేరు పొందిన జెట్టి వీర రాఘవులు తూర్పు గోదావరి జిల్లా రామచంద్రాపురంలో మధ్య తరగతి రైతు కుటుంబంలో జన్మించారు. 1931 అక్టోబర్ 22న జన్మించారు. తల్లిదండ్రులు వీరా స్వామినాయుడు, ఆదిలక్ష్మి. తల్లిపాడే భక్తి పాటలు విని సంగీతంపై ఆసక్తి పెంచుకున్నాడు. చదువుకోవాలని ఉన్నా ఆర్థిక పరిస్థితి అంతంత మాత్రమే కావడంతో కాకినాడలోని పిఆర్ కాలేజీలో పియుసిలో చేరి నెల రోజులకే మానేశారు. తన జీవిత కాలమంతా సంగీత ప్రపంచంలోనే మునిగిపోయిన ఆయన తన జీవితం ముగింపు ఇలా ఉంటుందని ఊహించి ఉండరు. ఘంటసాలతో పరిచయం అయ్యాక సంగీతమే ప్రపంచంగా బతికారు. బాల్యంలో చదువుకోవాలని ఉన్నా ఆర్థిక పరిస్థితి వల్ల చదువుకోలేక పోయిన విషయం రాఘవులు మనసుపై బలంగా ప్రభావం చూపి ఉండాల్సింది. అలా ప్రభావం చూపి ఉంటే ఆర్థికంగా నిలదొక్కుకోవడానికి జీవిత చరమాంకం ప్రశాంతంగా గడిచిపోవడానికి అవసరం అయిన మెట్లు ముందు నుంచే నిర్మించుకుని ఉండేవారు. ఆలోచన రాలేదు. కాలం కలిసి రాలేదు. దాంతో సంపాదించిన కొద్దిపాటి ఆస్తిని కూడా ఆనారోగ్యం మింగేసింది.

బొబ్బిలి పులి సినిమా సమయంలో ఎన్టీఆర్ రాఘవులుతో ఎందుకైనా మంచిది హైదరాబాద్‌లో స్థలం తీసుకోండి అని సలహా ఇచ్చారు, సరిగమల గురించే నిరంతరం ఆలోచిస్తూ గడిపిన ఆయన స్థలం గురించి పట్టించుకోలేదు. ఆ సలహా వినక తాను తప్పు చేశానని, విని ఉంటే పరిస్థితి ఇప్పుడిలా ఉండేది కాదని ఓ సందర్భంలో ఆయన ఆవేదన వ్యక్తం చేశారు. మద్రాసులో మంచి కార్లలో తిరుగుతూ భారీ భవంతుల్లో నివసించిన ఆయన చివరి రోజులు రాజమండ్రిలో పేదరికంలో గడిచాయి.
తనలా కష్టపడవద్దని పిల్లలకు సంగీతం నేర్పించలేదు, సినిమాల్లో బిజీగా ఉండడంతో పిల్లల ఆలనా పాలన పట్టించుకోలేదు. దాంతో వారికి చదువు అబ్బలేదు. చిన్న కంపెనీలో చిరుద్యోగం చేస్తున్న మూడవ కుమారుడి ఇంట్లో చివరి రోజులు గడిచిపోయాయి.

సంగీత ప్రపంచంలో లీనమై పోయిన జెవి రాఘవులు తర తరాలు నిలిచిపోయే సంగీతాన్ని అందించారు. అద్బుతమైన పాటల సంపద తెలుగువారికి ఇచ్చారు. ఆరోగ్యాన్ని, కుటుంబాన్ని పట్టించుకోకుండా ఏమీ లేకుండా నిరాశతో జూన్ 7, 2013న చనిపోయారు.
* ధనం మూలం 17

27, అక్టోబర్ 2014, సోమవారం

సినిమా లకే కాదు రాజకీయాలకూ రీమేక్ లు

రీమేక్ అనే మాట సినిమా రంగంలో తరుచుగా వినిపిస్తుంటుంది. కానీ అన్ని రంగాల్లోనూ రీమేక్‌లు అప్పుడప్పుడు కనిపిస్తునే ఉంటాయి. రీమేక్‌లు ఎక్కడి నుంచి ప్రారంభం అయ్యాయి అని బాగా ఆలోచిస్తే రీమేక్ కింగ్, రీమేక్ సామ్రాట్ అనే బిరుదుకు అర్హత గల వారు విశ్వామిత్రుడు అని గట్టిగా నమ్మకం కలుగుతోంది. త్రిశంకును స్వర్గనికి పంపాలని విశ్వామిత్రుడు తెగ ప్రయత్నించినా సాధ్యం కాకపోవడంతో స్వర్గాన్ని రీ మేక్ చేసింది ఆయనే కదా? సరే త్రిశంకు అటు సర్గంలోకి ఇటు నరకంలోకి వెళ్లక మధ్యలో ఉండొచ్చు కానీ సృష్టికి ప్రతి సృష్టి చేయడం ద్వారా తొలి రీమేక్ సామ్రాట్‌గా విశ్వామిత్రుడు రికార్డు సృష్టించాడు. స్వర్గం ఉందో లేదో అనేది ఒక అనుమానం అయితే స్వర్గానికి రీమేక్ లాంటి త్రిశంకు స్వర్గం ఏమైందో ఎవరికి తెలుసు?


ఇక దేవుళ్లలోనూ ఈ రీమేక్ గోల ఉంది. అచ్చం శ్రీకృష్ణుడిలానే పౌండ్రుక వాసుదేవుడు పిల్లన గ్రోవితో ఉండేవాడు. నిజానికి సినిమాల్లో రీమేక్ అనే మాట ఇప్పుడేదో కొత్తగా వినిపిస్తున్నదేమీ కాదు. తెలుగు సినిమాకు పెద్ద బాలశిక్ష లాంటి మాయాబజార్ రీమేకే.. అంత కన్నా ముందు వచ్చిన శశిరేఖా పరిణయంను మాయాబజార్‌గా అద్భుత దృశ్యకావ్యంగా మలిచారు. ఎన్టీఆర్ పరమానందయ్య శిష్యుల కథ కన్నా ముందు కస్తూరి శివరావు అక్కినేని నాగేశ్వరరావుతో పరమానందయ్య శిష్యుల కథ తీశారు. కథలో మార్పులు చేర్పులు ఉండొచ్చు కానీ పరమానందయ్య, వాళ్ల శిష్యుల తీరులో మార్పు ఉండదు కదా?


