16, డిసెంబర్ 2019, సోమవారం

గుజరాతీల విజయరహస్యం

విజయ సూత్రాలు ఎక్కడున్నా నేర్చుకోవాలి తప్పు లేదు. ప్రపంచంలో పలు యూనివర్సిటీలు వివిధ అంశాలపై అధ్యయనం చేస్తారు. ఆ అధ్యయన ఫలితాలపై అన్ని దేశాలు ఆసక్తి చూపిస్తాయి. అవి మనకు ఏమన్నా ఉపయోగపడతాయా? అని..
దేశాల్లోనే కాదు వివిధ రాష్ట్రాల్లో సక్సెస్ అయిన ఫార్ములాలను ఇతర ప్రాంతాల వారు కూడా అధ్యయనం చేస్తారు. ఎక్కడో బంగ్లాదేశ్ వంటి చిన్న దేశంలో చిన్నతరహా పొదుపుపై ప్రపంచానికి ఆదర్శంగా నిలిచింది. అభివృద్ధి చెందిన దేశాలు, పెద్ద దేశాలు కూడా ఈ మార్గాన్ని అనుసరించాయి.
గుజరాతీల విజయ రహస్యం మొత్తం ప్రపంచానికే ఆశ్చర్యం కలిగిస్తుంది. పరిశ్రమలు అనగానే గుర్తుకు వచ్చే పేరు గుజరాత్. గుజరాత్ సంస్కృతి అంటే అదేదో కేవలం పారిశ్రామిక వేత్తల సంస్కృతి అని భావించాల్సిన అవసరం లేదు. అది మొత్తం ఆ రాష్ట్ర ప్రజల సంస్కృతి.
రెండు తెలుగు రాష్ట్రాల్లో మనం ఎక్కువగా ఐటి ఉద్యోగాలపై దృష్టిసారిస్తాం. అదే కేరళ ప్రజలు గల్ఫ్ దేశాలకు వెళ్లడానికి ప్రాధాన్యత ఇస్తారు. అలానే ఒక్కో రాష్ట్రానికి ఒక్కో ప్రాధాన్యత ఉంటుంది. ఇరుగు పొరుగు రాష్ట్రాల్లో ఇలాంటి మంచి కనిపిస్తే అనుసరించాల్సిందే.
మనం ఉద్యోగం కోసం ఎదురు చూస్తుంటాం కానీ గుజరాతీలు మాత్రం ఉద్యోగాలపై పెద్దగా ఆసక్తి చూపరు. వ్యాపారం అనేది వారి సంస్కృతిలో భాగంగా ఉంటుంది. ఈరోజుల్లో ప్రభుత్వ ప్రైవేటు అనే తేడా లేదు. ఎక్కడా ఉద్యోగ భద్రత లేదు. మారుతున్న ఈ కాలంలో గుజరాతీల నుంచి మనం నేర్చుకోవలసింది ఎంతో ఉంది.
ఎదిగిన వారిని చూసినా, సంపన్నులను చూసినా సహజంగా మనలో కొంత అసూయ పుడుతుంది. వాళ్లేదో తప్పు చేశారు అన్నట్టుగా చూస్తాం. దేశంలో సంపన్నుల్లో గుజరాతీలే ముందు వరుసులో ఉన్నారు. ప్రముఖ పారిశ్రామిక వేత్తలంతా గుజరాతీలే. చివరకు అమెరికాలో 50శాతం మోటల్స్ గుజరాతీల చేతిలోనే ఉన్నాయి.
చివరకు అల్లకల్లోలంగా ఉన్న పాకిస్తాన్‌లో బడా పారిశ్రామిక వేత్తల్లో ఎక్కువ మంది దేశ విభజన సమయంలో ఇప్పటి గుజరాత్ ప్రాంతం నుంచి పాకిస్తాన్ వెళ్లి పరిశ్రమలు స్థాపించిన వారే.
కులం, మతం, జిల్లా అనే తేడా లేదు. గుజరాత్ ప్రాంతానికి చెందిన ప్రజల సహజ లక్షణం వ్యాపారం. ఉద్యోగం కోసం తంటాలు పడడం కాదు, ఉద్యోగాలు కల్పించడమే వారి లక్షణం. మోఘల్ పాలకులకు వడ్డీలకు డబ్బులు ఇచ్చిన వ్యాపారులు వీరే.
ఇటీవల కోరాలో జరిగిన ఒక చర్చలో గుజరాతీల్లో ఈ ప్రత్యేక లక్షణానికి కారణం ఏమిటి? అనే అంశంపై ఆరోగ్యకరమైన చర్చ జరిగింది. ఒక గుజరాతీ తమ రాష్ట్ర ప్రజల్లో కనిపించే సహజ లక్షణాలే తమను ఇతరుల కన్నా ప్రత్యేకంగా నిలబెడుతున్నట్టు చెప్పుకొచ్చారు.
* మేం 18 గంటల పాటు కష్టపడతాం .
