24, నవంబర్ 2017, శుక్రవారం

తలలు మార్చుకోండి!

‘‘నిజం ఛెప్పండి.. ఎక్కడికి వెళుతున్నారు’’
‘‘ఆఫీసు పనిమీద క్యాంపుకెళుతున్నాను డియర్. ఎప్పుడూ లేనిది ఈరోజు అలా అడుగుతున్నావేమిటి?’’
‘‘నన్ను మభ్యపెట్టాలని చూడకండి. నిజంగా ఆఫీసు పనిమీద వెళుతుంటే
బీరువాలో ఉన్న ఆ కొత్తముఖం పెట్టుకొని వెళ్లాల్సిన అవసరం ఏంటి? ఆఫీసుకు వెళ్లేప్పుడు పెట్టుకుని వెళ్లే ఆ ఏడుపు ముఖంతోనే వెళ్లండి. లేదంటే మొన్న మా అయ్యవాళ్లు వచ్చినప్పుడు పెట్టుకొన్న నీరసపు ముఖం పెట్టుకొని వెళ్లండి. మరీ అంత అమాయకురాలిని అనుకోకండి. క్యాంపు పేరుతో పూలరంగడి ముఖంతో వెళుతున్నారంటే మీరు ఎక్కడికి వెళుతున్నారు? ఎవరిని కలుస్తారు? ఏం చేస్తారో అన్నీ ఊహించలను’’
‘‘నువ్వు ఎంతో ఇష్టంగా కొనుక్కున్న ఐశ్వర్యరాయ్ మోడల్ ముఖం మీద ఒట్టు డియర్ నువ్వు అనుమానిస్తున్నట్లు నా మాజీ డార్లింగ్ దగ్గరకు వెళ్లడం లేదు. ఆమె ఉండేది అక్కడే. కానీ నేను మాత్రం అక్కడకు వెళ్లడం లేదు’’
‘‘ఐతే మీ పాతముఖంతోనే వెళ్లండి. అలా అయితే మిమ్ములను నమ్ముతాను. మీ క్రెడిట్ కార్డు, డెబిట్ కార్డులు నాకు ఇచ్చి వెళ్లండి. ఖర్చు కోసం నేనిచ్చిన డబ్బుకు లెక్కలు చెప్పాలి. బయటకు వెళ్లాక నచ్చిన ముఖం కొనుక్కొని వెళదాం అనుకుంటున్నారేమో! మీ పప్పులు ఉడకవు మీరెక్కడికి వెళ్లినా మా తమ్ముడు ఏదో ఒక ముఖంలో మిమ్ములను నీడలా వెంటాడుతుంటాడు’’
‘‘రామేశ్వరం పోయినా శనీశ్వరం తప్పదన్నట్టు రెండు చేతులా సంపాదిస్తూ ఒకేసారి ఆరు ముఖాలు కొనుక్కొనే స్తోమత ఉన్నా ముదనష్టపు పాత ముఖంతోనే బతికేయాలి. కాలేజీలో చదువుకొనేటప్పటి నుంచి ఆమె అంటే ఎంతిష్టటమో! ప్రేమలేఖ రాస్తే ముఖం అద్దంలో చూసుకున్నావా? అని చీదరించుకుంది. బల్లకింది నుంచి, బల్లపై నుంచి సంపాదించే ఉద్యోగం వచ్చాక అదృష్టం ఫెవికాల్‌లా పట్టుకొంది. ఇప్పుడు నేను తలచుకొంటే నేను సంపాదిస్తున్న డబ్బుతో రోజుకో ముఖం కొనుక్కోగలను. కానీ ఏం లాభం. ఓసారి అనుకోకుండా విమానాశ్రయంలో నా కొత్తముఖంతో పాత డార్లింగ్ కంటపడ్డాను. వావ్ కొత్తముఖంలో ఎంత బాగున్నావ్ డియర్ అని తానే పలకరించేసరికి నమ్మలేకపోయాను. కొంపదీసి మా ఆవిడే పాత డార్లింగ్ ముఖంలో వచ్చిందా? అని అనుమానం వచ్చింది. చేతిమీదున్న పుట్టుమచ్చ చూసి గుర్తుపట్టాను. అప్పటి నుంచి క్యాంపులు పెరిగాయి. ఇప్పుడేమో మా ఆవిడకు అనుమానం పెరిగింది’’
‘‘ఏంటి నేనిక్కడ మాట్లాడుతుంటే మీలో మీరే ఏదో ఆలోచించుకుంటున్నారు?’’
‘‘ఏమీ లేదు డియర్. పోచంపల్లి చీరలు, నీకోసం కొన్న రెండు డజన్ల ముఖాలు పాతపడ్డాయి కదా! కొత్త ముఖాలు, కొత్త చీరలు కొందామని ఆలోచిస్తున్నా. పోచంపల్లి వెళదామా? కలసి వెళదామా? అని ఆలోచిస్తున్నాను’’
‘‘అంతొద్దు నీ అండర్‌వేర్ నేను కొనుక్కొస్తాను. ఇక నాకు కావలసిన మోడల్ ముఖాలు మీరు కొనుక్కొస్తారా? ఏడ్చినట్టే ఉంది. మీ ఆలోచన, నోరు మూసుకుని పాత ముఖంతో వెళ్లిరండి’’
***
‘‘హలో అక్కయ్యా ఇంట్లోనే ఉన్నారా? అర్జంట్‌గా మా అమ్మాయికి పెళ్లి చూపులు. సమయానికి మా ఆయన ఇంట్లో కూడా లేరు. మీరొక్కరే గుర్తుకు వచ్చారు. మొన్న శ్రీ లక్ష్మి పెళ్లిలో మీరు తొడుక్కున్న ముఖాన్ని ఓ గంట అరువిస్తారా? పెళ్లి చూపులు అయిపోగానే ఫ్రిజ్‌లో పెట్టి మీ ముఖం మీకిచ్చేస్తాను’’
‘‘అమ్మాయికి పెళ్లి చూపులంటే, ఆ మాత్రం సహాయం చేయలేనా? అలాగే తప్పకుండా. కానీ జాగ్రత్త. అది చాలా ఖరీదైన ముఖం. నాకెంతో ఇష్టమైంది. అలాంటి ముఖం మళ్లీ మార్కెట్‌లో దొరుకుతుందనే నమ్మకం కూడా లేదు’’
‘‘ఔను అక్కయ్యా.. ఈ మధ్య మార్కెట్‌లోకి చైనా ముఖాలు వచ్చిపడ్డాయి. ధరలు తక్కువ అని ఎగబడుతున్నారు. కానీ ఏ మాత్రం నాణ్యత లేవు. ఆరునెలలు కూడా ఉండడం లేదు. ఎంతైనా అమెరికా వాడు అమెరికావాడే అక్కయ్యా. తలలు మారుస్తూ అమెరికాలో ఆపరేషన్ సక్సెస్ కాగానే, దీన్ని ఎలా వ్యాపారంగా మార్చుకోవాలా? అని చైనావాడు ఆలోచించాడు. అమెరికాలో వ్యాపారాత్మకంగా తలల మార్పిడికి అనుమతి ఇవ్వకపోవడం వారి చారిత్రక తప్పిదం. అమెరికాలో అవకాశం లేక ఆ కాలంలో చైనా వచ్చి తలలు మార్చారు. ఆ ఫార్ములా వాడికి తెలిసిపోయి, బేగంబజార్‌లో ప్లాస్టిక్ వస్తువులు అమ్మినంత ఈజీగా, జుమేరాత్ బజార్‌లో సెకండ్ హ్యాండ్ వస్తువులు అమ్మినంత చౌకగా చైనావాడు తలలు అమ్మేస్తున్నాడు. చెబితే నమ్మవేమో అక్కయ్యా మంచి ఫీచర్లు ఉన్న చైనాఫోన్, చైనావాడి తలలు ఒకే రేటుకు అమ్ముతున్నారు.’’
‘‘పోనీలే అక్కయ్యా మనలాంటి వాళ్లం అలాంటి చైనా ముఖాల జోలికి వెళ్లవద్దు. మిడిల్ క్లాస్ వాళ్లు, పేదవాళ్లు ఏదో మనలానే ముఖాలు మార్చాలని ముచ్చటపడి చైనా ముఖాలతో సంతృప్తి పడుతున్నారు’’
‘‘నాప్‌టాల్‌లో ఆన్‌లైన్‌లో ముఖాలు కొనుక్కొనే ఆ ముదనష్టపు వాడికి అమ్మాయిని ఇచ్చే ప్రసక్తే లేదు. చూస్తూ చూస్తూ ఆ దరిద్రపు సంబంధానికి అమ్మాయిని ఇవ్వాలని మీకెలా అనిపించిందండి’’
‘‘ఇంట్లో డబ్బుందని, ఫ్రిజ్‌లో డజను ముఖాలు ఉన్నాయని అంత అహంకారం పనికిరాదు. రాధా! నేను నిన్ను పెళ్లి చేసుకొనేప్పుడు నీకేమయింది రాధా! కొత్త ముఖాలు కాదు కనీసం త్రిబులెక్స్ సబ్బులు కొనేందుకు కూడా మీ ఇంట్లోవాళ్ల వద్ద డబ్బులు ఉండేవి కాదు. ఆ విషయం మరచిపోవద్దు. ఇంట్లో డబ్బులు, ఒంట్లో జబ్బులు ఉన్నాయని మిడిసిపాటు పనికిరాదు. నిజమే నా మేనల్లుడికి డజను ముఖాలు కొనే స్థోమత లేకపోవచ్చు. కానీ అమ్మాయికి గుప్పెడు మల్లెపూలు తెచ్చే మంచి మనసుంది.’’
‘‘అమ్మా నాన్నా నా పెళ్లికోసం మీ ఇద్దరూ కొట్టుకోవద్దు. నేనో అబ్బాయిని ప్రేమించాను. అబ్బాయి ఆఫ్రికా, ఆ నల్లని ముఖం చూడగానే మనసు పారేసుకున్నాను. చైనా చౌకధర ముఖాలు, అమెరికా తెల్లముఖాలు చూసీచూసీ విసుగేసింది. ఆఫ్రికా ముఖం ఉన్న అబ్బాయిని చేసుకొంటే అందరిలో నేను ప్రత్యేకంగా కనిపిస్తా. మీకు నచ్చినా నచ్చకపోయినా ఇది ఫైనల్’’
***
వచ్చే ఎన్నికల్లో మిమ్ములను గెలిపిస్తే తెల్ల రేషన్ కార్డుపై ప్రతి ఇంటికి రెండేసి ముఖాలు ఇస్తాం. అంతకన్నా ఎక్కువ ముఖాలు కావాలంటే వడ్డీలేని రుణం ఇస్తాం. తరువాత ఒకేసారి రుణమాఫీ చేస్తాం. ఈ ఎన్నికల మ్యానిఫెస్టోతో మనదే విజయం.
***
‘‘ఏమండోయ్ ఈ విషయం విన్నారా! మీ బాస్ సుబ్బారావు ఇంటిపై ఏసీబీ దాడి జరిగిందట! టీవీలో బ్రేకింగ్ న్యూస్ వస్తోంది. హైదరాబాద్‌లో, అమరావతిలో 18 ఫ్లాట్‌లు, 14 ఫ్లాట్లు, 50 ఎకరాల భూమి, పది కిలోల బంగారం దొరికింది. ఇవన్నీ కామన్. ఇల్లంతా వెతికితే మొత్తం 36 తలలు దొరికాయట! ముఖాలు ఎంత అందంగా ఉన్నాయంటే చివరకు ఆ ఏసీబీ అధికారులు కూడా ఆ ముఖాలపై మనసుపడ్డారట! ఎవరికీ అనుమానం రాదనుకొని బెడ్‌రూమ్‌లోని ఫ్రిజ్‌లో ఆ ముఖాలు దాచిపెట్టార్ట! దొరికిపోయారు’’
‘‘ఆపు శకుంతలా ఆపు. ఏసీబీ వాళ్లు మనింటిపై కూడా దాడి చేయవచ్చు. ఫ్రిజ్‌లోని ఆ తలలను తీసి దాచిపెట్టు... వెళ్లు..వెళ్లు..వెళ్లు...
***
‘‘ఏమైంది వెళ్లు..వెళ్లు అని కలవరిస్తున్నారు. బారెడు పొద్దెక్కింది లేవండి’’
‘‘ఫ్రిజ్‌లో తలలు ఉన్నాయా?’’
‘‘మీ తలలో ఏం లేకపోయినా మీ వద్దే ఉంటుంది. కానీ ఫ్రిజ్‌లో ఉండడం ఏంటి?
‘‘ఏమైంది పిచ్చిపిచ్చిగా మాట్లాడుతున్నారు’’
‘‘అంటే ఇదంతా కలనా? అమెరికా డాక్టర్లు తలలు మార్పిడి ఆపరేషన్ విజయవంతంగా చేశారట! ఆ వార్త చదివి తలలను మార్చడం సులభం అయితే భవిష్యత్తు ఎలా ఉంటుందని ఆలోచిస్తూ నిద్రలోకి జారుకున్నాను’’

బుద్దా మురళి (జనాంతికం 24-11-2017)

