ఔను.. బాబుకు రెండు కళ్లూ సమానం!.......కెసిఆర్ ‘దొరగారు’ మేల్కొనాలి!

అరవై మూడేళ్ల చంద్రబాబుకు ఇది నిజంగా కష్టకాలమే. బాబు రాజకీయ జీవితమంత వయసు కూడా లేని వైఎస్ జగన్ ఇప్పుడు ‘దేశం’ అధినాయకుడి రాజకీయ భవిష్యత్తునే ప్రశ్నార్థకంగా మార్చేశారు. ఇంత క్లిష్టమైన పరిస్థితిలోనూ చంద్రబాబుకు ఒక అనుకూలమైన అంశం ఉంది. టిడిపికి బాబే మైనస్, బాబే ప్లస్. ఆయన నాయకత్వానికి ఆ పార్టీ నుంచి సవాల్ ఎదురయ్యే ప్రసక్తే లేదు. ఎన్టీఆర్ కుమారులకు సినిమా గ్లామర్ ఉన్నా, పాపం.. వాళ్లు బావ చాటు బావమరుదులే.
19చోట్ల ఉప ఎన్నికలు జరిగితే ఒక్కటంటే ఒక్క చోట కూడా టిడిపి గెలవలేదు. ఒంటి చేత్తో యుద్ధం చేస్తూ ఓటమినే కవచకుండలాలుగా మార్చుకున్న బాబు రాబోయే మహాయుద్ధానికి వారసుడిని ఎంపిక చేసుకుంటారా? లేక తనలో శక్తి పోలేదు, చావో రేవో తానే తేల్చుకుంటానని అంటారా? వేచి చూడాలి. ‘టిడిపి నాతోనే పుట్టింది.. నాతోనే పోతుంది’-అని ఎన్టీఆర్ చెప్పేవారు. కానీ ఎన్టీఆర్‌కు అది సాధ్యం కాలేదు. కానీ బాబు సాధ్యం చేస్తాడేమో? అనే కలవరపాటు మాత్రం ఆ పార్టీ శ్రేణుల్లో మెల్లగా మొదలైంది.

‘రాష్ట్రంలోని అన్ని ప్రాంతాలూ టిడిపిని సమానంగా చూస్తున్నాయి. తెలంగాణ, సీమాంధ్ర నాకు రెండు కళ్లు’-అంటూ చంద్రబాబు చెబుతున్న మాటలను తాజా ఉపఎన్నికల్లో ప్రజలు నిజం చేశారు. గతంలో తెలంగాణలో జరిగిన ఉప ఎన్నికల్లో టిడిపి చావుదెబ్బతింది. నేడు సీమాంధ్ర ఉప ఎన్నికల్లో సైతం అదే పరిస్థితి ఎదురైంది. రెండు కళ్లతో రెండు వైపులా చూడడం సాధ్యం కాదు. ఒకవైపే చూడాలి. ఇది కళ్లకున్న విచిత్రమైన లక్షణం. రెండు ప్రాంతాల ప్రజలు టిడిపిని సమానంగానే చూస్తున్నారు. ఒక ప్రాంతంలో ఓడిపోయి, మరో ప్రాంతంలో విజయం సాధించి ఉంటే టిడిపి రెండు కళ్ల సిద్ధాంతంపై జనంలో అనుమానాలు రేకెత్తేవి. ఇప్పుడు ఆ అనుమానం నివృత్తి ఆయింది. టిడిపిని రెండు ప్రాంతాల్లోను ప్రజలు సమానంగానే తిరస్కరిస్తున్నారని ఉప ఎన్నికల ఫలితాలు రుజువు చేశాయి.
కాగా, ఉప ఎన్నికల ఫలితాలపై టిడిపి పెద్దగా షాక్ తినలేదు. ఎందుకంటే ఇలాంటి ఫలితాలకు ఆ పార్టీ నేతలు ఎప్పుడో అలవాటు పడిపోయారు. 2009లో ‘మహాకూటమి’ గెలుపు తథ్యమన్న ప్రచారం జోరుగా సాగినా, అది రెండో ఓటమి కాబట్టి టిడిపి వారు పెద్దగా షాక్ తినలేదు. ఈ మధ్య తెలంగాణలో జరిగిన ఉప ఎన్నికల్లో డిపాజిట్లు సైతం గల్లంతు కావడం వల్ల ఇప్పుడొచ్చిన ఫలితాలకు టిడిపి పెద్దగా దిగులుపడాల్సిందేమీ లేదు.
కేవలం మీడియా ప్రచారంపై ఆధారపడి రాజకీయాలు చేస్తున్న టిడిపిని ఉప ఎన్నికలు చావు దెబ్బతీస్తున్నాయి. చంద్రబాబు తాజా ఉప ఎన్నికల సందర్భంగా విస్తృతంగా ప్రచారం సాగించారు.