* ఈ రోజు మేం ఏ స్థితిలో ఉన్నా ప్రతి రోజు ఇంత కన్నా మెరుగైన స్థితి కోసం ప్రతి రోజు ప్రయత్నిస్తాం.
* ఇతరుల విజయాన్ని చూసి కుళ్లు కోవడానికి మా శక్తిని అస్సలు ఖర్చు చేయం. పనికి మాలిన విషయాలపై దృష్టి పెట్టం. మా కున్న శక్తి సామర్థ్యాలను మేం ఎలా బాగుపడాలి అనే అంశంపై కేంద్రీకరిస్తాం.
* మా పొరుగు వారు బాగుపడితే మేం కుళ్లుకోం. బాగుపడిన వారి ఇంటి పక్కన ఉంటాం అని గర్వంగా చెప్పుకొంటాం.
* మమ్ములను ఎవరైనా మోసం చేస్తే, వారిపై ఎలా ప్రతీకారం తీర్చుకోవాలా అనే ఆలోచనలతో మునిగిపోం. పోతే పోయింది అని మళ్లీ బాగుపడేందుకు ప్రయత్నిస్తాం.
* రెండు చేతులా కష్టపడితే తిండికి సరిపోతుంది. కానీ సంపన్నుడు కావాలంటే కొందరికి పని కల్పించాలి అని భావిస్తాం.
* మద్యం వల్ల జీవితాలను నాశనం చేసుకోవడం గుజరాతీల్లో చాలా తక్కువ.
* శ్రీకృష్ణుడు గీతలో బోధించినట్టు ఖర్మను ఆచరించండి ఫలితాన్ని నాకు వదిలేయండి అనే మాటను నమ్ముతాం. కష్టపడి పని చేసినప్పుడు ఫలితం వచ్చితీరుతుంది అని నమ్ముతాం.
* ఎలాంటి ప్రతికూల పరిస్థితుల్లో కూడా ఆత్మవిశ్వాసం కోల్పోం. అంతా కోల్పోయినా జీరో నుంచి తిరిగి ప్రారంభించవచ్చు అని నమ్ముతాం.
* చాలా మందిలో డబ్బు పాపిష్టిది. డబ్బు తప్పు అనే భావన ఉంటుంది. చిన్నప్పటి నుంచే పిల్లలకు ఇదే చెబుతారు. ఇది మనసుపై తీవ్ర ప్రభావం చూపుతుంది. కానీ గుజరాతీలు మాత్రం ఇలా చెప్పరు. శక్తి మేరకు డబ్బు సంపాదించాలని చెబుతారు. ఏ పని చిన్నది కాదు పెద్దది కాదు అని చెబుతారు. వ్యాపారాన్ని గౌరవిస్తారు. డబ్బు గురించి, డబ్బున్న వారి గురించి అస్సలు వ్యతిరేకంగా మాట్లాడరు. డబ్బును దైవంగా భావిస్తారు. డబ్బును గౌరవిస్తారు. సంపాదించే వారిని గౌరవిస్తారు. డబ్బు సంపాదించడం అంటే అదేదో నేరం అన్నట్టుగా భావించే వారు చాలా మంది ఉన్నారు. కానీ గుజరాత్‌లో అలా ఉండదు. కాబట్టే వాళ్లు దేశంలో ఏ మూలకు వెళ్లినా వ్యాపారం చేయగలుగుతున్నారు. చదువు అంతగా లేకపోయినా వీరిలో వ్యాపార నైపుణ్యం అద్భుతంగా ఉంటుంది. తరగతి గదిలో చదువు కన్నా కుటుంబం నుంచే వీరికి వ్యాపారానికి సంబంధించిన శిక్షణ ఉంటుంది. వీరికి వ్యాపార నైపుణ్యం సహజంగా అబ్బుతుంది. ఉద్యోగంతో ఎన్నటికీ సంపన్నులం కాలేం, వ్యాపారంతోనే సంపన్నులం అవుతాం అని వీరు గట్టిగా నమ్ముతారు.
ఎంత చిన్న వ్యాపారం చేయడానికి కూడా వీరు వెనుకాడరు. అదే సమయంలో ఏది చేసినా పెద్ద ఎత్తున చేయాలని భావిస్తారు. ఆర్థిక సంక్షోభం, కంపెనీల ఢోలాయమానం, మూత పడుతున్న కంపెనీలు, ఉద్యోగాలు పోతున్న ఈ కాలంలో గుజరాతీల్లోని ఈ లక్షణాలపై యువత దృష్టిసారించాల్సిన అవసరం ఉంది. జీవితానికి ఉపయోగపడే మంచి ఎక్కడున్నా నేర్చుకోవాలి.
-బి. మురళి(15-12-2019)

వ్యాఖ్యలు లేవు:

వ్యాఖ్యను పోస్ట్ చెయ్యండి

మీ అభిప్రాయానికి స్వాగతం