17, నవంబర్ 2017, శుక్రవారం

మన కాలంలో అతీతశక్తులు


‘‘మా రోజులే వేరు. మా కాలంలో ఇంట్లోకి నాన్న వస్తున్నాడంటే గజగజ వణకిపోయేవాళ్లం. చిన్న తప్పు చేసినా తొడపాశం పెడతాడని భయపడేవాళ్లం. కలికాలం. ఈ రోజుల్లో తల్లిదండ్రులను పిల్లలు పేరుపెట్టి పిలుస్తున్నారు. మొన్న ఓ ఫంక్షన్‌లో వాయ్ పంకజ్ అని అమ్మాయి పిలుస్తుంటే ఎవరా అని విచారించా, వాళ్ల అమ్మాయి అట. ఏదో బాయ్‌ఫ్రెండ్‌ను పిలిచినట్లు ఆ పిలుపులేమిటి? మా కాలంలో స్కూల్‌లో టీచర్‌గా తొడపాశం పెట్టి ఎక్కాలు నేర్పించేవాళ్లు. పిదపకాలం పిదప బుద్ధులు. అదేదో చట్టం ఉందిట! విద్యార్థులను కొట్టకూడదట! కలికాలం’’
‘‘ఔను మీ వయసువాడే సుబ్బారావు అని పాపం చెవిటివాడు. చిన్నప్పుడు ఎక్కాలు సరిగా రాకపోతే పంతులు గూబగుయ్యిమనేట్టు చెంపదెబ్బ కొట్టాడట! ఆ రోజు నుంచి సుబ్బారావు స్కూల్‌కు వెళ్లలేదు. వాడి చెవి పనిచేయడం లేదు. వృద్ధాప్యంలో ఒకరి పంచన బతుకుతున్నందుకు వారేం తిట్టుకుంటున్నారో వినపడదు హాయిగా ఉంది అని సంతోషంగా చెబుతుంటాడు. అడగడం మరిచాను మీ అమ్మానాన్నలను ఓల్డ్ ఏజ్ హోంలో వేశావట?’’
‘‘నేను వేయడం ఏంటి? తల్లిదండ్రుల కోరిక తీర్చడం నా ధర్మం. విశాలమైన వృద్ధాశ్రమంలో ఉంటామని పోరి వెళ్లారు. తమ వయసువారితో కబుర్లు చెబుతూ ఉండాలని ఎవరికి మాత్రం అనిపించదు. మా అమ్మానాన్నల కోరిక తీర్చినందుకు నాకెంత సంతోషంగా ఉందో చెప్పలేను’’
‘‘ఔను చెప్పలేవు. తెలిసిపోతుంది. చెప్పడం కష్టం. నువ్వేమో మీ అమ్మానాన్నల కోరిక తీర్చాను అంటావు. అందరేమో! మీ ఆవిడ కోరిక తీర్చడానికి ఈ వయసులో అమ్మానాన్నలను ఎవరూలేని అనాధల్లా వృద్ధాశ్రమంలో వదిలావు అంటున్నారు’’
‘‘శ్రీరాముణ్ణి అనుమానించిన లోకం ఇది. లోక కల్యాణం కోసం శ్రీరాముడు సీతమ్మను అడవిలో వదిలాడు. అలానే అమ్మానాన్నల కోసమే వృద్ధాశ్రమంలో వదిలాను’’
‘‘నీ పాపం శ్రీరామునికి అంటగట్టడం ఎందుకులే? నువ్వన్నట్లు ఆ రోజులు అద్భుతం, ఆ రోజుల్లో పుట్టిన మీలాంటివారు తల్లిదండ్రులను పుణ్యంకోసం బొందితో కైలాసానికి పంపే సాహసాలు కూడా చేస్తున్నారు. ఈ కాలం వారికి అంత ఓపిక ఎక్కడిది.’’
‘‘ఏంటి మీ ఫ్లాట్ ఎదురింటి వాళ్లు లింగులిటుకు మంటు ఇద్దరే ఉంటారు. పిల్లలు వీరిని పట్టించుకోరా?’’
‘‘అవును పట్టించుకోరు. వాళ్లు మనలాంటి పుణ్యకాలం మనుషులు కాదు. ఈ కాలం పాపాత్ములు. పిల్లలు అమెరికాలో ఉంటారు. ఒకే ఇంట్లో ఉన్నా పలకరించుకోలేని, మాట్లాడుకోలేని పుణ్యకాలం మనుషులం మనం. ఖండాంతరాల్లో ఉన్నా తమ తల్లిదండ్రుల బాగోగులను అక్కడినుంచే చూస్తూ, తమకోసం కష్టపడ్డ తల్లిదండ్రులకు మంచి జీవితాన్ని ఇవ్వాలని అక్కడి నుంచే ఏర్పాటు చేసే కలికాలం మనుషులు వాళ్లు’’
‘‘ఏంటో చెప్పావ్! అస్సలు అర్థం కాలేదు. కానీ ఏదో అర్థం మాత్రం ఉందనిపిస్తోంది!’’
‘‘ఆ సంగతి వదిలెయ్. అతీతశక్తులు ఉన్నాయంటావా?’’
‘‘నీకెందుకలా అనిపిస్తోంది’’
‘‘మొన్న నదిలో పడవ మునిగి 21మంది మరణించారుకదా? అతీతశక్తుల పనే అని చెప్పగలను’’
‘‘మంచి ఐడియా ఫలానా వారు కారణం అని తేల్చితే వారిని శిక్షించాలి. ఏ సామాజిక వర్గం వారు, ఎవరికి కోపం వస్తుందో, ఎవరి తెరవెనుక ఏ మంత్రి ఉన్నారో ఇవన్నీ తేల్చాలి. అతీతశక్తులపని, అంటే ఏ సమస్యా ఉండదు’’
‘‘నేను చెప్పాలనుకున్నది అది కాదు. ఆధారం లేనిదే ఏదీ మాట్లాడను. అతీతశక్తి ఉంది. ముమ్మాటికీ నిజం. ఉదాహరణ చెబితే నువ్వు ఒప్పుకుంటావ్’’
‘‘నిజమే. ఒక్కోసారి నాకూ అలానే అనిపిస్తుంది. మొన్న ఓ యువమంత్రి ప్రతిపక్షం లేని అసెంబ్లీలో అద్భుతంగా మాట్లాడారట! ప్రతిపక్షం గజగజ వణికిపోయిందట! అది చూశాక నిజంగా అతీతశక్తులు ఉండే ఉంటాయి అనిపించింది. మొన్న రాంగోపాల్ వర్మతో ఎన్టీఆర్ ఆత్మ మాట్లాడిన వీడియో వాట్సప్‌లో, ఫేస్‌బుక్‌లో వర్మనే షేర్ చేశాడు. సూపర్ హిట్ సినిమా తీసిన వర్మనే అతీతశక్తులకు ఆధారం చూపించినప్పుడు నమ్మకుండా ఎలా ఉంటాం. ఏవో అతీతశక్తులే ఆ యువమంత్రితో అద్భుతంగా మాట్లాడించి ఉంటాయి!!
‘‘అది కూడా అతీతశక్తుల పనే కావచ్చు. కానీ నేను చెప్పాలనుకున్న అతీతశక్తి పని అదికాదు. లాంచీని నదిలో ముంచింది అతీతశక్తులే’’
‘‘ఇందులో నువ్వు కనిపెట్టిందేముంది. ప్రతి వ్యాపారం వెనుక అతీత శక్తి ఉంటుంది’’
‘‘అబ్బా అదికాదు. మానవ ఊహాశక్తికి అందని ఏదో ఒక అతీత శక్తి ఉంది అంటారుకదా! అలాంటి అతీతశక్తి గురించి నేను చెబుతున్నది. బెర్ముడా రహస్యం ఇంకా బయటపడలేదుకదా? ఏ పడవ అటు వెళ్లినా తనలోకి లాక్కొంటుంది. అలాంటి అతీతశక్తి గురించి చెబుతున్నాను’’
‘‘అంటే కృష్ణనదికి బెర్ముడా ట్రయాంగిల్‌కు సొరంగ మార్గం ఉందంటావు. ఓ గుంత చూసి గోల్కొండ కోట నుంచి వరంగల్‌కు సొరంగ మార్గం ఉందని ఆ మధ్య ఓ వార్త వచ్చింది. తీరా తవ్వి చూస్తే అది డ్రైనేజి మార్గమని తేలింది.’’
‘‘డ్రైనేజి మార్గం కాదు. కచ్చితంగా ఇది అతీతశక్తి పనే అతీతశక్తులు ఉన్నాయని మనం రుజువు చేస్తే ప్రపంచంలో కొత్త ఆవిష్కరణలకు నాంది పలికినవారం అవుతాం’’
‘‘సరే, ఆ అతీతశక్తులు ఏమిటి? ఆధారలేమిటో చెప్పు’’
‘‘పడవ మునిగిన తరువాత వచ్చిన వీడియోలు చూశావా? పడవను నదిలోకి వదిలే ప్రసక్తే లేదని అధికారి ఒకరు అడ్డుకున్నాడు. వెళ్లనిచ్చే ప్రసక్తేలేదని అతను అడ్డుకున్నా, పడవ నదిలోకి వెళ్లింది. నాకేపాపం తెలియదు, నాకు ఐదు పడవలు ఉన్నాయి. నదిలోకి వెళ్లడానికి అనుమతి లేదు కాబట్ట్డి నేను పంపించలేదు. దేవునిమీద ఒట్టు. నేను ఒట్టి అమాయకుడిని అని పడవల యజమానికి కొండలరావు హృదయవిదారకంగా చెబుతున్నాడు. కావాలంటే చూడు. పత్రికల్లో వచ్చింది.’’
‘‘పడవ వెళ్లకుండా అధికారి అడ్డుకున్నాడు, యజమాని పడవను పంపలేదు. అంటే ఏదో ఒక అతీతశక్తి పడవను నీటిలోకి లాక్కొంది. అలానే ప్రయాణీకులను పడవలోకి లాక్కొని, నదిలోకి తీసుకువెళ్లింది. వీరిలో ఆయువుతీరిన 21మంది మాత్రమే మరణించారు. అంటే ఏదో అతీతశక్తి పనే అని స్పష్టం కావడం లేదా?’’
‘‘బెర్ముడా ట్రయాంగిల్ వద్దకు వెళ్లిన పడవలు మాత్రమే మాయం అయ్యాయి కానీ ఇక్కడ మాత్రం ఎక్కడో బెడ్‌రూంలో ఘంటసాల భక్తి గేయాలు వింటూ విశ్రాంతి తీసుకుంటున్న పడవలు ఎవరూ చూడకుండా తమంతట తాము నదిలోకి వెళ్లాయి అంటే అతీతశక్తుల పని కాకుండా మరేమిటి?’’
‘‘నువ్వు చెబుతుంటే నిజమే అనిపిస్తోంది. కాశీమజిలీ కథలో ఓ కథ. రాజుగారు మంచపై నిద్రపోయాక మంచం కోళ్లు తమలో తామే మాట్లాడుకుంటాయి. రాజుగారికి గండం ఉందని, మంచం కోళ్లు మాట్లాడుకోవడం అనే ఆలోచన వింతగా అనిపించింది. ఈ కాలంలోనే అతీతశక్తులు పడవను, ప్రయాణికులను నదిలోకి లాక్కోవడం ప్రత్యక్షంగా చూశాం. కాశీమజిలీ కథల కాలంలో మంచం కోళ్లు మాట్లాడుకోవడంలో ఆశ్చర్యం ఏముంది’’
‘‘మీ కాలం, మా కాలం అని కాదు కానీ అతీతశక్తులు ఏ కాలంలోనైనా ఉన్నాయనిపిస్తోంది’’
‘‘ప్రపంచంలోని ప్రతి సమస్యకు కారణం అతీతశక్తులు, ప్రతి కేసులో దోషి అతీతశక్తి అనుకుంటే కేసులు ఉండవు. విచారణ ఉండదు. ఇంతకుమించి పరిష్కారం ఉండదు. ఏమంటావు’’
బుద్ధా మురళి (17-11-2017 జనాంతికం )

10, నవంబర్ 2017, శుక్రవారం

24 గంటలు విద్యుత్ తో అణుయుద్ధ ప్రమాదం ..వాణీ విశ్వ నాథ్ రాజకీయ ప్రవేశం తో ప్రపంచ శాంతి