అప్పట్లో చాలా పెద్దవాళ్లకు మాత్రమే చిన్ననాటి విషయాలు చెప్పే చాన్స్ ఉండేది. నా చిన్నప్పుడు అంటూ మహాత్మాగాంధీ లాంటి నాయకులకో, మహాకవుకో రాసుకునే చాన్స్ ఉండేది. ఫేస్‌బుక్ పుణ్యమా అంటూ అందరికీ చిన్ననాటి సంగతులు రాసుకునే గుర్తు చేసుకునే అవకాశం లభించింది. మనం చిన్ననాటి సంగతులు గుర్తు చేసుకున్నట్టే సినిమా పెద్దలకు వృత్తిలోకి వచ్చిన కొత్తలో తీసిన సినిమాలను గుర్తు చేసుకోవడం ఓ సరదా.. అలానే రామానాయుడు ఆ మధ్య రాముడు భీముడును రీ మేక్ చేయాలనుంది అని మాటవరుసకు ఎక్కడో అంటే ఏ పాత్రకు ఎవరు సరిపోతారు అంటూ మీడియాలో బోలెడు కథనాలు. గుండమ్మ కథపై కూడా ఇలానే పేజీలకు పేజీలు కథలోచ్చాయి. ఏ పాత్రకు ఎవరు సరిపోతారు అంటూ నటీనటులను ఎంపిక చేసేశారు. అన్ని పాత్రలకు అందరూ దొరుకుతున్నారు కానీ సూర్యకాంతం పాత్రకే ఎవరూ దొరకరు అని ఒకరు తేల్చేస్తే, అందరూ దొరక వచ్చు కానీ ఎస్‌వి రంగారావుకు సరిపోయే నటుడు ఎవరూ లేరని మరి కొందరు తేల్చేశారు. దీనిపై వాదోపవాదాలు బాగానే జరిగాయి కానీ ఆ సినిమా రీమేక్ చేయడానికి ఎవరూ ముందుకు రాలేదు. ఈ మధ్య అభిషేక్ బచ్చన్‌ను మీ నాన్న సినిమాల్లో దేన్ని రీమేక్ చేస్తే మీరు నటిస్తారు అని అడిగితే ఆయన నవ్వి ఏదీ రీమేక్ చేయవద్దని వేడుకున్నారు. ఆయనది సరైన నిర్ణయమే ఎందుకంటే రాంగోపాల్ వర్మ లాంటి వారే షోలేను ఆగ్ అంటూ రీ మేక్ చేసి ఇంత చెత్త సినిమా ఇంత వరకు రాలేదని తానే తిట్టుకున్నారు. 

చిరంజీవి కుమారుడు హిందీలో అడుగు పెట్టడానికి జంజీర్‌ను రీమేక్ చేస్తే, ఆ సినిమా కొట్టిన దెబ్బకు హిందీలోనే కాకుండా తెలుగులోనూ దెబ్బలు తగిలాయి. సూపర్ స్టార్ కృష్ణలాంటి వారు దేవదాసును రీమేక్ చేసి దెబ్బతిన్నారు. సినిమాలో కృష్ణ విజయనిర్మల నటన బాగున్నా, రీమేక్ కావడంతో అబ్బే అక్కినేనిలా నటించలేదు అని పెదవి విరిచారు. ఇలాంటి దాన్ని ముందే ఊహించి కృష్ణ సూపర్ హిట్ సినిమా అల్లూరి సీతారామరావు రీమేక్‌కు ఎన్టీఆర్ ససేమిరా అన్నారు.
ఈ మధ్య కూడా దేవదాసు, ప్రేమ్ నగర్ లాంటి సినిమాల రీమేక్ గురించి కొంత చర్చ జరిగినా, రీమేక్ చేస్తే ఏమవుతుందో తెలిసే వౌనంగా ఉండిపోయారు. నిజానికి అద్భుతమైన కళాఖండాలను కావాలంటే మళ్లీ మళ్లీ చూసుకోవచ్చు కానీ రీమేక్ చేసి చెడగొట్టడం ఎందుకు? ఈ ఆలోచనతోనే మాయాబజార్‌ను రీమేక్‌కు బదులు రంగుల్లోకి మార్చి ఊరుకున్నారు. విశ్వామిత్రుని నుంచి సినిమాల వరకు అన్ని చోట్ల రీమేక్ ఉన్నప్పుడు రాజకీయాల్లో ఎందుకుండదు?


82లో ఎన్టీఆర్ తెలుగుదేశంను ప్రారంభిస్తే, 2008లో చిరంజీవి ప్రజారాజ్యం పేరుతో దాన్ని రీమేక్ చేయాలని చూసి దెబ్బతిన్నారు. నిజానికి 82నాటి టిడిపిని 95లో ఎన్టీఆర్ రీమేక్ చేయాలని ప్రయత్నిస్తేనే సాధ్యం కాలేదు. అదేదో సినిమాలో కోట శ్రీనివాస్ మహాభారతంను తెలంగాణలో మాండలికంలో చెబుతూ సావిత్రమ్మ ఎస్‌వివోడు పిలిస్తేనే రాలేదు అంటూ ఏదో చెబుతాడు. అలానే ఎన్టీఆర్ పెట్టిన పార్టీని  ఆయనే మళ్లీ రీమేక్ చేయాలని చూస్తే సాధ్యం కానప్పుడు చిరంజీవికి సాధ్యం అవుతుందా? 82 నాటి టిడిపి కాపీ రైట్ హక్కులు అల్లుడు లాగేసుకోవడంతో దాన్ని ఎన్టీఆర్ టిడిపి అని రీమేక్ చేయాలని చూసి ఎన్టీఆర్ ఘోరంగా దెబ్బతిన్నారు.
77 అత్యవసర పరిస్థితి తరువాత పుట్టిన జనతా పార్టీ అధికారంలోకి వచ్చింది. ఆ పార్టీలో మేధావులు ఎక్కువ కావడం, అనుచరుల కన్నా మహామేధావులైనా నాయకులు ఎక్కువ కావడం వల్ల ఎక్కువ రోజులు నిలువలేకపోయింది. జనతాను రీమేక్ చేయాలని అప్పటి నుంచి చాలా ప్రయత్నాలు జరిగినా సాధ్యం కాలేదు. కానీ జనతా నుంచి తమ ముక్కను తాము తీసుకుని జనసంఘ్ బయటకు వెళ్లి బిజెపి పేరుతో జనసంఘ్‌ను రీమేక్ చేసి అధికారం చేపట్టారు. ఇప్పుడు ఒరిజినల్ కన్నా జనసంఘ్ రీమేక్ బిజెపి బలంగా ఉంది.


 ఏమవుతుందో తెలియదు కానీ గాంధీల శకం ముగిసినట్టేనని, మోదీ శాశ్వత ప్రధాని అని మీడియాలో ప్రచారం బాగానే జరుగుతోంది. తెలంగాణ ప్రజాసమితిని కొంచం అటూ ఇటూ మార్చి అదే లక్ష్యంతో తెలంగాణ రాష్టస్రమితిగా రీమేక్ చేసి కెసిఆర్ సక్సెస్ అయ్యారు. ఒకటి అర సందర్భాలు మినహాయిస్తే, తెలుగునాట రాజకీయాల్లో రీమేక్‌లు పెద్దగా సక్సెస్ అయిన సందర్భాలు లేవు. రాజకీయాల్లో వామపక్షాలు రీమేక్‌కు లొంగనివి. వాటికి రీమేక్ ఉండదు, ఒరిజినల్‌కు భవిష్యత్తు ఉండదు. 

26, అక్టోబర్ 2014, ఆదివారం

తెలుగులో తొలిసారిగా స్టార్ ఇమేజ్ పొందిన హాస్యనటి గిరిజ విషాద జీవితం-...ధనం -మూలం 16


పాతాళభైరవిలో ఎన్టీఆర్‌ను నరుడా ఏమీ నీ కోరిక అని అడిగేది ఎవరో గుర్తుందా? ఆమె గిరిజ. ఎన్టీఆర్‌ను ఏమీ నీ కోరిక అని దేవతగా అడిగిన గిరిజకు నిజజీవితంలో మాత్రం ఏ దేవుడు దయనీయమైన స్థితిలో ఉన్న ఆమె జీవితాన్ని కాపాడలేకపోయారు. దేవతా ఏమి నీ కోరికా అని అడగలేదు . 