 కనీసం రెండు, మూడు స్థానాలు గెలవడం ద్వారా పార్టీ శ్రేణుల్లో ఆశలు కలిగించవచ్చునని భావించారు. ఇప్పుడు భవిష్యత్తు మనదే అని నమ్మించడానికి కొత్త కారణాలు వెతుక్కునే పనిలో పడింది టిడిపి నాయకత్వం. 18 అసెంబ్లీ, ఒక పార్లమెంటు నియోజక వర్గంలో గత ఎన్నికల్లో టిడిపి గెలిచింది ఒక్కటి కూడా లేకపోవచ్చు. ‘ఓడినవి మా సీట్లుకాదు’-అని సమర్ధించుకోచ్చు. మరో రెండేళ్లలో సాధారణ ఎన్నికలు ముంచుకొస్తుండగా, ప్రతి ష్ఠాత్మకంగా జరిగిన ప్రస్తుత ఉపఎన్నికల్లో ప్రధాన ప్రతిపక్షం ఒక్కసీటు కూడా గెలుచుకోలేని స్థితిలో ఉంటే ఇక ఆ పార్టీ ప్రజల్లో ఎలా విశ్వాసం సంపాదించగలుగుతుంది. కాంగ్రెస్ రెండుగా చీలిన తరువాత సాధారణంగా టిడిపి తన ఓటు బ్యాంకును నిలుపుకొని ఉంటే విజయం సాధించాలి. 

కానీ కాంగ్రెస్ ఓట్లతో పాటు టిడిపి ఓట్లను సైతం వైఎస్‌ఆర్ కాంగ్రెస్ కొల్లగొడుతోంది. ‘కాంగ్రెస్ వ్యతిరేకతే మా పార్టీ సిద్ధాంతం’-అని చెప్పుకున్న బాబు పార్టీ ఇప్పుడు ‘జగన్‌పై వ్యతిరేకతే మా సిద్ధాంతం’ -అని ప్రచారం చేసుకుంటోంది. బాబు తనకు అనుకూలంగా ఎంత ప్రచారం చేయించుకుంటున్నా ప్రజల్లో మాత్రం విశ్వసనీయత నెలకొల్పుకోలేక పోతున్నారు. ఆయనను పార్టీ శ్రేణులే కాదు... చివరకు ప్రజలు నమ్మడం లేదు. నమ్మకం కలిగించడానికి ఎనిమిదేళ్లుగా చేసిన కృషి ఫలించలేదు. తన చర్యల ద్వారా నమ్మకం కలిగించాలి కానీ... నమ్మకం కలిగించడమే ఒక ప్రధాన కార్యక్రమంగా ప్రయత్నం సాగిస్తే జనం నమ్మరని మరోసారి రుజువైంది.

‘దొరగారు’ మేల్కొనాలి!