‘‘జీవితంలో అన్నీ మనం అనుకున్నట్టే జరగవు. జరిగినవాటిని జీర్ణం చేసుకోవాలి తప్పదు. ఇంత దిగులుగా ఎప్పుడూ కనిపించలేదు ఏమైంది?’’
‘‘కొన్ని చూస్తుంటే బాధేస్తుంది. చెబితే వినరు ఏం చేస్తాం’’.
‘‘ఇంతకూ దిగులెందుకో చెప్పనేలేదు’’.
‘‘ఈ విశ్వం ఏమవుతుందా? అని ఆలోచిస్తుంటే భయం వేస్తుంటుంది’’.
‘‘ఎంతైనా నువ్వు అదృష్టవంతుడివి’’.
‘‘ భయం వేస్తుందంటే  అదృష్టవంతుడివి అంటావేం. నీకన్నీ వెటకారాలే’’.
‘‘ నిజంగానే. చూడోయ్ ఆనందంగా ఉండాలని చాలామంది ఎంతో తంటాలు పడతారు. ఎంతటి సంతోషకరమైన పరిస్థితుల్లోనైనా ప్రపంచంలో ఎక్కడినుంచైనా ఒక సమస్యను తెచ్చుకొని, దానికోసం దీర్ఘంగా ఆలోచించి, నువ్వు కోరుకున్న విధంగా బాధపడతావు. కోరుకున్నది సాధించడం కొందరు అదృష్టవంతులకే సాధ్యం.  అమెరికాను చికాకుపెడుతున్న కిమ్ గురించి ఆలోచిస్తున్నావా? ఐనా అది మన పరిధిలో లేని సమస్య. అసలు అమెరికా పరిధిలోనే లేదు. ఇక మనమేం చేస్తాం. ఆ సమస్య వదిలేసి, నీ బాధ కోసం ఇంకో సమస్యను నమ్ముకోవడం మంచిది. ఏమాటకు ఆమాటే చెప్పుకోవాలి. పుండును గిచ్చుకొంటే ఏదో తెలియని ఆనందం కలిగినట్టు, సమస్యను తలుచుకొని, సృష్టించుకొని బాధపడుతుంటే, నలుగురు ఓదార్చడం భలే ఉంటుంది. అందుకే అన్నాను ఎంతైనా అదృష్టవంతుడివి అని’’.
‘‘
 అసలు అమెరికానే నా సమస్య కావచ్చుకదా? అయినా నేను నీలా సంకుచితంగా ఆలోచించేవాణ్ణి కాదు. విశ్వమానవుణ్ణి. ప్రపంచంలో ఎక్కడ సమస్య ఉన్నా భూతద్దం వేసి చూసి బాధపడతాను తెలుసా? ఇది  నాకు  చిన్నప్పుడే అలవాటైంది. ప్రపంచంలో ఏ దేశంలో ఏం జరిగినా ఖండించండి అంటూ మా స్కూల్ గోడలపై రాసేవాణ్ణి. ఓసారి ఎక్కడా ఏ సమస్య కనిపించకపోతే రెండు రోజులు నిద్రపట్టలేదు. చిట్టి బుర్రకు పెద్ద ఆలోచన వచ్చింది. ఉదయం లేవగానే గ్లోబ్ చూసి అప్పటివరకు ఎవరూ వినని దేశం పేరు తీసుకోని టొట్రూ దేశంలో మానవ హక్కుల ఉల్లంఘన నశించాలి. పాలకులను దించేయాలి అంటూ వాడి వేడి నినాదాలను స్కూల్ గోడలపై రాశాను. మరుసటి రోజు నాకే ఆశ్చర్యం వేసింది. ఆ నినాదాలు కాలేజీ గోడలపై కనిపించాయి. ఎక్కడ చూసినా అవే నినాదాలు. నేను ఆరోజే అనుకున్నాను, సమస్యలు లేవని నిరాశ చెందవద్దు, సమస్యలను సృష్టించుకుందాం అనుకున్నాను. అదే మార్గంలో వెళుతున్నాను. నా మార్గం అనితర సాధ్యం’’.
‘‘వండుకునేవాడికి ఒకటే కూర, అడుక్కునేవాడికి 60 కూరలు’’ అన్నట్టు సమస్యలు వెతుక్కోవాలనే ఆలోచనే రావాలి కానీ ప్రపంచంలో సమస్యలకు కొదవా?’’.
‘‘నీ మాటలు నాకెప్పుడూ సరిగా అర్థం కావు. ఆ సామెత ఉద్దేశం నన్ను పొగిడినట్టా? లేక?’’ 
అణుయుద్ధం ‘‘చూశావా ఎంత ఎదిగిపోయావో? నా మాటలను అర్థం చేసుకోవడం కూడా నీకు ఓ సమస్యనే అన్నమాట! ఇంతకూ ఆ దిగులుకు కారణం ఏమిటో చెప్పనే లేదు’’.
‘‘ఆ వార్త చూసినప్పటినుంచి మనసు దిగులుగా ఉంది’’.
‘‘ఏ వార్త, టెక్సాస్‌లో దుండగుడు చర్చిలో పిల్లలని కూడా చూడకుండా అమానుషంగా చంపడం గురించిన వార్తనా?’’
‘‘అది కాదు. అమెరికాలో అకారణంగా ఇలాంటి ఉన్మాదం మామూలే’’.
‘‘మరి నీ దిగులు కారణం?’’
‘‘ఈ వార్త చూడు. వ్యవసాయానికి 24 గంటలపాటు ఉచిత విద్యుత్ అంటే ఎంత బాధాకరం’’.
‘‘ఔను నిజమే. చీకట్లో మగ్గిపోతారు అని చిలక్కు చెప్పినట్టు చెబితే అలా చెప్పిన వారి మనోభావాలు దెబ్బతీనే విధంగా 24 గంటలు విద్యుత్ ఇవ్వడం అన్యాయం. విద్యుత్‌ను రేపటికోసం దాచిపెట్టుకోవాలి కానీ ఇలా పంతానికి పోయి ఖర్చు చేయడం అన్యాయం. వందేళ్ళకు ఉపయోగపడే విద్యుత్ ఏడాదికే ఖర్చు చేసేట్టుగా ఉన్నారు’’.
‘‘వెటకారమా?’’
‘‘అయ్యో నీకు మద్దతుగా ఏదో తెలిసీ తెలియకుండా, తెలిసీ తెలియని విషయం మాట్లాడాను, అంతే తప్ప వెటకారమేమీ లేదు’’.
‘‘వ్యవసాయానికి 24 గంటల విద్యుత్‌వల్ల భూమిలోని నీళ్లన్నీ ఖర్చవుతాయి. ఈ రాష్ట్రంలో నీళ్లు అయిపోయిన తరువాత ఇరుగు పొరుగు రాష్ట్రాల నీళ్లు తరువాత ఆ ఉత్తరాది రాష్ట్రాల నీళ్లు లాగేసుకొంటాం. అంతవరకూ పరవాలేదు. తరువాత పాకిస్తాన్, చైనా, జపాను, శ్రీలంక వంటి ఇరుగు పొరుగు దేశాల భూగర్భ జలాలను లాగేస్తాం. దీనివల్ల దేశాలమధ్య యుద్ధాలు జరిగే ప్రమాదం ఉంది. అసలే చైనా ఇండియాతో యుద్ధానికి ఏ సాకు దొరుకుతుందా? అని ఎదురుచూస్తోంది. 24 గంటల విద్యుత్ ఇచ్చి ప్రపంచాన్ని అణుయుద్ధం ప్రమాదంలోకి నెట్టివేయడం అవసరమా? ప్రపంచ శాంతికి కలిగే ప్రమాదాన్ని హెచ్చరిస్తున్నా అంతే. నీళ్లు ఎక్కువగా లాగేస్తే సూర్యుడు మరింత వేడెక్కి, ఓజోన్ పొర కరిగే ప్రమాదముంది’’.
‘‘అయ్యో వినడానికే భయంగా ఉంది. ప్రపంచ శాంతికోసం మనవంతు ప్రయత్నం చేద్దాం. కానీ ఈ సంగతి వదిలేద్దాం. ఇంకా మాట్లాడితే భయంతో గుండెపోటు వస్తుందేమో అని భయంగా ఉంది.’’
‘‘వినడానికే ఇలా ఉంటే 24 గంటలు ఇస్తే ఎలా వుంటుంది ఆలోచించు. సరేకానీ ఈ వార్త విన్నావా?’’’
‘‘కొత్త పార్టీ ఏర్పాటుపై ఆలోచిస్తున్నామని పటేల్‌గారు అన్నారట’’.
‘‘అన్ని పార్టీలు కలిసి ఓ కూటమి ఏర్పాటు చేశాయి కదా? పార్టీలన్నీ వెళ్లిపోయాక, పెళ్లివారిల్లు పెళ్లి తరువాత బోసిపోయినట్టు అయింది. ఖాళీ ఇల్లు మళ్లా కళకళలాడాలి అంటే పార్టీ పెట్టాలనే ఆలోచన చేస్తున్నట్టున్నారు’’.
‘‘ఇందులో కొత్తేముంది. గత రెండేళ్ల నుంచి కొత్త పార్టీ కోసం రోజూ ప్రకటనలు వస్తూనే వున్నాయి కదా?’’
‘‘ఏం జరగవచ్చు?’’
‘‘ఇంకో 14 నెలలపాటు సమాలోచనలు జరుగుతూనే వుంటాయి’’.
‘‘తరువాత?’’
‘‘అసెంబ్లీ ఎన్నికలకు నోటిఫికేషన్ వస్తుంది’’
‘‘తరువాత?’’
‘‘ఎన్నికలు ముగిశాక, ఆ వెంటనే మళ్లీ సమాలోచనలు జరుగుతాయి. 60 నెలలపాటు జరుగుతూనే వుంటాయి.’’
‘‘అంటే తెనాలి రామలింగని మేక తోక మేక తోకలా- ఇది అంతులేని కథ అన్నమాట’’.
‘‘కమల్‌హాసన్ రాజకీయ పార్టీ పెట్టబోతున్నారట కదా! ఎప్పుడు పెట్టొచ్చు?’’
‘‘‘ఇప్పటికే మూడేళ్లు ఆలస్యం అయింది’.
‘‘అంటే అప్పుడే పార్టీ పెడితే, ఇప్పుడు సిఎం అయి ఉండేవారనా?’’
‘‘నేను అలా అన్నానా?’’
‘‘మరేంటి?’’
‘‘పెళ్లీడుకోసం అమ్మాయి, అబ్బాయి వయసు ఎంతుండాలో ఓ లెక్క ఉంది. వయసు రాగానే పప్పన్నం ఎప్పుడు పెడతారని అడుగుతాం’’.
‘‘నేను కమల్ పార్టీ గురించి అడుగుతుంటే నువ్వు పెళ్లి గురించి మాట్లాడుతున్నావ్. ఆయన ఇప్పటికే మూడు పెళ్లిళ్లు చేసుకున్నాడు. ఇంకో పెళ్లి చేసుకుంటాడంటావా?’’
‘‘పెళ్లికి వయసు ఉన్నట్టే నటులు పార్టీ ఏర్పాటు చేసేందుకు యుక్తవయసు ఉంటుంది’’.
‘‘యుక్తవయసా?’’
‘‘ఔను, హీరోలకు వయసు ముదిరితే, రాజకీయ యుక్తవయసు వచ్చినట్టు. ఎన్టీఆర్, చిరంజీవి ఎవరైతేనేం టాప్ హీరోలు 60 ఏళ్ల వయసులోకి రాగానే ఇంతకాలం నన్ను ఆదరించిన ప్రజల కోసం పార్టీ పెట్టి సేవ చేయాలి అనే ఆలోచన వస్తుంది. కమల్‌హాసన్, రజనీకాంత్ ఎవరైనా కావచ్చు, అది అనివార్యం’’.
‘‘హీరోలకేనా? మరి హీరోయిన్‌లకు?’’
‘‘మనది పితృస్వామ్య వ్యవస్థ, హీరో ఓరియెంటెడ్ సినిమా జీవితాలు మనవి. ఎంత గొప్ప హీరోయిన్ అయినా, హీరోయిన్‌గా అవకాశాలు తగ్గాక కొన్నాళ్లు ఎదురుచూసి, ఇక అవకాశాలు రావని గ్రహించి ఏదో పార్టీలో చేరి ప్రజలకు సేవ చేయాలి కానీ సొంతంగా పార్టీ కుదరదు. హీరోయిన్‌గా ఓ వెలుగు వెలిగిన జయప్రద, జయసుధ, రోజా, వాణి విశ్వనాధ్, కుష్బూ ఎవరైనా కావచ్చు. ఎన్టీఆర్ సమకాలీనులు జమున, శారద, వాణిశ్రీలతో సహా సంప్రదాయాన్ని కాదని హీరోయిన్ ఓరియంటెడ్ కథలతో సినిమాల్లో సంచలనం సృష్టించినప్పుడు రాజకీయాల్లో కొత్త ట్రెండ్ ఎందుకు సృష్టించవద్దని విజయశాంతి హీరోయిన్‌గా ఔట్‌డేటెడ్ అయ్యాక హీరోలా పార్టీ పెట్టి వర్కవుట్ కాక మూసేసి పార్టీల్లో విలీనం తరువాత ఇప్పుడు తత్వం బోధపడింది’’.
‘‘అంటే వీరికి ప్రజాసేవ చేయాలని ఉండదా?’’
‘‘నేను అలా అన్నానా? చూడోయ్, దీపం ఉండగానే ఇల్లు చక్కబెట్టుకోవాలి అంటారు. జనం గుర్తుపట్టినప్పుడే క్యాష్ చేసుకోవాలి. లేకపోతే ఎన్టీఆర్ పక్కన సీతగా నటించిన గీతాంజలి, అందరూ మరిచిపోయాక నాలుగు దశాబ్దాల క్రితం ఎన్టీఆర్ శ్రీరాముడు అయితే నేను సీతను అని చెప్పినా పట్టించుకొనే వారుండరు. కమలమ్మ కమతం హీరోయిన్‌ను నేనే అని చెప్పుకున్నా పట్టించుకొనేవారు లేరు. గీతాంజలి, కవితలు ఎప్పుడు రాజకీయాల్లోకి వచ్చారో, ఎప్పుడు వెళ్లిపోయారో తెలియకుండా వుంటుంది. సన్నిలియోన్ వస్తే కేరళ కిక్కిరిసిపోయింది. అలా అని పార్టీ పెడితే ఎవరూ ఉండరు’’.
‘‘కమల్ విజయం సాధిస్తాడా?’’
‘‘ముందు పార్టీ పెడతారో లేదో అది చూద్దాం. ఆయనకన్నా ముందు తమిళ చిరంజీవి పార్టీ చూశాం. రజనీకాంత్ ప్రకటన చూశాం. కమల్‌హాసన్ సంగతి చూద్దాం.’’ 
‘‘ మరేమంటావు ?’’
‘‘ఏమీ అనను వ్యవసాయానికి 24 గంటలు విద్యుత్ ఇస్తే ప్రపంచానికి అణుయుద్ధ ప్రమాదం ..వాణీ విశ్వ నాథ్ రాజకీయ ప్రవేశం తో ప్రపంచ శాంతి సాధ్యం అనిపిస్తోంది ప్రచారం చూస్తుంటే ’’
బుద్దా మురళి (10. 11. 2017 జనాంతికం )