సరదా సరదా సిగరెట్టు ఇది దొరల్ తాగు బల్ సిగరెట్టు అని రేలంగి పాడితే కంపు కొట్టు ఈ సిగరెట్టు కాల్చకోయి నాపై ఒట్టు అని గిరిజ ఒక్క ముక్కలో సిగరెట్టు బడాయిని తీసిపారేస్తుంది.


కాశీకి పోయాను రామా హరి గంగ తీర్థమ్ము తెచ్చాను రామా హరి అని రేలంగి అంటే కాశీకి పోలేదు రామా హరి ఊరి కాల్వలో నీళ్లండి... మురికి కాల్వలో నీళ్లండి రామా హరి అని గిరిజ రేలంగి కపట సన్యాసాన్ని బయటపెట్టేస్తుంది. ఈ పాటలు గుర్తున్నాయా?
ఆ పాటల్లోనే కాదు అన్ని సినిమాల్లోనూ ఆమెది సరదా పాత్రలే. సినిమాలో నవ్వించడమే కాదు. నిజ జీవితంలో సైతం ఎప్పుడూ నవ్వుతూనే ఉండేది. చిన్నా పెద్దా అందరినీ నవ్వుతూ పలకరించేది. రేలంగి, గిరిజ ఉన్నారంటే ఆ సినిమా గ్యారంటీ హిట్టు అనే గట్టి నమ్మకం ఉండేది ఆ రోజుల్లో.
సినిమాల్లో ఆమెది ఎంత సరదా పాత్రనో, సినిమా వైభవం ముగిశాక నిజ జీవితంలో అంత విషాద ముగింపు ఆమె కథ.

***
గిరిజ ఎవరో ఈ తరం వారికి తెలియక పోవచ్చు. తెలుగులో తొలిసారిగా స్టార్ ఇమేజ్ పొందిన హాస్యనటి. ఇప్పుడు మహేశ్‌బాబు, జూనియర్ ఎన్టీఆర్, ప్రభాస్, చరణ్ ఎంత గొప్ప హీరోలైనా కావచ్చు ఆ సినిమా హిట్టు కావాలంటే బ్రహ్మానందం ఉండాల్సిందే.. అలానే 50-60 ప్రాంతాల్లో సినిమా సూపర్ హిట్టు కావాలంటే రేలంగి, గిరిజ జంట ఉండాల్సింది. వీరుంటే సినిమా హిట్టు అని ఆ కాలం నాటి తెలుగు సినిమా సక్సెస్ ఫార్ములా . హాస్యనటిగా నటిస్తూనే ఎన్టీఆర్, ఎన్‌ఆర్ లాంటి అగ్రనటులతో హీరోయిన్‌గా నటించిన ఘనత ఆమెదే. గిరిజ తల్లి ప్రముఖ రంగస్థల నటి దాసరి తిలకం. ఆమె సినిమాల్లో కూడా నటించింది. 1946లో వచ్చిన వరూధినిలో ఆమెలో నటించారు. గిరిజ కుమార్తె శ్రీరంగ దాసరి నారాయణరావు నిర్మించిన మేఘసందేశంలో అక్కినేని నాగేశ్వరరావు కుమార్తెగా నటించింది. మూడు తరాల నట కుటుంబంగా తొలి ఘనత ఆమెదే. కానీ ఏం లాభం సినిమాల్లో సంపాదించిందంతా సినిమాలకు అర్పితం చేసి ఏమీ నిరుపేదగా జీవితాన్ని ముగించింది.

***
ఆనాటి సినీనటి గిరిజ జీవితంలో రీళ్లు చాలా వేగంగా కదిలిపోయాయి. మహారాణిలా జీవించిన గిరిజ సినిమా కథలానే ఊహించని మలుపులతో ఇల్లు గడవడం కోసం చేయి చాచాల్సిన స్థితిలో పడిపోయింది.
ఆమె ఎక్కువగా హాస్య ప్రధానమైన పాత్రల్లోనే నటించింది. కోట్లాది మందిని దశాబ్దాల పాటు నవ్వుల్లో ముంచెత్తింది. కష్టాలు మరిచిపోయి ఆ మూడు గంటల పాటైనా నవ్వుకునే అవకాశం ఆమె సినిమాల్లో దొరికేది. కానీ చివరకు ఆమె జీవితం మాత్రం విషాదంగా ముగిసిపోయింది.
***
‘‘మా కాలంలో తల్లిదండ్రులే అన్ని వ్యవహారాలు చూసుకునే వారు. ఇప్పుడున్నట్టుగానే భవిష్యత్తు ఉంటుందనే భరోసా లేదు, భవిష్యత్తు గురించి ఆలోచించాలి అనే ఆలోచనలు మాకు ఉండేవి కాదు అంతా తల్లిదండ్రులు చూసుకుంటున్నారు అనుకునే వాళ్లం. ఆమె ఎప్పుడూ నవ్వు ముఖంతో ఉండేది. గిరిజకు పెళ్లయిన తరువాత గిరిజ భర్త దర్శకత్వంలోనే ఆమె జీవితం సాగింది. మద్రాస్‌లో పెద్ద భవంతి కూడా ఉండేది. అంతా పోయింది. గిరిజ జీవితం ఇలా అయిపోయింది అని షూటింగ్‌లో ముచ్చట్లు వినిపించేవి.’’ అంటూ ఆమె సహనటి ఒకరు గిరిజ గురించి చెప్పారు.
గిరిజ 17 ఏళ్ల వయసులో ఉండగా, తల్లి మరణించింది. ఒక్క క్లిక్‌తో ప్రపంచంలోని సమాచారం మొత్తం కళ్ల ముందు కనిపించే ఈ కాలంలోనే ఐటి ఉద్యోగికి సైతం మనీ మేనేజ్‌మెంట్ గురించి తెలియదు. ఇక 17 ఏళ్ల వయసులో తల్లి మరణించింది. తళుకుబెళుకుల సినిమా ప్రపంచంలో రారాణిగా వెలిగిపోతున్న గిరిజకు మనీ మేనేజ్‌మెంట్ ఎలా తెలుస్తుంది. తెలియకపోవడమే ఆమె పాలిట శాపం అయింది.

తొలి కామెడీ స్టార్ కస్తూరి శివరావు 1950లో తానే దర్శకత్వం వహించి నిర్మాతగా పరమానందయ్య శిష్యుల కథ సినిమా తీశారు. అదే గిరిజకు తొలి సినిమా. అందులో అక్కినేని హీరో, గిరిజ హీరోయిన్. వైభోగాన్ని అనుభవించిన కస్తూరి శివరావు జీవిత చరమాంకంలో దుర్భర దారిద్య్రాన్ని అనుభవించారు. అందులో హీరోయిన్‌గా నటించిన గిరిజ జీవితం కూడా దాదాపు అలానే ముగిసింది. హాస్యనటి గానే కాకుండా అగ్ర నటులు ఎన్టీఆర్ మంచిమనసుకు మంచిరోజులు, ఏఎన్‌ఆర్‌తో వెలుగునీడలు, శివాజీ గణేశన్‌తో మనోహర, హరనాథ్‌తో మా ఇంటి మహాలక్ష్మి వంటి సినిమాల్లో హీరోయిన్‌గా నటించింది. ఆనాటి అగ్ర నటులతో పోటీపడి నటించడమే కాదు ఆమె సంపాదన కూడా అలానే ఉండేది.
సియస్‌రాజు అనే దర్శకుడ్ని ఆమె పెళ్లి చేసుకుంది.