తెలంగాణ ‘దొర’కు ఇది నిజంగానే ఊహించని షాక్. తెలంగాణ వాదానికి తాను తప్ప మరో గత్యంతరం లేదని భావిస్తున్న టిఆర్‌ఎస్‌కు ఇది గట్టిదెబ్బే. తెరాస అధినేత కె.చంద్రశేఖరరావు వైఖరిని తీవ్రంగా వ్యతిరేకించే వారు సైతం తెలంగాణ కోసం ఒకటిగా ఉన్నారు. ఉద్యమం ఉవ్వెత్తున ఎగిసి పడిన దశలో జరిగిన ఉప ఎన్నికల్లో 50వేల నుంచి లక్ష ఓట్ల మెజారిటీతో విజయం సాధించి, ప్రత్యర్థులకు డిపాజిట్లు దక్కని పరిస్థితి నుంచి ఇప్పుడు పరకాలలో స్వల్ప మెజారిటీతో తెరాస గట్టెక్కాల్సి వచ్చింది.

‘టిడిపి ముసలి నక్క.. దాని గురించి పట్టించుకోవలసిన అవసరం లేదు, మింగేయడానికి వస్తున్న యువ కిశోరం జగన్‌పై దృష్టి పెట్టాలి’- అని ఓ తెలంగాణ వాది ఇటీవల ఆ ప్రాంత ఉద్యమకారులను హెచ్చరించారు. నిజమే.. పరకాల ఉప ఎన్నికల ఫలితాలు ఆ మాటలనే రుజువు చేశాయి. ‘ఓదార్పు’ అంటూ జగన్, ఏదో ఒక పేరుతో చంద్రబాబు ఉప ఎన్నికల్లో విస్తృతంగా పర్యటిస్తున్న సమయంలో టిఆర్‌ఎస్ అధ్యక్షుడు కెసిఆర్ ఫాం హౌస్‌లో విశ్రాంతి తీసుకుంటూ గడిపారు.

తెలంగాణపై నిర్ణయం తీసుకోవలసింది కేంద్రమే అనే మాట బాబూ చెప్పాడు, ఇప్పుడు వైఎస్‌ఆర్ కాంగ్రెస్ పార్టీ అదే చెబుతోంది. తెలంగాణ పేరుతో ఓట్లు వేయించుకుని ఇప్పుడు మాట మార్చిన టిడిపిని తెలంగాణ ప్రజలు డిపాజిట్ కూడా దక్కని విధంగా ఓడిస్తుంటే, అదే మాట చెప్పిన జగన్ పార్టీ గట్టి పోటీనే ఇచ్చింది. తెలంగాణ కోసం జాతీయ స్థాయిలో గట్టి మద్దతు ఇస్తున్న బిజెపిని కలుపుకొని పోవడానికి కెసిఆర్ ప్రయత్నించి ఉండాల్సింది. ‘మీరు పోటీ చేయవద్దు మద్దతు ఇవ్వండి’- అని అభ్యర్థిస్తే బిజెపి తప్పుకునేది కానీ కెసిఆర్‌కు కావలసింది అది కాదు. బిజెపి పోటీ చేయాలి, డిపాజిట్ దక్కకుండా ఓడిపోవాలి.

దాంతో మహబూబ్‌నగర్‌లో ఆ పార్టీకి లభించిన ఊపు పరకాలతో కొట్టుకుపోతుంది, వచ్చే సాధారణ ఎన్నికల్లో ఆ పార్టీ బేరమాడే శక్తి కోల్పోతుందనేది కెసిఆర్ ఎత్తుగడ. ఎత్తుగడ బాగానే ఉంది కానీ స్వల్ప మెజారిటీతో విజయం సాధించడం, జగన్ పార్టీ గట్టి పోటీ ఇవ్వడం తెలంగాణ వాదానికి సవాల్ కాదా? తెలంగాణ వాదాన్ని వినిపిస్తున్న బిజెపిని శత్రువుగా దూరం పెట్టడం వల్ల సాధించిందేమిటి? టిఆర్‌ఎస్‌కు విజయం లభించినా, వైఎస్‌ఆర్ కాంగ్రెస్ నుంచి టిఆర్‌ఎస్‌కు తెలంగాణలో గట్టి పోటీ తప్పదని పరకాల ఉపఎన్నిక నిరూపించింది.