3, నవంబర్ 2017, శుక్రవారం

షట్ముఖకోణ పవిత్ర ప్రేమ-విలువలు

‘‘డాక్టర్ మావాడి జబ్బుకు చికిత్స లేదంటారా?’’
‘‘వైద్య శాస్త్రంలోనే ఇదో అంతు చిక్కని లక్షణం’’
‘‘డాక్టర్ బ్లాక్ అండ్ వైట్‌లో అక్కినేని తొలి సినిమా నుంచి నిన్న మొన్న అల్లరి నరేష్ కామెడీ పారడీల వరకు ఎన్నో సినిమాల్లో డాక్టర్లు అచ్చం మీలానే అంతు చిక్కని జబ్బు అని చెప్పిన తరువాత కూడా సినిమా ముగింపులో జబ్బు నయమైంది డాక్టర్. అలానే మా పిల్లాడి జబ్బు కూడా నయం అవుతుందా? డాక్టర్’’
‘‘మాటకు ముందోసారి వెనకోసారి డాక్టర్ అంటూ అలా గుర్తు చేయక నాకు కొంచెం మతిమరుపు మరచిపోకుండా వుండేందుకే తెల్లకోటు, మెడలో స్టెతస్కోపుతో వస్తాను .’’
‘‘మా అబ్బాయి వింత జబ్బు గురించి వస్తే మీ జబ్బు గురించి చెబుతున్నారు డాక్టర్, ఇంతకూ ఇదేం జబ్బు డాక్టర్’’
‘‘ఏది మీదా? నాదా? మీ అబ్బాయిదా?’’
‘‘మీకే జబ్బయితే నాకేంటి డాక్టర్. నా సమస్య మా అబ్బాయి జబ్బు’’
‘‘అది జబ్బని ఎవరు తేల్చారు? అది జబ్బంటే, పేరేంటి అంటావ్? కాస్త ఆలోచించుకోనివ్వు. వైద్య శాస్త్రానికే పరీక్ష పెట్టావు.’’
‘‘అంటే మీరు చికిత్స చేయలేరా?? డాక్టర్’’
‘‘నేనే కాదు. కె.ఎ.పాల్ తలుచుకున్నా చికిత్స చేయలేడు. ముందు జబ్బో కాదో తెలుసుకోవాలి. జబ్బయితే పేరు తెలుసుకుని చికిత్స మొదలుపెట్టొచ్చు.’’
‘‘ఎంత ఖర్చయినా ఫరవాలేదు డాక్టర్ విదేశాలకైనా ఓకె.’’
‘‘అంత డబ్బుందా?’’
‘‘ఆరోగ్యశ్రీ కార్డుంది’’
‘‘మా ఆస్పత్రిలో వున్న మిషన్లు అన్నింటికి పని చెబుతూ పరీక్షలు చేయించినా మీవాడి జబ్బేమిటో తెలియడంలేదు. అసలేం జరిగిందో? మీవాడిలో ఈ  తేడా వుందని నీకు ఎప్పుడు అనిపించిందో మొదటి నుంచి చెప్పుకుంటూ రా .’’
‘‘సరే డాక్టర్ సినిమాలో అవేవో రింగులు రింగులు కనిపిస్తాయి కదా? కనిపిస్తున్నాయా డాక్టర్?’’
‘‘ఎందుకు?’’
‘ప్లాష్ బ్యాక్ చెప్పా లంటే ముందు రింగులు కనిపించాలి డాక్టర్. అవి కనిపించకపోతే మిమ్ములను ఫ్లాష్ బ్యాక్‌లోకి ఎలా తీసుకెళతాను.’’
‘‘ముందు ఏం జరిగిందో చెప్పు. సీన్ సరిపోదు అనుకుంటే రైటరే మనకు ఫ్లాష్ బ్యాక్‌లోకి తీసుకెళతాడు.’’
‘‘సాయంత్రం ఆఫీసు నుంచి రాగానే ఎప్పటిలానే టీ తాగి న్యూస్ చానల్ ఆన్ చేసాను. అబ్బాయి వచ్చి టివి ముందుకూర్చున్నాడు. అదేదో జపానో, చైనానో కార్పొరేట్ విద్యా వ్యాపారుల గొడవ. డైరెక్టర్ అట ఆవిడెవరో విద్యా వ్యాపారంలో విలువలు ముఖ్యం అని చెబుతోంది.’’
‘‘ఒత్తిడి తట్టుకోలేక విద్యార్థులు ఆత్మహత్యలు చేసుకుంటున్నారని వార్తలు వచ్చాయి. ఆ వ్యాపారులేనా?’’
‘‘ఔను డాక్టర్ వాళ్లే. విలువల కోసం వాళ్లెంతకైనా తెగిస్తారట! ర్యాంక్ వస్తుందని తెలిస్తే హైస్కూల్లో వుండగానే కనే్నసి విద్యార్థులను ఎలా లాగేసుకొచ్చేది కళ్లకు కట్టినట్లు చెప్పారు. ఈ వ్యాపారంలో వున్న అందరూ చేసేది ఇదే అంటూ వ్యాపార మెళకువలు అన్నీ చెప్పేసారు. కిడ్నాప్‌లు, ర్యాంకులు కొనడాలు ఒక పద్ధతి ప్రకారం విలువలకు కట్టుబడి విద్యా వ్యాపారం విలువలు పెంచుతున్నట్లు చక్కగా చెప్పింది. ప్రత్యర్థి గ్యాంగ్ అదే ప్రత్యర్థి వ్యాపారి కూడా విలువల విషయంలో తాము ఇతరులతో చెప్పించుకునే స్థితిలో లేమని, విలువల కోసం ప్రాణాలు తీయడానికైనా సిద్ధం అని ప్రకటించారు.’’
‘‘అది సరే, పిల్లలు ఇలా ఎందుకు చనిపోతున్నారు? చదువు చెప్పమంటే ప్రాణాలు తీస్తారా? దానికేమన్నారు?’’
‘‘ఆ విషయం విలువల మానవతా మూర్తులను ఎవరూ అడగలేదండి’’
‘‘అన్యాయం కదూ! అంత సీరియస్ విషయం కనిపిస్తుంటే విద్యావ్యాపారులు ఎదురుగా వున్నా ఎందుకు అడగరు?’’
‘‘ఇది కూడా విలువల్లో భాగమే డాక్టర్. అంతా ప్యాకేజీనే. విద్యా వ్యాపారులు విలువల గురించి తాము మాట్లాడాలనుకున్నది మాట్లాడి వీడియో తీసి పంపిస్తే టీవీలో ప్రసారం చేయాలి. ఇది విలువల ప్యాకేజీలో భాగం. విలువలకు కట్టుబడకుండా ప్రశ్నించాలని ప్రయత్నిస్తే- 1,1,2,2,3,3 అనే ప్రకటనలో వారి చానల్‌లో రావు డాక్టర్. ఇవి కూడా మహోన్నత విలువల ప్రమాణాల్లో భాగమే’’
‘‘
మొన్న ఐపిఎస్ అధికారి కాపీ కొడుతూ పట్టుబడింది -జీవితంలో విలువలకు*  ప్రాధాన్యత చెప్పే ‘‘ఎథిక్’’ పేపర్‌లోనే. జీవితంలో విలువల కోసం ఎంతకైనా తెగిస్తారు కొందరు ...సర్లే వాళ్ల వ్యాపారం గోల మనకెందుకు. నువ్వు చెప్పు.’’
‘‘టీవీలో ఇరువర్గాల విద్యా వ్యాపారులు విలువల గురించి హావభావాలతో వివరిస్తున్నప్పుడు ఎందుకో అనుకోకుండా మా అబ్బాయి ముఖంలో చూసాను. రంగులు మారినట్టు, పిచ్చిగా చూసినట్టు అనిపించింది. అప్పుడు పట్టించుకోలేదు. కానీ నేనే వినలేక చానల్ మార్చాక మామూలుగానే కనిపించాడు. మరోసారి న్యూస్ చానల్‌లో ఒకామె ఓ ప్రజాప్రతినిధిని వలచిన కథ చెబుతోంది.’’
‘‘పెళ్లి చేసుకుంటాను అని ప్రేమించి మోసం చేసాడా?’’
‘‘డాక్టర్‌గారు ఆమె -ప్రేమ అనగానే మీలోనూ ఎక్కడలేని ఉత్సాహం మొదలైంది. ఇదేమి  స్కూల్ ప్రేమ కాదు. ఇంజనీరింగ్ కాలేజీ ప్రేమ కథ కాదు. కృష్ణా రామా అనుకుంటూ వానప్రస్థాశ్రమంలో గడపాల్సిన వయసులో ఓ చిన్నోడు, చిన్నది కనిపించని మూడవ సింహం’’
‘‘ప్రేమ కథనా?’’
‘‘కాదు కామ కథ’’
‘‘ముగ్గురి త్రికోణ ప్రేమ కథనా?’’
‘‘కాదు మూడు జంటలు, ఆరుగురి వ్యూహ కథ- షట్ముఖ కోణ- పవిత్ర ప్రేమకథ’’.
‘‘ఈ ప్రేమ కథలో ఎవరి వ్యూహంతో వాళ్లున్నారు. తొలిమాట, తొలి చూపు నుంచి ప్రతిది రికార్డు చేసి పెట్టుకున్నారు.’’
‘‘ప్రేమించుకున్నారు అంటున్నావు. నువ్వు చెప్పింది చూస్తే ఆధారాలు సేకరించి పెట్టుకున్నట్టుగా వుంది కానీ ప్రేమ కథలా లేదు.’’
‘‘అన్ని ప్రేమ కథలు బాలచందర్ ప్రేమ కథల్లానే వుండవు. ప్రేమ కథల లేటెస్ట్ ట్రెండ్ ఇదే. డాక్టర్ గారూ మీ మంచి కోరే చెబుతున్నాను. డాక్టర్‌గా నాలుగు చేతులా బాగానే సంపాదిస్తున్నారు. అంతమాత్రాన మీరేమి మహేష్‌బాబు కాదు. పవన్‌కళ్యాణ్ కాదు ఎవరైనా మనసు పడ్డారు అనుకుంటే.. ఇదిగో ఇలానే టీవీలో పడతారు జాగ్రత్త’’
‘‘నా సంగతెందుకు ముందు  కేసు గురించి చెప్పు’’
‘‘టీవీలో ఈ పవిత్ర ప్రేమికులు మాట్లాడుతున్నది మావాడు విన్నాడు. మా మధ్య సన్నిహితత్వం వుంది. ఇది సామాజిక బాధ్యత. మనుషులకు విలువలు ముఖ్యం. మనం పవిత్రమైన ప్రజాస్వామ్య వ్యవస్థలో వున్నాం. నాతోనే వుంటాను. మూడవ సింహం వద్దకు వెళ్లను అని ఒట్టేసి చెప్పమంటే చెప్పడంలేదు. విలువల కోసం పరితపించే మాలాంటి వారు ఇది ఎలా సహిస్తారు. ఇందుకేనా రాష్ట్ర విభజన జరిగింది? ఇందుకేనా ఈ దేశానికి స్వాతంత్య్రం వచ్చింది. ఇదేనా గాంధీ పుట్టిన దేశానికి అర్థం. ఇలా అయితే భారతీయ విలువలపై విదేశీయులు ఏమనుకుంటారు.’’
‘‘ఆపవయ్యా! బాబు నీ విలువల ఉపన్యాసం వింటుంటే విలువలమీదే చిరాకేస్తుంది.’’
‘‘ఇదిగో ఇలానే డాక్టర్ ఆ వీడియోలో మాటలు, వాళ్లు టీవీల ముందు ఉపన్యాసం, ఈ వార్తలు ఒక వైపు ఈ దాడి సరిపోదు అన్నట్టు ఆ వృద్ధ ప్రేమికుడు  
 విలువలకు కట్టుబడిన మా కంపెనీపై ఎవరో కుట్ర పన్ని ఇలా చేసారు. ఎంత డబ్బయినా ఖర్చుచేసి ఎవరినైనా తప్పించి కాంట్రాక్టులు సంపాదించేప్పుడు మేం విలువలకు ప్రాధాన్యత ఇస్తాం అంటూ  మాట్లాడడం విన్నాక, మా అబ్బాయిని పరీక్షగా చూస్తే పిచ్చి చూపులు చూస్తూ అయోమయంగా టీవీ చూస్తూ కనిపించాడు. భయం వేసింది. ఇంగ్లీష్ హారర్ సినిమాలను చూస్తూ పెరిగినవాడు అలా భయపడగా ఎప్పుడూ చూడలేదు. వాడి దృష్టిలో తెలుగులో వచ్చే దయ్యం సినిమాలో కామిక్ కథల్లాంటివి. ఇంగ్లీష్ దయ్యం సినిమాలనే బఠానీలు తిన్నంత ఈజీగా చూస్తాడు. అలాంటి వాడి ముఖంలో భయం చూసి ఆశ్చర్యం వేసి చానల్ మార్చాను. మరో న్యూస్ చానల్‌లో రాజకీయాల్లో విలువలు ముఖ్యం అని ఒకాయన ఉపన్యాసం వరుసగా చానల్స్ మారుస్తుంటే అన్ని చానల్స్‌లో ఇలానే విలువలతో కూడిన జీవితంపై మాట్లాడుతున్నారు. కొద్దిసేపు వదిలేస్తే స్పృహ తప్పి పోతాడేమో అనిపించింది. మావాడిని మీరే రక్షించాలి డాక్టర్.’’
‘‘సరే మా తమ్ముడి డయాగ్నస్టిక్ సెంటర్‌లో ఈ పరీక్షలు చేసుకొని వెళ్లు. అలానే వెళ్లేప్పుడు మా బామర్ది షాప్‌లో ప్రెస్టిజ్ ప్రెషర్ కుక్కర్ కొనుక్కుని వెళ్లు. వాటి రసీదులు చూపించు. ఏం చేయాలో చెబుతా’’.
‘‘పరీక్షలు ఓ.కె. ప్రెస్టిజ్ ప్రెషర్ కుక్కర్ ఎందుకు డాక్టర్?’’
‘‘రోగులు మరీ తెలివిమీరి పోతున్నారు.డాక్టర్ ను నే నా ? నువ్వా ? ఏది ఎందుకో నా కన్నా నీకు ఎక్కువ తెలుసా ?  అన్నీ చెప్పాలా? తమ్ముడికి వ్యాపారం చూపించినప్పుడు బామర్ది షాప్‌కు వ్యాపారం చూపకపోతే ఇంట్లో భార్య ఊరుకుంటుందా? శ్రీమతిని ప్రేమించేవారు బామ్మర్ది షాప్‌లో ప్రెస్టిజ్ కుక్కర్ ఎలా కాదంటారు. అదే కార్పొరేట్ ఆస్పత్రిలో తల నొప్పికి లక్ష బిల్లు చేస్తారు. నేను డయాగ్నస్టిక్ సెంటర్‌కు, కుక్కర్‌కు కలిపి పదిహేనువేల బిల్లు చేస్తే లక్ష ప్రశ్నలు. ప్రజల్లో విలువలకు విలువే లేకుండా పోతుంది.’’
* * *
‘‘ఇదిగో డాక్టర్ కుక్కర్ బిల్లు, పరీక్ష చేయించాను. రిపోర్టు చూస్తారా?’’
‘‘అవసరం లేదు. వాడి బొంద వాడికేం తెలుసు. డబ్బులున్నాయని తమ్ముడు  మిషన్లు కొన్నాడు. రోగులున్నారని నేను పంపిస్తున్నాను. అందులో ఏమీ లేదు. కంగ్రాట్స్ మీ అబ్బాయి పేరు వైద్య చరిత్రలో నిలిచిపోతుంది.’’
‘‘ఎలా?’’
‘‘మానసిక, శారీరక, భౌతిక, సాంఘిక, సామాన్య, మ్యాథ్స్,బికాం లో  ఫిజిక్స్, కెమిస్ట్రీ అన్ని సబ్జెక్టుల రోగాలు కలిసి పుట్టిన కొత్త రోగం మీవాడికి వచ్చింది. రోగం పెద్దదేకానీ చికిత్స సులభమే.’’
‘‘చెప్పండి డాక్టర్... అలా సస్పెన్స్‌లో ముంచకండి. కుక్కర్‌తోపాటు మీ తమ్ముడి షాప్‌లో రోటి పచ్చడి కోసం రెండువేలు పెట్టి రోలు కొనమన్నా కొంటాను..’’
‘‘ఇదోరకం ఫోబియా! విలువలు పాటించకుండా విలువల గురించి ఎవరైనా ఎక్కువగా మాట్లాడుతుంటే పొరపాటున విన్నా మీవాడు పిచ్చిపిచ్చిగా చేస్తాడు. ఇలాంటి విలువల గాలి సోకకుండా మీవాణ్ణి కంటికి రెప్పలా కాపాడుకోవాలి.’’
‘‘దీనికి చికిత్స లేదా? డాక్టర్’’
‘‘లేదు. నివారణ ఒక్కటే మార్గం. సోమాలియాలో ఆకలికి ఏదో ఒకరోజు పరిష్కారం లభిస్తుంది. ఆఫ్గానిస్తాన్‌లో తీవ్రవాదులు ఏదో ఒకరోజు బుద్ధం శరణం గచ్ఛామి అనొచ్చు. ఏమైనా జరగవచ్చు. గుర్రం ఎగరావచ్చు కానీ విలువల ధ్వంసానికి పాల్పడేవారు విలువల గురించి ఎక్కువగా మాట్లాడడం ఆపరు. ఆపలేం. మీ అబ్బాయి వాటికి దూరంగా వుండడమే నివారణ మార్గం. జాగ్రత్త ఇది అంటువ్యాధి. ‘షట్ముఖ కోణ పవిత్ర ప్రేమకథ’ రాసినవారు, విన్నవారు, చదివినవారు విలువల వ్యాధి బారిన పడకుందురుగాక.’’