పరిస్థితుల్లో క్రమంగా మార్పు... కొత్త వారు రంగ ప్రవేశం చేశారు. మార్పును గిరిజ కొంత వరకు అర్థం చేసుకుంది. కొత్త నీరు వచ్చింది తాను తప్పుకోవాలి లేదా తన వయసుకు తగ్గ పాత్రలు ఎంచుకోవాలని నిర్ణయించుకుంది. అంత వరకు బాగానే ఉంది కానీ భవిష్యత్తుపై దృష్టిపెట్టి రేపటి కోసం పెట్టుబడి అనే ఆలోచన చేయలేదు. అప్పటి వరకు సంపాదించిన ఆస్తిని వేగంగా కరిగిపోతుంటే చూస్తూ ఉండిపోయింది. మారిన పరిస్థితులను గ్రహించిన గిరిజ ఇక ఒక ఇంటి దాన్ని కావాలనుకుంది. కానీ భర్తను నిర్మాతగా నిలబెట్టాలని ప్రయత్నించి తాను రోడ్డున పడింది.

సి సన్యాసి రాజు గిరిజ భర్త. విజయగిరి ధ్వజాప్రొడక్షన్స్‌ను స్థాపించి 69లో ఎన్టీఆర్, కాంచన, అంజలితో భలే మాస్టారు సినిమా తీశారు. ఆ సినిమా అంతంత మాత్రంగానే నడిచింది. 1971లో ఎన్టీఆర్ చంద్రకళతో పవిత్ర హృదయాలు తీశారు. ఆ సినిమా అంతే. గిరిజ ఆస్తులు వేగంగా కరిగిపోవడం ప్రారంభమైంది. మద్రాస్‌లో ఆమెకు రెండంతస్థుల విశాలమైన భవనం ఉండేది. ఆమె భర్త నిర్మాతగా మారిన తరువాత ఆ భవనం చేజారిపోయింది. ఆమె అప్పుల్లో కూరుకు పోయింది. రేలంగి మరణించిన తరువాత ఆమెకు సినిమాల్లో అవకాశాలే కరువయ్యాయి.

1937లో పుట్టిన గిరిజ గుడివాడలో పెద్దమ్మ వద్ద ఉంటూ చదువుకునేది. 13 ఏళ్ల వయసులో మద్రాస్‌లో తల్లి వద్దకు వెళ్లింది. అందంగా ఉన్న ఆమె ఆ చిన్న వయసులోనే సినిమాల్లో నటించేందుకు ఆసక్తి చూపింది. కస్తూరి శివరావుకు ఫోటోలు చూపితే ఏకంగా పరమానందయ్య శిష్యుల కథలో రాజకుమారిగా అక్కినేని సరసన అవకాశం కల్పించారు. ఆ సినిమా అంతంత మాత్రంగానే నడిచినా రేలంగి పరిచయమయ్యారు. ఆయన ప్రయత్నంతోనే పాతాళభైరవిలో అవకాశం వచ్చింది. ఆ తరువాత వరుసగా అవకాశాలు వచ్చాయి. హీరో, హీరోయిన్‌లతో సమానంగా గుర్తింపు పొందారు.
అచ్చం సినిమా కథలా పెద్ద భవంతిని వదిలి చిన్న అద్దె గదిలోకి మారింది. పూట గడవడానికి కూడా తెలిసిన వారి ముందు చేయి చాచాల్సిన పరిస్థితి. ఆరోగ్యం పూర్తిగా క్షీణించింది. గిరిజ తారగా ఒక వెలుగు వెలిగే కాలంలో ఆమె వైపు చూసేందుకు కూడా సాహసించని అనారోగ్యం, పేదరికం, చివరి రోజుల్లో మాత్రం ఆమెను అంటిపెట్టుకొని ఉన్నాయి. తెలిసిన వారు కూడా గుర్తు పట్టలేని స్థితి. ఆ తరం నటీమణులు రాజశ్రీ, భీష్మ సుజాత వంటి వారు ఎంతో కొంత సహాయం చేసి ఆదుకున్నారని సినిమా వాళ్లు చెబుతారు.
గిరిజా ఏమీ నీ కోరిక అని చివరి దశలో ఆమెను తోటి నటులు అడిగి ఉంటే బాగుండేది. కనీసం ప్రశాంతంగా కన్ను మూసి ఉండేది.

డబ్బును మనం గౌరవిస్తే అణకువగా సేవకునిలా ఉంటుంది. నిర్లక్ష్యం చేస్తే ఎంత తీవ్ర స్థాయిలో ప్రతీకారం తీర్చుకుంటుందో కొందరు సినిమా వారి జీవితాలను చూసి నేర్చుకోవచ్చు. * 

21, అక్టోబర్ 2014, మంగళవారం

లైఫంతా పైసాతోనే ...