బుద్దామురళి (జనాంతికం 3-11-2017)

31, అక్టోబర్ 2017, మంగళవారం

సమాచార హక్కు చట్టం 2005 తెలుగు pdf

2005 లో వచ్చిన సమాచార హక్కు చట్టము pdf  ఇంగ్లీష్ లోనే కాకుండా  గుర్తింపు పొందిన భారతీయ భాషలు అన్నింటిలోనూ అందుబాటులో ఉంది .. ఆసక్తి ఉన్న వారి కోసం సమాచార హక్కు చట్టం 2005 తెలుగు pdf 
http://rti.gov.in/RTIACT_Telgu.pdf

30, అక్టోబర్ 2017, సోమవారం

చట్టం అందరికీ చుట్టమే

RTI 1 


చట్టం కొందరికి చుట్టం అంటుంటారు  .. కానీ చట్టం తన గురించి తెలిసిన అందరికీ చుట్టమే .. తెలియని బంధువుల దగ్గరకు వెళ్ళనట్టుగానే చట్టం గురించి తెలియక పోవడం వల్ల చాలా మంది దాన్ని దూరం పెడుతున్నారు కానీ చట్టం అందరికీ చుట్టమే ... చట్టం గురించి మనం తెలుసు కొక పోతే చట్టం నుంచి మనం ప్రయోజనం ఎలా పొందగలం ... 
 సామాన్యుడి చేతికి అత్యంత శక్తి వంతమైన ఆయుధం అందించిన సమాచార హక్కు చట్టం2005 గురించి 12 ఏళ్ళ తరువాత కూడా ప్రజలు - పఅధికారులకు అవగాహన కొత్త తక్కువగానే ఉంది ... ఈ చట్టం ను ఉపయోగించుకొని ప్రభుత్వ కార్యాలయాల నుంచి సమాచారం పొందడం గురించి .. చట్టం ప్రయోజనాల గురించి సులభమైన తెలుగులో రోజుకో పాయింట్ చెప్పాలని ఓ ప్రయత్నం 
సమాచార హక్కు చట్టం పై సామాన్యులకు అవగాహన కలిగించడానికి ..సామాజిక మాధ్యమాలను ఉపయోగించుకోవాలని ఓ చిరు ప్రయత్నం 
ఓటు హక్కు తరువాత అంత శక్తి వంతమైంది సమాచార హక్కు 

సమాచారం తమ సంపద దానిని ఇతరులకు ఇవ్వడం ఏమిటి అనే భావన కొంత మందిలో ఇంకా ఉంది ... మీరు ప్రభుత్వ ఉద్యోగిగా ఎన్నికల విధులు నిర్వహించేప్పుడు 18 ఏళ్ళ వాళ్ళు ఓటు వేయడానికి వస్తే వద్దు అని చెప్పి పంపిస్తారా ? 
పంపించరు ... మరి సమాచార హక్కు కింద తమ గ్రామానికో జిల్లాకో మంచి జరిగే సమాచారం అడిగితే నిరాకరించడం ఎందుకు ? 
 18 ఏళ్లకు ఓటు హక్కు లభిస్తుంది 
ఈ దేశాన్ని ఎవరు పాలించాలి రాష్ట్రాన్ని ఎవరు పాలించాలి 
అని నిర్ణయించే హక్కు  18 ఏళ్ళు నిండిన అందరికీ ఉంటుంది . దేశ భవిష్యత్తుకి నిర్ణయించే ఓటు వేసేప్పుడు ఎలా వద్దు అనడం లేదో సమాచారం అడిగినప్పుడు కూడా అలానే ఇద్దాం ... 
దరఖాస్తు నమూనా 
సమాచార హక్కు చట్టం ఉపయోగించుకోవడానికి ప్రత్యేక దరఖాస్తు పారం అంటూ ఏమీ లేదు 
తెల్ల కాగితం మీద సమాచార అధికారికి మీరు కోరుతున్న సమాచారం గురించి రాసి .. మీ అడ్రెస్ రాస్తే చాలు .. ఆ సమాచారం ఎందుకోసం అనే కారణం చెప్పాల్సిన అవసరం లేదు ... 
గ్రామా స్థాయిలో ఉచితంగా .. మండల స్థాయిలో 5 రూపాయలు జిల్లా రాష్ట్ర స్థాయిలో అయితే పది రూపాయలు చెల్లించాలి ..పోస్టల్ ఆర్డర్ , కోర్ట్ ఫీజు స్టాంప్ , డిడి లేదా నగదు రూపం లో చెల్లించి సమాచార హక్కు చట్టం సెక్షన్ 6 కింద సమాచారం కోసం దరఖాస్తు చేయాలి .... 
బుద్ధా మురళి 

27, అక్టోబర్ 2017, శుక్రవారం

విఖ్యాత నటుడు..@95 జీవిత కథలు

‘‘హలో వర్మగారేనా?’’
‘‘ఔను భాబు నేను వర్మనే. నీ కోసమే ఎదురు చూస్తున్నాను. చెప్పు ఏంటి విషయం?’’
‘‘నేను ఫోన్ చేస్తాను అని మీకెలా తెలుసు సార్! ఆశ్చర్యంగా ఉంది.’’
‘‘హలో అంతగా ఆశ్చర్యపోకు నీ గురించే అంటే, నీ గురించే అని కాదు. ఎవరో ఒకరు ఫోన్ చేస్తే మాట్లాడదామని, రోజూ ఓ ఐదారుగురితో తిక్క తిక్కగా మాట్లాడందే నిద్ర రాదు. ఇప్పుడు నువ్వు దొరికావ్ ఏ చానల్?’’
‘‘నేను చానల్ రిపోర్టర్‌ని కాను.’’
‘‘అలాగా నా స్టేట్‌మెంట్స్‌తో ఓరోజు వార్తలు లాగించేయవచ్చు అని వరసగా ఒకదాని తరువాత ఒక చానల్ వెంట పడుతున్నాయి. నువ్వు అదే అనుకున్నాను. ఇంతకూ నువ్వే బకరావు బాబు.’’
‘‘నేను ఫ్యాన్‌ను. విశ్వవిఖ్యాత నటునిపై సినిమా తీస్తానని ప్రకటించారు కదా! కథ నేను చెబుతాను. సినిమా మీరు తీయాలి.’’
‘‘అంతకన్నా అదృష్టమా! కథ చెప్పు.’’
‘‘విశ్వవిఖ్యాత నటుడు పుట్టగానే అందరిలా కేర్‌మనలేదు.’’
‘‘మరేం చేశాడు? ఏడిపించాడా?’’
‘‘ఇలా మధ్యలో అడ్డుకోకండి సార్. అతను పుట్టగానే మేఘాలు వర్షించాయి. ఆకాశంలో దేవతలు రెండువైపులా మెట్రో రైలులో నిలబడ్డట్టు వరసగా నిలబడి బిందెలతో పూలవర్షం కురిపించారు’’
‘‘అదేదో సినిమాలో శ్రీరాముని పట్ట్భాషేకం సమయంలో దేవతలు పూలవర్షం కురిపించినట్టు కదా?’’
‘‘ఔనుసార్ అంతే అచ్చం అలాంటి సీన్ రిపీట్ చేస్తే చాలు.’’
‘‘ ఓపెనింగ్ అదిరిపోయింది. నీ కథ ఓకె. అద్భుతమైన కథ ఇలా నువ్వు ఫోన్‌లో చెబితే ఎవరైనా కాపీ కొట్టే ప్రమాదం ఉంది. మొత్తం కథ రాసి తీసుకురా! నువ్వేం చేయాలో నేను చెబుతాను. అద్భుతమైన భారీ బడ్జెట్ సినిమా తీద్దాం.’’
‘‘సార్ మీరు దేవుడు సార్. మీకు చాలా తిక్కుందని ఏమేమో అంటారు కానీ మీరింత మంచి వారని అస్సలు ఊహించలేదు సార్.’’
‘‘నాకు దేవుడిపై నమ్మకం లేదంటే ననే్న దేవుడ్ని చేశావ్! తిట్లు తప్ప పొగడ్తలు నాకు ఇష్టం ఉండదు. ఓకే. నీకో డేట్ ఇస్తా. ఆరోజు నేను చెప్పిన చోటుకు వచ్చేయ్.’’
‘‘. దేవుడిలాంటి మిమ్మలను అపార్ధం చేసుకున్నాను. ఉంటాను సార్. మీ కాల్ కోసం ఎదురు చూస్తుంటాను.’’
‘‘ట్రింగ్ ...ట్రింగ్...’’
‘‘ఏంటోఈ రోజు ఒకరి తరువాత ఒకరు..హలో ఎవరూ?’’
‘‘వర్మా నేనయ్యా! విఖ్యాత నటునిపై నా పేరుతో సినిమా తీస్తున్నావట కదా! సంతోషం. ఆయన హీరో అయితే ఆయన పక్కన పాత్ర నాదే కదా! అల్లుడు మోసం చేశాడు. ద్రోహం చేశాడు. నిలువునా ముంచాడు. జీవిత కథ కోసం మొత్తం కథ నాదగ్గరుంది. కథ నాది అంటే నా కథ అని కాదు. ఆయన గురించి నేను రాసిన కథ. స్క్రిప్ట్ నువ్వు రాయి. నీకు ఆశ్చర్యంగా వుండొచ్చు నేను డైరెక్షన్ కూడా చేస్తాను. నువ్వు ఓకే అంటే సూపర్ హిట్ సినిమా అవుతుంది. ఏమంటావయ్యా!’’
‘‘వదిన గారు మీ అభిమానానికి థాంక్స్. మరీ మీ స్థాయి భారీ బడ్జెట్‌కి సినిమా కాదు. ఏదో నా స్థాయిలో..’’
‘‘అలా అంటావేం. సూపర్‌హిట్ గ్యారంటీ?’’
‘‘అదే నా భయం. వరసగా అట్టర్ ఫ్లాప్ సినిమాల వ్రతం చేస్తున్నాను. మధ్యలో సూపర్ హిట్ అయితే నన్ను తిట్టుకునేవారు ఎవరూ ఉండరు. తిట్టుకునే వారు లేకపోతే నేను కాను. నా మానాన నన్ను ఇలా వదిలేయండి వదినగారు.’’
‘‘అది కాదు. ముందు నేను రాసిన కథ చదివి అప్పుడు చెప్పు నీ అభిప్రాయం సరేనా?’’
‘‘సరే నేను చెప్పినప్పుడు కథ తీసుకురండి.’’
‘‘హలో డైరక్టర్...ఏం మా సార్ నీమీద చాలా కోపంగా ఉండు. ఏం చేసినవ్’’
‘‘నువ్వెవరు? మీ సార్ ఎవరు? ఎవరిమీద కోపం? ఎందుకు కోపం. నువ్వెవరో కానీ నాకు భలే నచ్చేశావు బాబు. తలా తోకా లేకుండా ఇలా అడ్డదిడ్డంగా మాట్లాడే వాళ్లంటే నాకు చాలా ఇష్టం. అన్నంలోకి ఆవకాయ ఎంత అవసరమో! నీలాంటి వాళ్లు నాకంత అవసరం. విజయవాడలో చదువుకునేప్పుడు ప్రభాకర్ అని ఫ్రెండ్ ఉండేవాడు. అచ్చం నీలానే. పరీక్షలో నువ్వడిగిన ప్రశ్నలకు నేనెందుకు ఆన్సర్ రాయాలి అని వాడే ప్రశ్నలు వేసుకుని ఆన్సర్స్ రాసేవాడు. వాడి ప్రభావం నాపై బాగా పడింది. అందుకే ఎవరేమడిగినా తలతిక్కగా సమాధానం చెబుతాను. అతనా? అతనిప్పుడు ఏదో రైల్వే స్టేషన్‌లో ప్రయాణీకుల ప్రశ్నలకు సంబంధం లేని సమాధానాలు చెబుతుంటాడు అని విన్నాను. ఇంతకూ నువ్వెవరు బాబు.’’
‘‘అన్నా! నెల్లూరు పెద్దారెడ్డి ఎడమ భుజం. గొంతు కూడా గుర్తుపట్టనంత పెద్దోడివైపోయావ్?’’
‘‘ఏయ్ బ్రహ్మానందం నువ్వా? అబ్బ ఎంత కాలమైంది నీ గొంతువిని. క్షణక్షణంలో నీ నటన గుర్తుకొస్తే ఇప్పటికీ నవ్వొస్తుంది. నెల్లూరు పెద్దారెడ్డి పాత్రలోనైతే జీవించేశావ్ పో.’’
‘‘నెల్లూరు పెద్దారెడ్డి ఎడమ భుజాన్ని అంటే బ్రహ్మనందం అంటావేం? మళ్లీ చెబుతున్నాను. నే బ్రహ్మానందాన్ని కాదు. నెల్లూరు పెద్దారెడ్డి ఎడమ భుజాన్ని.’’
‘‘కుడి భుజం అని చెప్పుకుంటారు కానీ నువ్వు మరీ తలతిక్కగా ఉన్నావ్! ఎడమ భుజం ఏంటోయ్?’’
‘‘రాజకీయాల్లో ప్రతోడు ప్రముఖ నాయకులకు కుడి భుజాన్ని అని చెప్పుకుంటున్నారు. స్పెషల్‌గా వుండాలని నేను అన్నకు ఎడమ భుజం అని చెప్పుకుంటాను. ఆ మాటలకేంది కానీ అన్న నీ సంగతి చూడమని చెప్పాడు. విఖ్యాత నటునిపై సినిమా తీస్తున్నావట కదా! మంచిది అయితే కథఅన్న  రాస్తాడు ఈ మాట చెప్పమన్నాడు. నా సినిమా నా ఇష్టం అంటే కుదరదు, అన్న ఇచ్చిన కథతోనే సినిమా తీయాలి. ఇది ఫైనల్.’’
‘‘అంతకన్నా అదృష్టమా. మీ అన్న కథ కూడా రాస్తాడా?’’
‘‘అంత సీన్ లేదన్నా. ఏదో మన మధ్య ఫ్రెండ్షిప్ కుదిరింది కాబట్టి చెబుతున్నాను. అన్న కథ లైన్ చెప్పాడు.నేను రాస్తున్నాను.’’
‘‘ఎదీ ఆ లైన్ చెప్పు.’’
‘‘దేవుడి లాంటి అన్నయ్య. తమ్ముళ్లకు అన్నయ్య అంటే దైవంతో సమానం. ఎదురు పడితే చాలు కాళ్లమీద పడిపోతారు. ఆయన పాపులారిటీ చూసి దేవుళ్లు కుళ్లుకొని అంతం చేయడానికి కుట్ర పన్నుతారు. ఇది తెలిసి తమ్ముళ్లు, అల్లుళ్లు, సమస్త బంధు జనం అన్నయ్యను కుర్చీనుంచి దించి, చీకటి గృహంలో బంధించి దేవుళ్ల బారిన పడకుండా రక్షించి అన్నయ్యను పైకి పంపి, విగ్రహాన్ని కృష్ణా నదిలో ప్రతిష్ఠించి ఘనంగా పూజలు నిర్వహిస్తారు. ఇది లైన్. దీనికి నేను మసాలా దట్టించి డవలప్ చేస్తాను. మీరు సినిమా తీయాలి. ఇది నెల్లూరు పెద్దారెడ్డి ఆదేశం.’’
‘‘కమలాకర కామేశ్వరరావుకు సరిపోయే కథలా ఉంది. నేను క్రైం, దయ్యం స్టోరీల్లోనే వీక్. పౌరాణిక సినిమాలు నాతోకావు. నేను అనేక మలుపులు తిరిగిన ఒక నటుని జీవితంలోని కొన్ని సంఘటనల ఆధారంగా సినిమా తీయాలనుకుంటున్నాను. నువ్వేమో దేవుళ్ల కథ చెబుతున్నావు.’’
‘‘అన్నా నేను దేవుడిలాంటి మనిషి కథ చెప్పాను. నువ్వు ముందు కథ చదువు. నచ్చకపోతే అప్పుడు చెప్పు.’’
‘‘సరే నేను చెప్పిన రోజు కథ తీసుకురా!’’
‘‘ట్రింగ్..ట్రింగ్..ట్రింగ్..’’
‘‘ఇదిగో పి.ఎ ఈ ఫోన్ కాల్స్ బాధ భరించలేకపోతున్నాను. విఖ్యాత నటుని సినిమా కథ ఇచ్చేవారైతే నేను చెప్పిన తేదీన వచ్చేయమని నేను చెప్పానని చెప్పు.’’
* * * *
సార్ ఈయనెవరో తలా తోకా లేకుండా మాట్లాడుతున్నాడు. మధ్యలో శబ్దాలు మాత్రమే వస్తున్నాయి. ఎవరినో కొడుతున్నట్టుగా ఉంది. ఓసారి అన్న అంటాడు. నాన్న అంటాడు. క్లారిటీ లేదు. అంతా కన్‌ఫ్యూజన్‌గా ఉంది. దబిడి దబిడే అన్న ఒక్క మాట మాత్రం స్పష్టంగా మాట్లాడుతున్నాడు. చిన్న పిల్లాడో పెద్దాయనో అర్ధం కావడంలేదు.’’
‘‘నాకు అర్ధమైందిలే. మనం తీసే సినిమాకు తాను కథ ఇస్తాడట! సరే చెప్పినప్పుడు రమ్మను.’’
‘‘సార్ వీళ్లు కాదు అవేవో పార్టీల నాయకులకు మా పార్టీ వారిచ్చిన కథతోనే సినిమా తీయాలి. లేదంటే లేపేస్తాం అని హెచ్చరిస్తున్నారు.’’
‘‘ఇంతోటి దానికి బెదిరింపులు ఎందుకు. వాళ్లిచ్చే కథ మనం వద్దంటే కదా! భయపడకు నేను చెప్పిన తేదీకి రమ్మను.’’
* * * *
‘‘అర్చన విఖ్యాత నటునిపై సినిమా తీస్తానని ప్రకటించిన వర్మపై రోజురోజుకు వత్తిడి పెరిగిపోతోంది. అధికార పక్షం, విపక్షం, మూసేసిన పార్టీలు, మూయబోయే పార్టీలు, పుట్టబోయే పార్టీల నాయకులు పెద్దఎత్తున ఒత్తిడి తెచ్చి తామిచ్చిన కథతోనే సినిమా తీయాలని వర్మపై వత్తిడి తెస్తున్నారు. దాంతో వర్మ సినిమా నిర్ణయాన్ని ర ద్దు చేసుకోవాలని నిర్ణయించుకున్నట్టు విశ్వసనీయ వర్గాల సమాచారం. మరికొద్దిసేపట్లో వర్మ నిర్ణయం ప్రకటిస్తారు. తొలిసారిగా వర్మ తోక ముడిచిన వార్త మనమే బ్రేక్ చేశాం అర్చన..ఇపుడు వర్మ మాటలను లైవ్‌గా చూద్దాం.’’
* * *
‘‘మీ అందరికీ స్వాగతం. సంచలనం లేనిదే నేను లేను. విఖ్యాత నటుని బయోపిక్ ప్రకటనకు నేను ఊహించని స్పందన వచ్చింది. ఈ స్పందన చూశాక ఒకే సినిమాతో ముగించకుండా సీక్వెల్‌గా తీయాలనుకుంటున్నాను.’’
‘‘విఖ్యాత నటుని బయోపిక్ వన్, టు, త్రీనా? సార్.’
‘‘కాదు. ఇప్పటికి అనుకున్న దాని ప్రకారం విఖ్యాత బయోపిక్ 95’’
‘‘ఒకే కథతో 95 సినిమాలా?’’
‘‘ఇప్పటికి అనుకున్నది 95. ఇంకా పెరగవచ్చు. రోజూ విఖ్యాత నటుడు కలలోకి వచ్చి తన కథ తానే చెప్పాడు. నేను అనుకున్నట్టుగా తొలి సినిమా ఆ కథతోనే తీస్తాను. ఇప్పటివరకు ఈ సినిమాకు కథ తామే ఇస్తామని బెదిరించిన వారంతా తమ కథను, నిర్మాతను తీసుకుని వస్తే వారు ఇచ్చిన కథతో వారు చెప్పినట్టుగా సినిమా తీస్తాను. విఖ్యాత నటుని బయోపిక్ 95 వరకు కథలు సిద్ధంగా వున్నవారు, నిర్మాతలను తీసుకుని వెంటనే మా ఆఫీసుకు రాగలరు. నిర్మాణ వ్యయం ఇచ్చి వెడితే సినిమా ఏర్పాట్లు చేస్తాను. ఇదిగో పి.ఏ.. అంతా వచ్చేశారా?. మరో ఆఫర్ విఖ్యాత నటుని సినిమా కు కథ చెబుతాము అని ముందుకు వచ్చిన వారు తమ ఆత్మ కథలను సినిమా గా తీయమన్నా నేను రెడీ వాళ్ళు నిర్మాతలను తెచ్చుకోవాలి అంతే ’
‘‘ఇప్పటివరకు కథలను పట్టుకొని ఇక్కడే వున్నవారు ఎలా మాయం అయ్యారో తెలియడంలేదు సారు. వారికి ఫోను చేసి పిలుస్తాను.’’
‘‘వారి ఫోన్లు కూడా పనిచేయవు. వర్మనా మజాకానా? ఒరేయ్ ఎవరితోనైనా పెట్టుకోండి. వర్మతో వద్దు.’’
buddhamurali2464@gmail.com

13, అక్టోబర్ 2017, శుక్రవారం

శ్రీమతి సామాజిక స్మగ్లర్

‘‘ఆ హీరోయిన్‌ను మింగేసేట్టుగా చూడాల్సిన అవసరం లేదు’’
‘‘నేను చూస్తున్నది హీరోయిన్‌ను కాదు. హీరోను. నీ కళ్లు ఆ హీరోయిన్ కట్టుకున్న చీరపై ఉన్నాయేమో నేను కూడా అదే చూస్తున్నట్టు నీకు అనిపిస్తోంది.’’
‘‘బుకాయించకండి కళ్లు చిదంబరం ఎటు చూస్తున్నాడో కూడా చెప్పేంత చురుకైన చూపు నాది. హీరోవైపు చూస్తున్నారో, హీరోయిన్‌ను కొరికేసేట్టుగా చూస్తున్నారో ఆ మాత్రం గ్రహించలేను అనుకుంటున్నారా? అయినా అక్కడ హీరో ఎక్కడున్నాడు?’’
‘‘తాటి చెట్టంత ఎత్తున్న ఈ హీరో కూడా నీకు కనిపించడంలేదా?’’
‘‘మీరు చూస్తున్నది అమితాబచనా? హీరో అన్నారు’’
‘‘ఈ దేశంలో అమితాబ్‌ను మించిన హీరో ఎవరున్నారోయ్’’
‘‘మన తెలుగు హీరోలు 60 ఏళ్ల చిరుప్రాయంలో హీరోలుగా నటిస్తే కుళ్లు జోకులు వేసే మీలాంటి వారికి 75 ఏళ్ల అమితాబ్ మాత్రం యాంగ్రీ యంగ్‌మెన్‌గా, నవ యవ్వన హీరోగా కనిపిస్తారు.
మీకు తెలుగు వాళ్లంటే చిన్నచూపు. హాలీవుడ్‌లో పండు ముసలి హీరో జేమ్స్‌బాండ్ అంటూ పడుచు హీరోయిన్‌లతో సరసాలాడుతుంటే సినిమా అర్థంకాకపోయినా, భాష రాకపోయినా ఆహా, ఓహో అంటూ ఆకాశానికెత్తుతారు. అదే మన తెలుగు హీరోల నిజ జీవితంలో పట్టుమని పది వాక్యాలు తప్పులు లేకుండా మాట్లాడలేకపోయినా అభిమానుల కోసం ఎంతో కష్టపడి బ్రహ్మాండంగా డైలాగులు చెబితే, అంత పెద్ద వయసులోనూ వాళ్లు పడే కష్టానికి అభినందించాల్సింది పోయి, హీరో హీరోయిన్ల డాన్స్‌ను తాతయ్య, మనవరాలి సయ్యాట అని ఎగతాళి చేస్తారు. తెలుగువాడికి తెలుగువాడే శత్రువు, సాటి తెలుగువాడి ప్రతిభను గుర్తించేందుకు మనసు రాదు.’’
‘‘అబ్బా ఇక ఆపవోయ్. నీ గోల నీదే కానీ, నామాట వినవు. నేను హీరోను చూస్తున్నాను అన్నా కానీ అమితాబ్ అని చెప్పానా? దృష్టిలో హీరో అంటే సినిమా వాళ్లేనా ఇంకెవరూ ఉండరా? అయినా నా దృష్టిలో ఇప్పటికీ అమితాబ్‌ను మించిన యువ హీరోలేడు.’’
‘‘మరి అంత తన్మయంగా చూసింది సినిమా వారిని కాకుండా ఇంకెవరిని?’’
‘‘ఏం ఇంట్లో నేను హీరోను, నువ్వుహీరోయిన్‌వుకాదా? మన కుటుంబానికి మనమే హీరో హీరోయిన్‌లం కాదా?’’
‘‘చాల్లేండి బడాయి. ఇంతకూ ఏ హీరోనో చెప్పకుండా డొంక తిరుగుడుగా మాట్లాడి తప్పించుకుంటున్నారు.’’
‘‘తప్పించుకోవడానికి నేనేం తప్పు చేసాను. నాకేం భయం. నేను చూసింది రిచర్డ్ ధాలేర్ అనే ఈ హీరోను. ఈ సంవత్సరం ఆర్థిక శాస్త్రంలో నోబెల్ బహుమతి గ్రహీత.’’
‘‘సినిమాలో హీరోగా నటించాడా? ఏ సినిమా, పేరెప్పుడు వినలేదే?’’
‘‘సినిమాలో నటించాడు కానీ హీరోగా కాదులే. నోబెల్ బహుమతి గ్రహీత అంటే ప్రపంచ హీరో అన్నట్టే ఆర్థిక శాస్త్రంలో ఆయన ప్రపంచ హీరో అన్నమాట.’’
‘‘అవి నాకు అర్థం కాని విషయాలు. వదిలేయండి. అత్తా ఒకింటి కోడలే, అల్లుడూ ఒకింటి కొడుకే సీరియల్ వచ్చే టైం అయింది. వెళతాను. గతవారం అత్తకోడళ్ల మధ్య వార్, చెంప చెళ్లు మనిపించడానికి అత్తాకోడలు ఒకేసారి చేయి పైకి ఎత్తారు. సీరియల్ ఆగిపోయింది. అత్త చెంపను కోడలు చేయి ముందు వాయించిందా? కోడలు చెంపను అత్త వాయించిందా? అని ప్రేక్షకులకు ఎస్‌ఎమ్‌ఎస్ కాంటెస్ట్ నిర్వహించారు. నేను కోడలే విజయం సాధిస్తుందని ఎస్‌ఎంఎస్ పంపాను. మీ అభిప్రాయం చెప్పండి. ఎవరు విజయం సాధిస్తారు?’’
‘‘ఇలాంటి వివాదాల్లోకి నన్ను లాగి, ఇద్దరు కలిసి నా చెంప వాయించాలని చూడకండి.’’
‘‘ ఆ సీరియల్‌లో అచ్చం అత్తకొడుకు మీలానే మాట్లాడతాడు. మా ఆయన బంగారం. అవసరం అయితే చచ్చినట్టు నాకే మద్దతు ఇస్తారని నాకు తెలుసు.’’
‘‘జైలు గోడల మధ్య ఉన్న ఖైదీ జైలర్‌కు కాకుండా ఇంకెవరికి మద్దతు ఇస్తాడు. కానీ నేను ఆ హీరో ఫోటోను అంత తన్మయంగా ఎందుకు చూశానో చెబితే మళ్లీ అంటావు మా ఆయన బంగారం అని.’’
‘‘తప్పెవరిదైనా క్షమాపణ కోరే భర్త అన్నా అనకపోయినా బంగారమే కానీ విషయం ఏంటో చెప్పండి.’’
‘‘మానసిక శాస్త్రం, ఆర్థిక శాస్త్రాన్ని మిక్స్ చేసి రిచర్డ్ రూపొందించిన సిద్ధాంతానికి ఈసారి నోబెల్ బహుమతి ప్రకటించారు. డబ్బు ఖర్చు చేసే సమయంలో మనిషి ఆలోచనలు ఎలా ఉంటాయో, ఆయన తన పరిశోధనలో తేల్చి చెప్పారు. డబ్బు ఖర్చు చేసేప్పుడు మన మీద మనకు నియంత్రణ ఉండదట! హేతుబద్ధంగా ఆలోచించమట! ఆ వార్త చదవగానే నోబెల్ బహుమతి గ్రహీతలో నన్ను నేను చూసుకున్నాను. నిన్ను కూడా చూశాననుకో, అందుకే మన ఇంటికి మనమే హీరో హీరోయిన్‌లం అన్నాను.’’
‘‘నన్ను పొగిడారంటే అర్థం ఉంది. మిమ్ములను మీరు హీరో అని ఎలా పొగుడుకుంటారు. నోబెల్ బహుమతి గ్రహీత పరిశోధనకు మీకూ పోలికేంటి? ఎందులో పోలిక?’’
‘‘అక్కడికే వస్తున్నా! ఖర్చు పెట్టేముందు అన్ని లెక్కలూ వేసుకోరు అనేదేకదా? ఆ ఆర్థిక శాస్తవ్రేత్త కనిపెట్టిన విషయం. ఈ విషయంలో నేను ఆయనకన్నా ముందున్నా... అదే అదే మనం ఆయనకన్నా ముందున్నాం.’’
‘‘మేధావిలా ఏదో స్టేట్‌మెంట్ ఇచ్చి చేతులు దులుపుకోవడం కాదు. దాన్ని ఎలా సమర్థించుకుంటారో చెప్పండి?’’
‘‘నాకు నెలజీతం రాగానే మొత్తానికి మొత్తం నీకే ఇచ్చేస్తా కదా?’’
‘‘అవును.’’
‘‘మా ఆయన బంగారం. బుద్ధిమంతుడిలా జీతం తెచ్చి ఇచ్చేస్తాడు అని నువ్వు మురిసిపోతావు. కానీ దీని వెనుక పెద్ద వ్యూహం ఉంది. ఆర్థిక శాస్త్రం ఉంది. నోబెల్ ప్రైజ్ సాధించడానికి కావలసినంత తెలివి ఉంది.’’
‘‘ఏంటో ఆ తెలివి?’’
‘‘జీతం నీ దగ్గరే ఉంటే చందన బ్రదర్స్‌లో కేజీల్లో చీరలు అమ్ముతున్నారు, నాగార్జున బంగారు ఆభరణాలు కొనమని పదే పదే అడుగుతున్నాడు, చెన్నై షాపింగ్ మాల్‌కు వెళ్లొద్దాం, ప్రేమించుకునేప్పుడు బంగారువడ్డాణం చేయిస్తా అన్నారంటూ నా దుంప తెంచేదానవు. ఇంట్లో రోజూ కిష్కింద కాండ నాటక ప్రదర్శన మూడు షోలు నిరాటంకంగా సాగేది. అవునా? కాదా? మరిప్పుడు జీతం మొత్తం నీ చేతికే ఇవ్వడంవల్ల అలాంటి కోరికలు చచ్చినా మన ఇంటి దరిదాపుల్లోకి కూడా రావు. జీతం ఎంతో? ఖర్చు ఎంతో నీ కళ్లముందు ఐమ్యాక్స్‌లో స్క్రీన్‌లా తేటతెల్లంగా కనిపిస్తుంటే, నీకు బంగారు కోరికలు ఎలా పుడతాయి. భార్య అంటే భయం అని పిచ్చోళ్లు అనుకుంటారు. కానీ ఇప్పుడు చెప్పు నా వ్యూహంలో నోబెల్ ప్రైజ్‌కు కావలసిన తెలివితేటలు దాగున్నాయా? లేదా?’’
‘‘ఔనండి. బుద్ధిగా నా చేతిలో పెడితే మురిసిపోయా. మీరు అమాయకులు అనుకున్నా. ఇన్ని తెలివితేటలు ఉన్నాయా? ఐనా నేను కూడా అమాయకురాలిని ఏమీ కాదు. జీతం అంతా ఖర్చయింది అని చెప్పి నెలనెలా ఎంతో కొంత దాచిపెడుతున్నా. పిల్లల చదువులకు, పెళ్లిళ్లకు అవసరం వస్తుందని, ఖర్చు తగ్గించి పొదుపు చేస్తున్నా. పోపుల డబ్బానుంచి బీరువాలోని చీరల కింది వరకు అన్నీ నాకు వరల్డ్‌బ్యాంకులే కష్టకాలంలో ఆదుకుంటాయి’’
‘‘డబ్బులు పోపు డబ్బాలో దాచిపెడుతున్నాను అని నాతో అన్నావు సరిపోయింది. గట్టిగా అనకు మేధావులు విన్నారంటే ఆడవాళ్లంతా సామాజిక స్మగ్లర్లు అని ముద్ర వేయగలరు.’’
‘‘మందులకో మాకులకో అవసరం వస్తుందని పోపుల డబ్బాలో డబ్బు దాచిపెట్టుకుంటే సామాజిక స్మగ్లర్లు అయితే బీడీలు, మందు బాటిల్స్‌కు డబ్బు తగలేసి, రోగాలు వచ్చాక నలుగురి ముందు చేయి చాచడం మేధావితనం అవుతుందా?’’
‘‘వివాదాలు మనకెందుకు వదిలేయ్. మనమిద్దరం చేస్తున్నది మంచి అని మనకు తెలుసు’’
‘‘అయినా అదేం చిత్రమండి. అంతోటి దానికి నోబెల్ బహుమతి ఇచ్చేస్తారా? ఆ దేశాల సంగతి తెలియదు కానీ మన దేశంలోసగటు కుటుంబరావుల ప్రతి రూపాయి ఖర్చు చేసేముందు మన ఆదాయం ఎంత, ఖర్చు ఎంత, ఈ ఖర్చు చేయవచ్చా? లేదా? అని నిరంతరం మెదడులోనే క్యాలిక్యులేటర్‌గా మార్చి లెక్కలు వేస్తూనే ఉంటాడు కదా? మరాయన డబ్బు ఖర్చు చేసేముందు ఆలోచించరు అని పరిశోధించి చెప్పేసరికి నోబెల్ ప్రైజ్ ఇచ్చేసారు.’’
‘‘రిచర్డ్ థాలేర్ ఓసారి మనదేశానికి వచ్చి కుటుంబరావులతో ఈ విషయం మాట్లాడితే బాగుండు.’’
‘‘ఐనా మన గురించి ఒకరు చెప్పడం ఎందుకు? మన గురించి మనకు తెలియదా? డబ్బు ఖర్చు విషయంలో మన సగటు మధ్య తరగతి, పేద కుటుంబాలు నోబెల్ బహుమతి పరిశోధనా అంశం కన్నా ముందున్నాం.’’
‘‘అంతేనోయ్ బాగా చెప్పావు. డార్లింగ్ ఈరోజు పెట్రోలుకు ఓ వంద ఎక్కువిస్తావా?’’
‘‘నా దగ్గర మీ తెలివితేటలు చూపకండి. పెట్రోల్ లీటర్‌కు రెండు రూపాయలు తగ్గింది. ఆ వంద సిగరెట్ ప్యాకెట్‌కని తెలుసు. నోరు మూసుకుని వెళ్లండి’’
బుద్దా మురళి 13. 10. 2017 జనాంతికం 