డ్రైవింగ్ లైసెన్స్ లేకుండా కారు రోడ్డెక్కిస్తే.. ట్రాఫిక్ కానిస్టేబుల్ చటుక్కున పట్టుకుని చలానా రాసేస్తాడు.
***
వెంట అమ్మాయి లేకుంటా పబ్బుకి అడుగుపెడితే.. బౌన్సర్ గుమ్మం నుంచే మెడపట్టుకుని బయటకు గెంటేస్తాడు..
***
ఐడి కార్డు లేకుంటే ఆఫీసుకి వెళ్తే.. సెక్యూరిటీ గార్డు గేటులోనే కాసేపు నిలబెడతాడు.
***
కింది క్లాసులో పరీక్ష తప్పితే..స్కూలు ప్రిన్సిపాల్ పై తరగతికి చచ్చినా అనుమతించడు..
***
ఇన్ని పనులకు ఇన్ని నిబంధనలు ఉన్నాయి. కానీ, ప్రతి పనికీ అవసరమయ్యే నిబంధన -డబ్బు. ప్రతి రోజూ ప్రతి క్షణం డబ్బుతో పనిలేని పని ఉండదు. కానీ ఆర్థిక అక్షరాస్యత లేకున్నా -జనం మాత్రం బతుకు బండి లాగించేస్తున్నారు. ఇక్కడ మనమూ ఓ నిబంధన పెట్టుకుంటే...?
==================
ఎలాగోలా బతికేద్దామని అనుకుంటే ఫరవాలేదు. కానీ ఆర్థికంగా ఎదగాలనే నిబంధన పెట్టుకుంటే మాత్రం ఆర్థిక వ్యవహారాలపై అవగాహన పెంచుకోవాల్సిందే. కొత్తగా కంప్యూటర్లు అందుబాటులోకి వచ్చిన కాలంలో -50ఏళ్ల పెద్దాయనకు  కూడా పాతికేళ్ల టీచరమ్మ పాఠం చెప్పేది. అక్కడ విద్య, కంప్యూటర్‌పై నైపుణ్యం అవసరం కనుక వయసుతో సంబంధం లేదు. కొత్త టెక్నాలజీకి అలవాటు పడకుంటే వెనకబడిపోతామన్న భయం ఉండేది కనుక -పాతికేళ్ల పిల్ల దగ్గర కూడా 50ఏళ్ల పెద్దలు  అవసరం కొద్దీ కంప్యూటర్ విద్యను ఔపోసన పట్టేవారు. ఆర్థిక అక్షరాస్యతా అలాంటిదే. వయసుతో సంబంధం లేదు. పుట్టిన దగ్గర్నుంచీ చచ్చేవరకూ -జీవితంలో ప్రతి దశా డబ్బుతోనే ముడిపడి ఉంది కనుక ఆర్థిక వ్యవహారాలపై అవగాహన పెంచుకోవడం అనివార్యం. అదులోనూ -యువతకు మరీ మఖ్యం.
**
దేశ జనాభాలో యువత శాతం 60కి పైనే. ప్రపంచంలో మరే దేశానికి ఇంత పెద్ద శక్తి లేదు. సమర్థంగా పని చేయగల వయసు, సంపాదనలో నాలుగు డబ్బులు వెనకేయాలన్న మనసు -ఈ దశలోనే పదిలపర్చుకోవాలి. అంటే -20 ఏళ్ల వయసునుంచే ఆర్థిక అంశాలపై అవగాహన పెంచుకోవాలంటున్నారు నిపుణులు. ఇప్పటికే 30వ పడిలోకి వచ్చేసివుంటే -ఆలోచించకుండా మొదలు పెట్టాలనీ సూచిస్తున్నారు. ఎందుకంటే ప్రముఖ కంపెనీల్లో ఉద్యోగాలు వెలగబెడుతూ లక్షలకు లక్షలు సంపాదిస్తున్న వాళ్లకు సైతం -ఆర్థిక అంశాలపై ఏమాత్రం అవగాహన ఉండటం లేదని లెక్కలేనన్ని సర్వేలు గగ్గోలు పెడుతున్నాయి కనుక.
***
కాలం మారింది. కనుక -రెండు పదుల వయసునుంచే సంపాదన మొదలు పెట్టేస్తోంది యువత. ఆర్థిక వ్యవహారాలపై దృష్టి సారించడానికీ ఇదే పదునైన టైం అన్నది నిపుణుల మాట. 20 ఏళ్ల వయసులో చేసే పొదుపు అత్యంత శక్తివంతమైంది. ఎందుకంటే ఈ వయసులో దాచింది.. మీకు 40ఏళ్లు వచ్చేసరికి పది రెట్లు విలువకు చేరి కూర్చుంటుంది. అంటే 20ల్లో వెయ్యి దాస్తే నలభైల్లోకి వచ్చేసరికి విలువ పదివేలు అవుతుందన్న మాట. 20ల్లో నెలకు వెయ్యి పొదుపు కష్టం కాదు. కానీ 40ల్లో నెలకు 10 వేలు తీసి పక్కన పెట్టాలంటే చుక్కలు కనిపించడం ఖాయం. ఎలా అన్నదానిపై ఓ ఆర్థిక నిపుణుడు చిన్న చిట్కా చెప్పాడు. 20 ఏళ్ల వయసులో నువ్వు పని చేస్తూ జీతం పొంది, అందులో వెయ్యి దాస్తే, ఆ పొదుపు చేసిన సొమ్ము కూడా నీకోసం పని చేయడం మొదలు పెడుతుంది. అంటే, డబుల్ ఇన్‌కం స్టాయికి చేరకుంటున్నావన్న మాట. రిటైర్మెంట్‌ను దృష్టిలో పెట్టుకుని 30 ఏళ్ల వయసునుంచైనా పొదుపు ప్రారంభిస్తే, అదే భవిష్యత్‌కు పెద్ద భరోసా అవుతుందని అంటున్నారు నిపుణులు. దీన్ని వ్యాపార కోణంలో కాకుండా, సామాన్యుడి జీవిత కోణం నుంచే చూడాలని కూడా సలహా ఇస్తున్నారు. సొంత ఇల్లు, పిల్లల చదువు, వారి భవిష్యత్, రిటైర్మెంట్ తరువాత ప్రశాంత జీవితం.. -వీటన్నింటికీ 20ల్లో ప్రారంభమయ్యే పొదుపే మూలం అంటే నమ్మగలమా? కానీ, నమ్మితీరాలి.
ఉన్నత విద్యావంతులైనా -కంప్యూటర్ పరిజ్ఞానం లేకుంటే ఆధునిక నిరక్షరాస్యులే అన్నట్టుగానే -ఇప్పుడు డబ్బు వ్యవహారాల్లో కనీస అవగాహన లేకుంటే ఆర్థిక నిరక్ష్యరాస్యుల కిందే లెక్క. సంపాదన ఎంత? ఖర్చు ఎంత? పొదుపు ఎంత? ఎక్కడ ఇనె్వస్ట్ చేయాలి? ఎలా ఇనె్వస్ట్ చేయాలి? ఇనె్వస్ట్ చేసిన మొత్తం ఎంతకు పెరగొచ్చు. దీనివల్ల అదనంగా వచ్చే ఫలం, ప్రతిఫలం ఏమిటి? ఇత్యాది కనీస లైఫ్ లెక్కలు నేర్చుకోవలసిన వయసు యువతది.
**
తప్పదు నేర్చుకోవాలి. పిఎఫ్, ఇపిఎఫ్, జిపిఎఫ్, ఆదాయం పన్ను శాఖ నుంచి వచ్చే రాయితీ? చట్టబద్ధంగా పన్ను రాయితీ కోసం ఎలాంటి పెట్టుబడులు ఎంపిక చేసుకోవాలి? మారుతున్న ఎంప్లాయిస్ పెన్షన్ స్కీమ్ వివరాలు? రిటైర్మెంట్ తరువాత చేతికివచ్చే పెన్షన్.. అప్పటికి అది సరిపోతుందా? లేకపోతే ఏం చేయాలి? వీటన్నింటిపైనా కనీస అవగాహన అవసరం. ఇన్‌స్టాల్‌మెంట్స్‌పై కారు కొనడం మంచిదేనా? వడ్డీ ఎంతవుతుంది? కారు అవసరమా? ఇలాంటివన్నీ ఎవరి పరిస్థితిని బట్టి వారే లెక్కలువేయాలి? గృహ రుణాలు, విద్యా రుణాలు, బీమావంటి వాటిపై అవగాహన ఉందా? క్రెడిట్ కార్డు వరమా? శాపమా? కార్డు ఉంటే జేబులో డబ్బులకట్టలు ఉన్నట్టేనా? తిరిగి కట్టాలనే ఆలోచన చేసిన తరువాతే క్రెడిట్ కార్డు ఉపయోగించాలనే విషయం మీకు తెలుసా? ఆన్‌లైన్‌లో ఐటి రిటర్న్స్ దాఖలు చేయడం వచ్చా? మీ క్రెడిట్ కార్డుపై వసూలు చేసే ఫీజుల గురించి మీకు తెలుసా? క్రెడిట్ కార్డును ఉపయోగించినప్పుడు సకాలంలో చెల్లిస్తే ఏమవుతుంది? చెల్లించక పోతే ఏంనష్టం? సిబిల్ క్రెడిట్ రిపోర్ట్ స్కోరింగ్ గురించి తెలుసా? మీ క్రెడిట్ రేటింగ్‌పై ప్రభావం చూపించే అంశాలపై మీకు అవగాహన ఉందా? జీవితం అంతా డబ్బు చూట్టే తిరుగుతుంది అనేది నిజం.
అలాంటప్పుడు డబ్బు వ్యవహారాలపై అవగాహనకు ఆలస్యం ఎందుకు? మీరు సంపాదించే డబ్బును ఖర్చు చేస్తున్నప్పుడు ప్రతి రూపాయి వ్యయం గురించి మీకు అవగాహన ఉండాలి. అది ఇప్పుడైనా మొదలుపెట్టండి.