6, అక్టోబర్ 2017, శుక్రవారం

బట్టతలతో విప్లవం

‘‘దేవుని సృష్టిలో ప్రతి ప్రాణికి ఓ ప్రత్యేకత ఉంటుంది.’’
‘‘ఆ విషయం నీకు ఇప్పుడు తెలిసిందా?’’
‘‘ఎప్పుడు తెలిసింది అని కాదు, ఎలా తెలిసింది అని అడుగు. బుద్ధునికి బోధి వృక్షం కింద జ్ఞానోదయం అయినట్టు ఆ దృశ్యం చూడగానే నాకిప్పుడు ఈ విషయం గుర్తుకు వచ్చింది.’’
‘‘ఏమా విషయం? ఏమా జ్ఞానోదయం?’’
‘‘భూమి  బల్లపరుపుగా వుంటుందని పతంజలి గోపాత్రునికి అనిపిస్తే పోలీసాయనకు తన లాఠీలా ఉంటుందనిపించింది. భూమి నిజంగా ఎలా వుంటుందో తేల్చకుండానే గోపాత్రుని పాత్రను ముగించారు. కానీ నాకు మాత్రం భూమి బట్టతలలా నున్నగా ఉంటుందనిపిస్తోంది.’’
‘‘అర ఎకరం భూమి కొని ఆరు ఎకరాలు ప్రభుత్వ భూమిని ఆక్రమించుకుని మొత్తం పదెకరాలను చదును చేసి ప్లాట్లు వేసి అమ్మేవాళ్లు వుంటారు. అడ్డదిడ్డంగా వున్న భూమిని వాళ్లు చదును చేస్తారు. అంతే తప్ప భూమి తనంతట తానుగా చదునుగా ఉండదు. పక్కింటి పిల్లకు తల దువ్వమన్నా మనవారికి కోపం వస్తుంది. కానీ వీళ్లు మాత్రం తన పర అనే బేధం లేకుండా ఎక్కడ అనాధ భూమి కనిపిస్తే అక్కడ వాలిపోయి చదును చేస్తారు. ఇంతకూ జ్ఞానోదయం గురించి చెప్పనేలేదు.’’
‘‘ప్రతి వ్యక్తి పుట్టుకకు ఓ ప్రత్యేకత ఉంటుంది. అది తెలియకే కొందరు చెంప దెబ్బలు కొట్టినా, కాలితో తన్నినా దులపరించుకొని ఆత్మాభిమానం లేకుండా అభిమానులం అని వెంటపడతారు.’’
‘‘ముందు విషయం చెప్పు?’’
‘‘నిన్ను నువ్వు తెలుసుకో అన్నారు మహానుభావులు. అలా తెలుసుకుంటే మన ప్రత్యేకత ఏంటో మనకు తెలుస్తుంది. ఆర్టీసీ డ్రైవర్‌గా వున్న గైక్వాడ్ తనకో ఫ్రత్యేకత ఉందని తెలుసుకుంటే రజనీకాంత్ అవుతాడు. ముక్కు మూసుకుని యోగాచేసే పతంజలి తన ప్రత్యేకత తెలుసుకుంటే మల్టీ నేషన్ కంపెనీలను కూడా గడగడలాడించే బ్రాండ్‌గా మారిపోతాడు.’’
‘‘అసలు విషయం చెప్పు?’’
‘‘వ్యక్తిత్వ వికాసం పాఠాలు అనగానే కుర్రకుంకలు మొదలుకుని వృద్ధ కుంకల వరకు అబ్రహం లింకన్ అంటూ చెప్పుకుంటూ వస్తారు. ఇంకెంత కాలం ఆయనే్న పట్టుకుని వేలాడతారు. ఇదిగో ఈయన్ని మించిన ఉదాహరణ ఇంకోటి ఉందా? చెప్పు’’
‘‘ఏదీ ఈ బట్టతలనా?’’
‘‘అవును ఈ బట్టతలనే.. హరిత విప్లవం ,శ్వేత విప్లవం కన్నా పెద్ద విప్లవం ఈ బట్టతల విప్లవం ..  అదేదో బంగారం షాప్ ఓనర్ తనను తాను బ్రాండ్ అంబాసిడర్‌గా మార్చుకున్న తీరు అమోఘం. రేప్ చేసినవాడు, ఐపి పెట్టినవాళ్లు నలుగురిని ముంచిన వాళ్లు, మర్డర్ చేసిన వాళ్లు, చివరకు ఆకురౌడీలు కూడా తలెత్తుకుని తిరుగుతున్న ఈరోజుల్లో తలదించుకొని భారంగా బతుకుతున్న బట్టతల వాళ్లు తలెత్తుకుని తిరిగేట్టు చేసిన ఆ జ్యువెలరీ బట్టతల ఓనర్‌ను చూడగానే నాకెంత సంతోషమో!’’
‘‘సంతోషం ఎందుకు?’’
‘‘పతంజలి  , ఈ బట్టతలాయన మన కాలంలో పుట్టిన మహానుభావులు చరిత్రను మలుపుతిప్పిన చారిత్రక పురుషులు.’’
‘‘అంత గొప్పతనం ఏంటో వారిలో?’’
‘‘ఆత్మవిశ్వాసానికి నిలువెత్తు రూపాలు. స్వదేశీ వస్తువునే వాడాలని మహాత్మాగాంధీ కాలంనుంచి మన కాలం వరకు ఎంతోమంది ప్రచారం చేసారు. పట్టించుకున్నవారెవరు. మల్టీ నేషన్ కంపెనీలు మనదేశాన్ని మింగేస్తున్న కాలంలో రాందేవ్ బాబా తానే బ్రాండ్‌గా మారి పతంజలితో మల్టీ నేషన్ కంపెనీలను మట్టి కరిపించడం అంటే మాటలా?’’
‘‘మోకాలికి బోడిగుండుకు సంబంధం అన్నట్టు రాందేవ్‌కూ బట్టతలాయనకు సంబంధం ఏమిటి? ఈయనది వనమూలికల వ్యాపారం ఆయనది బంగారం వ్యాపారం.’’
‘‘ఎందుకు లేదు. చాలా విషయాల్లో ఇద్దరి వ్యూహం ఒకటే. పైగా ఇద్దరూ మల్టీనేషన్ కంపెనీలను వణికిస్తున్నారు. ’’
‘‘నిజమా?’’
‘‘నీ కిప్పుడు నవ్వులాటగానే వుండొచ్చు. చూస్తూ ఉండు ఏదో ఒకరోజు దేశంలో బట్టతల లేటెస్ట్ ట్రెండ్ అవుతుంది. ఒకప్పుడు చిరిగిపోయిన బట్టలు అడుక్కునే వాళ్లు వేసుకునేవారు. దేశంలో సంపద పెరిగాక అన్నం అడుక్కునే వాళ్లు లేరు. చిరిగిపోయిన బట్టలు అడుక్కుని వేసుకునేవారు లేరు. కానీ ఇప్పుడు చిరిగిన బట్టలే లేటెస్ట్ ట్రెండ్. ఎంత చీలికలు పేలికలు అయితే అంత ఆధునికులన్నమాట. ఆ బట్టతలాయన కూడా ట్రెండ్ సెట్టర్‌గా మిగిలిపోయారు. తనకు బట్టతల అని ఆయన ఏమాత్రం ముఖం చాటేయలేదు. నిముషానికోసారి టీవీలో దర్శనమిస్తు ఒక్కసారి మా షాపునకు వచ్చి ధరలు చూసి మీరే నిర్ణయించుకోండి అని పిలుస్తున్నాడు. మహేష్‌బాబు, సమంత, నాగార్జున, ఎన్టీఆర్, వెంకటేష్ అంటూ బంగారం వ్యాపారులంతా వాళ్ల వెంట పరుగులు తీస్తే, ఆ బట్టతలాయన మాత్రం ఇంట్లో నిలువెత్తు అద్దంలో తన బట్టతలనుచూసి యురేకా అని అరిచి మురిసిపోయి ఇంతకు మించిన బ్రాండ్ అంబాసిడర్ ఎక్కడా దొరకడు అని తన బట్టతలను నమ్ముకుని కోట్ల రూపాయల ప్రకటనలు గుప్పించి, వందల కోట్ల బంగారం వ్యాపారం చేస్తున్నాడు’’
‘‘దర్శకుని డేట్స్ దొరక్కపోతే వి.బి.రాజేంద్రప్రసాద్ తానే దర్శకుడిగా మారి ‘దసరాబుల్లోడు’ తీస్తే సూపర్ హిట్టయినట్టు బ్రాండ్ అంబాసిడర్‌గా హీరో డేట్స్ దొరక్క ఆ బట్టతలాయన తానేబ్రాండ్‌గా మారాడేమో అని నా అనుమానం.’’
‘‘60కి చేరువలో ఉన్న బట్టతల హీరోలు విగ్గుతో నటించడం కన్నా ఆ బట్టతలాయన ఒరిజినల్ తలతో కనిపించేసరికి అతని నిజాయితీపై నమ్మకం కలిగి అతని వ్యాపారంలో పట్టిందల్లా బంగారం అవుతుందేమో అనిపిస్తోంది.’’
‘‘ఏ పుట్టలో ఏ పాముందో ఏ బట్టతలలో ఎవరి అదృష్టం దాగుందో? ఎవరు చెప్పొచ్చారు. హీరో డేట్స్ దొరక్కపోతే కుక్కను, పిల్లిని, పిట్టలను విఠలాచార్య హీరోలను చేసేవారట. రామానాయుడులాంటి నిర్మాతలు హీరోల డేట్స్ దొరక్కపోతే తన సంతానానే్న హీరోలను చేసిన సందర్భాలున్నాయి. అలాగనే ఈ బట్టతలాయనకు అదృష్టం వరించింది. ఎడారి రాష్ట్రం రాజస్థాన్‌లో పుట్టి నెల్లూరులో కూలీగా జీవితం ప్రారంభించి తానే బ్రాండ్‌గా మారడం అంటే ఏదో సినిమా కథలా ఉంది.’’
‘‘బట్టతలాయన్ని నువ్వు ఆకాశానికి ఎత్తేస్తున్నావు గానీ, టీవీలో ఆయన్ని చూడగానే చిరాకేస్తోందని సామాజిక మాధ్యమాల్లో ఎంత మంది రాశారో తెలుసా?’’
‘‘తెలుసు. అలా రాశారంటే మనం ఇలా మాట్లాడుకుంటున్నాం అంటే బట్టతలాయన ప్రచార మంత్రం ఫలించినట్టే. ఫేస్‌బుక్‌లోఅందమైన అమ్మాయిలకు ఉదయం లేవగానే గుడ్‌మార్నింగ్ అని పడుకోబోయేముందు గుడ్‌నైట్ అని క్రమం తప్పకుండా మెసేజ్‌లు పంపే పెద్ద మనుషుల్లా ఈయన ప్రతిరోజు పలకరిస్తున్నాడు. ఓసారి పోయివద్దామని సోమాజిగూడ లలిత జ్యుయలరీకి పోతే ఆయన ఎదురొచ్చి స్వాగతం పలుకుతాడు అనుకున్నాను. కానీ అక్కడ మాత్రం బతుకమ్మ చీరల పంపిణీ బంగారు ఆభరణాల అమ్మకానికి తేడా తెలియలేదు అంత జనం ఉన్నారు. అక్కడున్న అందమైన సేల్స్ గర్ల్‌ను ఇదేంటమ్మా అంటే, ముసి ముసి నవ్వులు నవ్వింది. పక్కనున్న ఆవిడ ధుమధుమలాడుతూ ఇంకా నయం నిన్నటి రష్‌లో ఈరోజు పది శాతం కూడా లేదు అంది. నిజమే కోట్ల రూపాయల ప్రకటనల ప్రభావం మరి. శ్రీకృష్ణదేవరాయల కాలంలో అంగళ్లలో రత్నాల రాసులు పోసి అమ్మారట! అదెంత వరకు నిజమో కానీ సోమాజిగూడలో ఆ రోడ్డు మొత్తం బంగారం షాపులే. బట్టతలాయన ప్రచార ధాటిముందు నిలువలేక నాగార్జున మొదలుకుని అందరు నటుల షాపులు వెలవెలబోయాయి. బంగారం కూడా చిన్నబోతుంది అనిపించింది మొదటిసారి.’’
‘‘ఆయన వ్యాపారం ఆయన చేసుకుంటే మల్టీ నేషన్ కంపెనీలు ఎందుకు వణికిపోతాయి. ఈయన జీవితమే ఓ సందేశం ఎలా అవుతుంది?’’
‘‘ఇజ్రాయిల్ టెక్నాలజీతో ఎడారిలో పంట పండించినట్టు అదేదో టెక్నాలజీతో బట్టతలపై వెంట్రుకలు మొలిపించే బిజినెస్ జోరుగా సాగుతోంది. అరచేయి అంత బట్టతలపై గడ్డిపరకంత వెంట్రుకలు మొలిపిస్తే లక్ష రూపాయలు. పర్సనల్ లోన్ తీసుకుని దీనికి తగలబెట్టే వారు కూడా ఉన్నారు. కొందరు తమలో తామే కుమిలిపోయి విగ్గు ముఖం పెట్టుకుని తమది కాని జీవితంలో బతికేస్తున్నారు. ఒకటి రెండు వెంట్రుకలు రాలి తెల్లబడినా గజగజ వణికిపోయి తమ జీవితం ఇక అడవి కాచిన వెనె్నల అని కుమిలిపోతున్నారు. వీరిని ఆశ్రయించి మల్టీ నేషన్ కంపెనీలు కోట్ల రూపాయల వ్యాపారం చేస్తున్నాయి. ఎంత గొప్పవారైనా ఈలోకంలో మనసులో మాస్క్ వేసుకుని జీవించక తప్పదు. వీటితోపాటు తలకు రంగు, విగ్గు అంటే మనది కాని జీవితంలో జీవించేస్తున్నాం. ఇలాంటి వారందరిలో ఆత్మవిశ్వాసాన్ని రగిలించి బట్టతలతో విప్లవం సృష్టించిన ఆ బట్టతలాయనకు భారతరత్న ఇవ్వాలని నా డిమాండ్.’’
‘‘నీకే గనుక అధికారం వుంటే నిజంగానే భారతరత్న ఇప్పించేట్టు ఉన్నావు?’’
‘‘ఏదీ ఒరిజినల్ కాని వారి నటనకు మెచ్చి అవార్డులు ఇస్తున్నప్పుడు ఒరిజినల్ నటునికి ఇస్తే తప్పేంటి?’’
‘‘మరీ ఓవర్ చేస్తున్నావు?’’
‘‘పొట్టిగా వున్నాను. నల్లగా ఉన్నాను, బట్టతల అంటూ వంకలు వెతుక్కుంటూ కుమిలిపోయేకంటే వాటిని పట్టించుకోకుండా మనం లోపాలు అనుకునే వాటిని కూడా తన ప్రత్యేకతగా భావించి ఎదగడమే కాకుండా ధైర్యంగా ప్రజలముందు నిలిచిన ఆ బట్టతలాయన బంగారం కొనకపోయినా ఆయనలోని ఆత్మవిశ్వాసం అందరికీ ఆదర్శం.’’
‘‘అంటే ఆ బట్టతలాయన జీవితమే సందేశం అంటావు.’’
‘‘ఆయనే కాదు. ఎవరు అమ్మినా బంగారు ఆభరణాలనైనా అనుమానించాల్సిందే కానీ బట్టతలతో విప్లవం సృష్టించవచ్చు అనుకున్న ఆయన ఆత్మవిశ్వాసాన్ని అనుమానించకు.’’
-బుద్దా మురళి( jananthikam 6.10.2017)