19, అక్టోబర్ 2014, ఆదివారం

గుండెల్లో నిద్ర పోతా...!అను జర్నలిస్టో పాఖ్యానం

మీడియా వాళ్లు అంతా వచ్చారా? ’’ అని అప్పటికి మూడవ సారి అడిగారు పొన్నాల.
‘‘లేదు సార్’’ అని చెప్పగానే అలాగా అని పొన్నాల నిద్రలోకి జారుకున్నారు.
కెమెరా మెన్‌ల తొక్కిసలాట రిపోర్టర్ల హడావుడితో నిద్ర నుంచి మేల్కొన్న పొన్నాల ‘‘గుండెల్లో నిద్ర పోతా’’ అంటూ ఆవేశంగా పలికారు.
‘‘సార్ ఇంకా అందరూ రాలేదు. ముందు కెమెరాలను సెట్ చేయనివ్వండి. మీరిలా ఇష్టం వచ్చినప్పుడు అలా డైలాగు చెబితే ఎమోషన్ పోతుంది. మేం లేపుతాం కదా’’ అని భరోసా ఇవ్వడంతో పొన్నాల మళ్లీ నిద్రలోకి జారుకున్నారు.


ప్రెస్‌కాన్ఫరెన్స్ ఇంకా స్టార్ట్ కాకపోవడంతో అక్కడున్న కొందరు విలేఖరులు పొన్నాల చాంబర్‌లోకి వెళ్లారు. పొన్నాల వారిని చూడగానే లేచి ఏదో చెప్పి పక పకా నవ్వాడు. కొత్తగా వచ్చిన జర్నలిస్టు ఒకరు కంగారు పడి భయం భయంగా చూసి గది బయటకు వచ్చాడు.
హాలులో ఉన్న సీనియర్ ఒకరు అతని భుజంపై చేయి వేసి ‘‘్ఫల్డ్‌కు కొత్తనా?’’ అని ఆప్యాయంగా పలకరించాడు.


‘‘ఔను బాబాయ్ మా తాత కోరికపై వచ్చాను. మహాత్మాగాంధీ, జవహర్‌లాల్‌నెహ్రూలతో పాటు ఆనాటి ప్రముఖ స్వాతంత్య్ర సమర యోధులంతా జర్నలిస్టులుగానే స్వాతంత్య్ర పోరాటంలో పాల్గొన్నారని నన్ను ఎలాగైనా జర్నలిస్టును చేయాలని మా తాత పట్టుపట్టి పంపించాడు. ఇక్కడంతా గందరగోళంగా ఉంది. ఒక్కరూ నిజం చెప్పరు. నాయకులే కాదు మన కళ్లముందు జరిగిందాన్ని కూడా మనం ఉన్నది ఉన్నట్టు చెప్పడం లేదు. ఈ ఉద్యోగం నా వల్ల కాదు హాయిగా ఊరెళ్లి పొలం చేసుకుని బతుకుదామనుకుంటున్నాను’’ అని కుర్ర జర్నలిస్టు విరక్తిగా చెప్పుకొచ్చాడు.
బాబాయ్ సిగరెట్ వెలిగించి జ్ఞానబోధకు సిద్ధమవుతూ గట్టిగా పొగ పీల్చి నవ్వుతూ పక్కనే ప్రెస్ క్లబ్ ఉంటుంది అక్కడికి వెళ్లి మాట్లాడుకుందాం పదా అని తీసుకెళ్లాడు.


‘‘పొన్నాల జోకుకే నువ్విలా బెంబేలెత్తిపోతే ఎలా ? తానేదో జోకు చెప్పానని ఆయన ఉద్దేశం. మనకు వార్త కావాలంటే భలే జోకు చెప్పారు సార్ అంటూ మనం కూడా నవ్వాలి అలా నవ్వితేనే మనకు వార్తలు వస్తాయి. ఇలా భయపడితే నాయకుడు బెదిరిపోతాడు. చేపను పట్టేప్పుడు వల వేసేవాడికి ఎంత ఓపిక ఉండాలో ప్రెస్‌కాన్ఫరెన్స్‌కు వచ్చిన జర్నలిస్టుకు అంత ఓపిక ఉండాలి. నాయకుల నుంచి కూపీ లాగేందుకు అంతకన్నా మించి ఓపిక ఉండాలి’’ అని బాబాయ్ చెప్పుకొచ్చాడు. ఇలాంటి ఎన్నింటినో తట్టుకుంటే కానీ రంగంలో నిలువలేం.
ఇంకా చెబుతూ ‘‘చూడు బ్రదర్ పొన్నాలకే ఇలా బయపడితే కుందూరు జానారెడ్డి వస్తే ఏమవుతావు. ఏ డిక్షనరీలోనూ కనిపించని ఆయన తెలుగును విని తట్టుకుంటే కానీ ఈ యుద్ధ రంగంలో నిలువలేవు’’ అని బాబాయ్ అనునయించాడు.
‘‘బాబాయ్ ఆయన జోక్ చెప్పాడా? నామీద ఒట్టేసి చెప్పు ఆయన గట్టిగా నవ్వడం ఏదో అర్ధం కాని మాటలు మాట్లాడం తప్ప అందులో జోకేముంది బాబాయ్’’ అని జూనియర్ అమాయకంగా అడిగాడు.
‘‘పిచ్చివాడా! నీకు జోకులే కావాలంటే ఇలీబన్ బస్‌స్టేషన్‌కెళ్లి బుక్‌స్టాల్‌లో జోకుల బుక్ తీసుకో, పది రూపాయలకు వెయ్యి జోకులు దొరుకుతాయి. కానీ వార్తలు కావాలంటే నాయకులు జోక్ అని భ్రమించి ఏం చెప్పినా వారితో పాటు పక పక మని నవ్వాలి అప్పుడే వార్తలు దొరుకుతాయి’’అని బాబాయ్ వృత్తి రహస్యం విప్పి చెప్పాడు.


‘‘బాబాయ్ మీరు ఎంత చెప్పినా నాకు మాత్రం ఇక్కడ ఉండబుద్ధి కావడం లేదు. మా ఊరెళ్లి వ్యవసాయం చేసుకోవాలనిపిస్తోంది,’’ అన్నాడు.
‘‘ఇది పద్మవ్యూహం. లోపలకు రావడమే కానీ బయటకు వెళ్లడానికి దారి ఉండదు. విజయమో వీర స్వర్గమో ఇక్కడే తేల్చుకోవాలి. యుద్ధ రంగంలోకి ప్రవేశించేంత వరకే నీ ఇష్టా ఇష్టాలతో పని. ఒక్కసారి ప్రవేశించాక ఎవరో ఒకరితో యుద్ధం చేస్తూనే ఉండాలి. నీ దారిలో పొన్నాల జోకులు, జానారెడ్డి మాటలు నిన్ను కలవరపెట్టొచ్చు, రోజుకు ఆరుసార్లు గంటన్నర పాటు సాగే బాబు విలేఖరుల సమావేశాలు. ఆరునెలలైనా మీడియా ముందుకు రాని కెసిఆర్ చిన్నచూపు. అన్నింటినీ నువ్వు భరించి ముందుకు వెళ్లాలి. తారా చౌదరి నైతిక విలువల గురించి బోధించినా, స్టే తెచ్చుకున్న నేత అవినీతి రహిత సమాజం గురించి మాట్లాడినా, బెయిల్‌పై వచ్చిన నేత నిజాయితీ గురించి మాట్లాడినా చెవులతో వినాలి. 


వంద రోజుల్లో విదేశాల నుంచి నల్లధనం తెప్పిస్తామని మోదీ చెప్పినప్పుడు మౌనంగానే వినాలి, అధికారంలోకి వచ్చాక ఒప్పందాలు ఉన్నాయి నల్లధనం వివరాలు కోర్టుకు చెప్పం అని ఆదే మోదీ చెప్పినా  వినాలి. అదిగో అటు చూడు సోఫాపై అలా పడుకున్న ఆ వృద్ధ యోధున్ని  చూశావా?  అయన పక్కన పోర్క్ తో చికెన్ ను పొడుస్తున్నాడు చూడు  ఆ వృద్ధ యోధుడు   నీలానే ఏదో పొడిచేద్దామని వచ్చారు. కొంత కాలం నశాన్ని, తరువాత చుట్టలను, ఇప్పుడు సిగరెట్లను పీల్చేస్తూ చికెన్ మంచూరియాను పొడుస్తూ కాలం గడుపుతున్నారు. ఈ భవనంలో ఏదో ఓ మూల వాలిపోయే వృద్ధ భీష్ములు. అదిగో అటు చూడు పచ్చని భారీ కారులో వస్తున్న అతను ఒకప్పుడు నీలానే బెరుకు బెరుకుగా భాగ్యనగరంలో అడుగు పెట్టాడు. అలాంటి కార్లు అతనికి బోలెడున్నాయి. తిండికి ఠిఖాణా లేనివాళ్లు, కోట్లకు పడగెత్తిన వారు అంతా ఉన్నారిక్కడ. అటు చూడూ గడ్డం మధ్యలో ముఖం కనిపిస్తుందా? మాయల ఫకీరు ప్రాణం చిలుకలో ఉన్నట్టు తమ మేధాస్సు అంతా ఈ గడ్డంలోనే ఉందని నమ్మే వీళ్లో రకం. ఔట్ సోర్సింగ్ ద్వారా కొన్నిసార్లు బయటి నుంచి కొందరిని రప్పించుకుని మేధోప్రదర్శన చేస్తుంటారు ఇలాంటి జీవులు’’ అని బాబాయ్ సుదీర్ఘంగా వివరించాడు.
‘‘సరే బాబాయ్ టైం అవుతుంది వెళదామా?’’ అని అడిగాడు.
‘‘నువ్వు వెళ్లు’’ అని బాబాయ్ చెపితే, ‘‘నాకు దారి తెలియదు అక్కడిదాకా రావచ్చు కదా?’’ అని అడిగాడు.


‘‘చూశావా? ఈ క్లబ్బు నుంచి బయటకు వెళ్లే దారే నీకు తెలియదు. ఇక ఈ వృత్తి నుంచి బయటకు ఎలా వెళతావు అది చెప్పడానికే అలా అన్నాను .పద నేనూ వస్తాను,’’ అని జూనియర్ భుజంపై చేయి వేసి బాబాయ్ పొన్నాల దగ్గరకు వచ్చాడు.
నిద్రలేచి హాలులోకి వచ్చిన పొన్నాల ‘‘కెసిఆర్ గుండెల్లో నిద్ర పోతాను,’’ అంటూ ఆవేశంగా ఏదో చెప్పి తిరిగి నిద్ర పోవడానికి తన చాంబర్‌కు వెళ్లిపోయారు.

ఓ పొరపాటు ఆ హీరో జీవితాన్ని కాటేసింది

కొడితే ఏనుగు కుంభస్థలాన్నే  కొట్టాలంటారు. లక్ష్యం మంచిదే కానీ లక్ష్యాన్ని నిర్దేశించుకునేప్పుడు నీ శక్తిసామర్ధ్యాలను కూడా సరిగా అంచనా వేసుకోవాలి. లేకపోతే ఏనుగు కుంభస్థలాన్ని కొట్టాలని ప్రయత్నించిన వారే ఏనుగు చేతిలో కోలుకోలేని దెబ్బతినే ప్రమాదం ఉంది. అదే జరిగితే హీరో జీవితం కూడా తలక్రిందులవుతుంది. అచ్చం అలనాటి ఆంధ్రా కమల్ హాసన్‌లానే... నీడలేని ఆడది సూపర్ హిట్ సినిమాతో హీరోగా తెలుగు సినిమా రంగ ప్రవేశం చేసిన నరసింహరాజు చిన్న పొరపాటు వల్ల నీడలేని హీరోగా మారిపోయారు.

మీకు టీవి సీరియల్స్ చూసే అలవాటు ఉంటే నర్సింహరాజును చూడగానే గుర్తుపడతారు. వయసుకు మించిన వృద్ధుని పాత్రల్లో దర్శనమిస్తుంటారు. 60 ఏళ్ల వారు సినిమాల్లో హీరోలుగా పడుచు హీరోయిన్ల వెంట పడడం మామూలే. కానీ అదే సమయంలో నరసింహరాజు నాలుగు పదుల వయసులో ఏడుపదుల వయసుగల వృద్ధునిలా టీవీ సీరియల్స్‌లో నటిస్తూ గడిపారు.... గడుపుతున్నారు.

ఒకప్పుడు తెలుగు సినిమా రంగంలో జానపద హీరోగా ఒక వెలుగు వెలిగిన హీరో అతను అంటే నిజమా? అనే ప్రశ్న వస్తుంది.

***
పోలీసు వాడు కొట్టే గుమ్కి దెబ్బలు అస్సలు కనిపించవు. అనుభవించిన వాడికి నొప్పి ఉంటుంది కానీ దెబ్బలు కొట్టినట్టు ఆనవాలు ఉండదు. కొందరు కడుపు మీద కొట్టే దెబ్బలకు మహా మహా హీరోలు సైతం గింగిరాలు తిరిగి పడిపోవాల్సిందే. బతుకు తెరువు కోసం హీరో నుంచి క్యారక్టర్ ఆర్టిస్ట్‌గా పెద్ద తెర నుంచి బుల్లి తెరకు మారాల్సిందే. ఎన్టీరామారావు, కాంతారావుల తరువాత జానపద సినిమాల హీరోగా నరసింహరాజు తిరుగులేని విధంగా చెలరేగిపోయారు.

34 ఏళ్ల క్రితం వచ్చిన జగన్మోహిని సినిమా తెలుగు సినిమాల చరిత్రలో ఒక రికార్డు. ఆ సినిమా నర్సింహరాజు జీవితంలో మైలురాయి. ఒకటికాదు రెండు కాదు డజన్ల కొద్ది సినిమాల్లో హీరోగా నటించారు. బోలెడు సినిమాలు సూపర్ హిట్ అయ్యాయి. 70-80ల ప్రాంతంలో తిరుగులేని హీరోగా నిలిచారు.
ఏం జరిగిందో, ఎక్కడ తేడా వచ్చిందో కానీ నరసింహరాజు ఎన్టీఆర్‌ను తీవ్రంగా వ్యతిరేకించారు. 82లో ఎన్టీఆర్ తెలుగుదేశం పార్టీని ఏర్పాటు చేస్తే బహిరంగంగానే విమర్శించిన నరసింహరాజు తాను భారతదేశం పార్టీని ఏర్పాటు చేస్తున్నట్టు ప్రకటించారు. ఆ తరువాత ఏం జరిగిందో కానీ నరసింహరాజు భారతదేశం పార్టీని పెట్టలేదు, సినిమాల్లో కనిపించకుండా అదృశ్యం అయ్యారు.

హీరో ఒంటి చేత్తో విలన్లను చితగ్గొడతాడు సినిమాల్లో... సినిమా రంగంలో హీరో అయినా సరే తోక జాడిస్తే, ఎవరు కొట్టారో ఎందుకు కొట్టారో తెలియకుండా కడుపు మీద చావు దెబ్బలను కొడతారు. అలా తిన్న దెబ్బలు వారిని తిరిగి కోలుకోనివ్వకుండా చేస్తుంది.
సినిమాల్లో అవకాశాల మాట దేవుడెరుగు సినిమా జీవులందరూ ఆయనకు దూరమయ్యారు. నటించిన సినిమాలన్నీ సూపర్ హిట్టే అయనా ఆర్థికంగా పరిస్థితి అంతంతమాత్రమే.

జానపద బ్రహ్మ విఠలాచార్య సినిమాల్లో రాజకుమారుడు ఎలుకగానో, చిలుకగానో మారిపోతాడు. విఠలాచార్య జానపద సినిమాల ద్వారా హీరోగా ఎంతో ఎత్తుకు ఎదిగిన నరసింహరాజు ఏం జరుగుతుందో తెలుసుకునే లోపే సినిమాలకు దూరం కావలసి వచ్చింది. సినిమా అయితే చిలుక రూపంలో ఉన్న రాజకుమారుడు తిరిగి హీరోగా మారుతాడు. కానీ జీవితం కాబట్టి నరసింహరాజుకు శాప విమోచనం కలగలేదు. దాంతో బతుకు తెరువు కోసం టీవీ సీరియల్స్‌లో క్యారక్టర్ నటునిగా నటిస్తున్నారు.

నరసింహరాజును ఆంధ్రా కమల్‌హాసన్ అని పిలిచేవారు. నీడలేని ఆడది, తూర్పు పడమర, కన్యాకుమారి, ఇదెక్కడ న్యాయం, జగన్మోహిని సినిమాలు ఆ రోజుల్లో నరసింహరాజు హీరోగా నటించిన సూపర్ హిట్ సినిమాలు. 1974లో నీడలేని ఆడది సినిమాలో హీరోగా చిత్ర రంగ ప్రవేశం చేశారు. ఆ సినిమా సూపర్ హిట్ కావడంతో నరసింహరాజు హీరోగా నిలదొక్కుకున్నారు. వరుసగా అవకాశాలు వచ్చాయి. ఈ సినిమా ప్రభ, నరసింహరాజులకు మంచి గుర్తింపు తెచ్చింది. ఇక 78లో వచ్చిన జగన్మోహిని విజయం నరసింహరాజును ఎక్కడికో తీసుకు వెళుతుంది అనుకున్నారు. 1974 నుంచి 1980 వరకు నరసింహరాజు కాలం అని చెప్పవచ్చు. ఆరేళ్ల కాలంలో నరసింహరాజు హీరోగా నటించిన దాదాపు 20 సినిమాలు సూపర్ హిట్టయ్యాయి.

నీడలేని ఆడది(74) అత్తవారిల్లు, తూర్పు పడమర( 76) కన్యాకుమారి, రంభ ఊర్వశి మేనక, అమ్మాయిలూ జాగ్రత్త, ఇదెక్కడి న్యాయం (77) జగన్మోహిని, ప్రయాణంలో పదనిసలు (78) వంటి హిట్ సినిమాల్లో నటించారు. వందకు పైగా సినిమాల్లో నటించిన నరసింహారావు దాదాపు 30కి పైగా హిట్ సినిమాల్లో నటించారు.
మూడు పదుల వయసులో సూపర్ హిట్ చిత్రాల హీరోగా నిలిచిన నరసింహరాజుకు ఆవేశం తప్ప సినిమా రాజకీయాలు అర్థం కాలేదు. కొండను ఢీకొనాలనుకున్నాడు.

అంతే ఒక్కసారిగా అతని పరిస్థితి తలక్రిందులు అయింది. ఎవరు చేశారు, ఎందుకిలా జరిగింది అంటే ఎవరో ఒకరి పేరు చెప్పడానికి ఆధారాలు ఉండవు. నరసింహరాజు పరిస్థితి తలక్రిందులు అయింది అన్నది మాత్రం వాస్తవం. నరసింహరాజు ఆవేశం, ఆలోచనా లేకపోవడం వల్లనే ఈ పరిస్థితి తెచ్చిపెట్టుకున్నాడు అంటారు సినిమా రంగం గురించి తెలిసిన వారు. అప్పటి వరకు హీరోగా వెలుగొందుతున్న నరసింహరాజుకు ఒక్కసారిగా తలుపులు మూసుకు పోయాయి. ఏం చేయాలో దిక్కు తోచని పరిస్థితి. కొంత కాలం చీకటి లోనే గడిపారు .. 

మరి కొంత కాలం గడిచాక  టీవీలో సీరియల్స్ ప్రారంభమయ్యాయి. సినిమా రంగానికి సంబంధం లేని వారు టీవీ సీరియల్స్ తీశారు. దాంతో మరో దారి లేక నరసింహరాజు టీవీ సీరియల్స్‌ను నమ్ముకున్నారు. దూరదర్శన్‌తో పాటు ప్రైవేటు చానల్స్‌లోని సీరియల్స్‌లో వయసులో ఉండగానే వయసు మీరిన పాత్రల్లో కనిపించడం మొదలు పెట్టారు.

యుద్ధ రంగంలో ఉన్నంత నిజాయితీ, సినిమా యుద్ధంలో ఉండదు. ఎవరైనా కావచ్చు ఫలానా నటునికి అవకాశాలు ఇవ్వవద్దని ఎవరికీ ప్రత్యేకంగా చెప్పకపోవచ్చు. కానీ అతను కొండను ఢీ కొనేందుకు ఉత్సాహంగా ముందుకు వస్తే, ఎవరికి వారు దూరంగా వెళ్లిపోతారు అది ఏ రంగంలోనైనా సహజమే. దీనే్న నరసింహరాజు ఊహించలేకపోయారు. అతని వయసు అలాంటిది. నరసింహరాజు ఎదుగుతున్న సమయం ఎన్టీఆర్, ఎఎన్‌ఆర్ లాంటి వారు హీరో వేషాలకు దూరం అవుతున్న కాలం. 

దాన్ని ఆయన సరిగా అంచనా వేయగలిగి కొద్దిగా ఓపిక పట్టి ఉంటే నరసింహరాజు భవిష్యత్తు మరో రకంగా ఉండేది. ఒక స్టార్‌గా వెలిగిపోతూ ఉండే వారు. ఒక పొరపాటుకు యుగములు వగచేను అనే పాటలా నరసింహరాజు జీవితంలో సైతం ఒక పొరపాటు ఆయన జీవితాన్ని సంక్షోభంలోకి నెట్టింది. ఆవేశం కాదు ఆలోచన ముఖ్యం. ఎదుగుతున్న సమయంలో ముందుకే కాదు పక్కలకు కూడా చూసుకోవాలనే జీవిత పాఠాన్ని నేర్పిస్తుంది నరసింహరాజు జీవితం. 

ఆ దెబ్బతరువాత నరసింహరాజు ఎక్కడా వివాదాస్పదం కాదు కదా కనీసం పిచ్చాపాటి మాట్లాడినట్టుగా కూడా రిపోర్ట్ కాలేదు. సూపర్ హిట్ హీరో వేషాల నుంచి ఒక్కసారిగా టీవీ సీరియల్స్‌లో చిన్న పాత్రలు సైతం వేసేందుకు తనను తాను మానసికంగా సిద్ధం చేసుకున్న నరసింహరాజును అభినందించాలి. కానీ యుక్తవయసులో ఆయనకు జీవిత రహస్యాలను ఎవరైనా విప్పి చెప్పి ఉంటే ఆ హీరో పరిస్థితి మరోలా ఉండేది. 
*