4, అక్టోబర్ 2017, బుధవారం

వజ్రాయుధం

‘రామాయణం, మహాభారతం నుంచి నేనోటి గ్రహించాను’’
‘‘ఏంటి ఇప్పుడు నువ్వా రామాయణ, మహాభారతాలు రాయడానికి సిద్ధమవుతున్నావా? ఇప్పటివరకు రాసినవి సరిపోలేదా?’’
‘‘ఎంతమంది రాసినా ఎవరికోణం వారికి ఉంటుంది. ఇంతకూ వాటినుంచి నేనేం గ్రహించానో చెప్పనివ్వు’’
‘‘రామాయణ కల్పవృక్షం నుంచి రామాయణ విషవృక్షం వరకు అందరూ అన్నీ చెప్పేశారు. ఇంక చెప్పడానికి నీకేం మిగలలేదు. సీనియర్ ఎన్టీఆర్ నుంచి బాలకృష్ణవరకు అందరూ శ్రీ రామునిలా నటించేశారు. ఇంకెవరికీ కొత్తగా చూపడానికేం మిగలలేదు. చివరకు బాలరామునిగా కూడా జూనియర్ ఎన్టీఆర్ నటించేశారు. ఇప్పుడు రాయడానికి రచయితలకు చూపడానికి సినిమావారికి ఏమీ మిగలలేదు’’
‘‘చెప్పాలని ఉంటే రామయణాన్ని ఎవరి కోణంలో వాళ్లు రాయవచ్చు. చాలా సినిమాలకు రామాయణం, మహాభారతాలే కథలు. సినిమావాళ్లు ఆ విషయం చెప్పడానికి మొహమాటపడతారు. మణిరత్నం రోజా సతీసావిత్రి కథ కాకపోతే మరో పురాణాలనో ఆధునీకరిస్తున్నారు. రోజుకో తెలుగు సినిమా వస్తున్న ఈ కాలంలో గంటకో కథ ఎక్కడి నుంచి వస్తుంది. పీత కష్టాలు పీతవి. సినిమావాళ్ల కష్టాలు పాతసినిమాలో పేదింటి హీరోల కష్టాల్లాంటివి’’
‘‘ఇంతకూ నువ్వు గ్రహించిన విషయం ఏంటి?’’
‘‘ప్రహ్లాదునిలా సర్వశాస్త్రాల సారం గ్రహించాను అని చెప్పాలని ఉంది.?’’
‘‘నువ్వు ప్రహ్లాదునివి.. అంటే నేను?’’
‘‘ప్రతి పాత్రకు పోలిక అవసరం లేదు. నేనేంటో చెప్పాను అంతే’’
‘‘సరే ఏం గ్రహించావో చెప్పు?’’
రామాయణంలో శ్రీరాముని విజయం. మహాభారతంలో పాండవుల విజయం వెనుక ప్రధాన పాత్ర ఏంటో గ్రహించాలి’’
‘‘అదేంటో చెప్పు ఊరించకుండా?’’
‘‘నువ్వు నమ్మవేమోకానీ వీరి విజయం...?’’
‘‘ముందు చెప్పు. నమ్మాలో వద్దో నేను నిర్ణయించుకుంటాను’’
‘‘దేవుళ్లుకాదు. మనుషుల విజయంలోనూ ప్రధాన కారణం అదే’’
‘‘ఏది?’’
‘‘రామాయణంలో చాలా పాత్రలు శ్రీరామునికన్నా బలవంతులు అయినా శ్రీరాముడే గెలిచాడు ఎలా? అంటే శ్రీరామునివద్ద సమాచారం అనే ఆయుధం ఉంది. ప్రత్యర్థులవద్దకాదు. సమాచారం అనే బలం లేకపోతే శ్రీరాముడు మొదటి ఎత్తులోనే చిత్తయి ఉండేవారు. వాలితో ఎదురుపడి నేరుగా యుద్ధం చేస్తే సగంబలం మైనస్ అవుతుంది. నేరుగా యుద్ధం చేస్తే సగం బలం మైనస్ అవుతుందనే సమాచారం సేకరించడం వల్లనే శ్రీరాముడు చాటునుంచి రాచకార్యం సాధించాడు.’’
పది తలల రావణున్ని ఎన్నిసార్లు ప్రయత్నించినా పడగొట్టలేమనే విషయం తెలిసి శ్రీరాముడు డీలాపడిపోలేదు. ఎటునుంచి నరుక్కువస్తే పని అవుతుందో సరైన సమాచారం విభీషణుని నుంచి తెలుసుకొని విజయం సాధించాడు.’’
‘‘విభీషణుడు ఇచ్చిన సమాచారం కాకపోతే శ్రీరాముని విజయం సాధ్యం అయ్యేదా? అందుకే చెబుతున్నా ఆ కాలంలోనైనా ఈ కాలంలోనైనా సమాచారమే ఆయుధం’’
‘‘నార దుస్తులలో అడవులకు వెళ్లిన శ్రీరాముడు సమాచారం వల్లే విజయం సాధించి ఉండవచ్చు. కానీ మహాభారతంలో మాత్రం ప్రతి విజయం వెనుక శ్రీకృష్ణుని పాత్ర మాత్రమే ఉంది.’’
‘‘నిజమే ప్రతి విజయం వెనుక శ్రీకృష్ణుని పాత్ర ఉండే శ్రీకృష్ణుని విజయం వెనుక సమాచారం పాత్ర ఉంది. యుద్ధాన్ని ముందే ఊహించి శ్రీకృష్ణుడు ప్రతి సమాచారాన్ని ముందే సేకరించడం వల్లనేకదా.. పాండవుల విజయం సులభమయింది. విలన్లవైపు ఉన్న కర్ణుణ్ణి ఓడించాలి. కవచకుండలాలు ఉన్నంతవరకు అతణ్ణి ఓడించలేమనే విషయం ముందే తెలిసి, కవచ కుండలాలు లేకుండా చేయడంలోనే పాండవుల విజయం ఖరారు అయింది. ఒక్కోసారి సమాచార సేకరణ చాలా కష్టమైంది. నువ్వు ఎలా చస్తావో చెప్పు అని అడగడం అంటే ఆషామాషీ విషయమా? కానీ తప్పదు కదా! శ్రీకృష్ణుని సలహాతో ధర్మరాజు భీష్ముని వద్దకు వెళ్లి పాదాభివందనం చేసి తాతా నువ్వెలా మరణిస్తావో చెప్పు అని అడిగి, తెలుసుకొని వచ్చాడు. బహుశా ప్రపంచ సాహిత్యంలో ఇంత విడ్డూరమైన సమాచారం సేకరించిన సంఘటన మరోటి ఉండకపోవచ్చు. అందుకేనేమో! రాజులు కూడా ఆయుధ సంపత్తికన్నా సమాచార సంపత్తిపైనే ఎక్కువ ఆధారపడ్డారు. శత్రురాజు బలాలు, బలహీనతల సమాచార సేకరణతోనే ప్రతి రాజు నిరంతరం నిమగ్నమై ఉండేవారు’’
‘‘ఔను నా చిన్నప్పుడు మా స్నేహితులు కూడా నిరంతరం సమాచార సేకరణలో మునిగిపోయి ఉండేవారు. నిప్పులాంటి మనిషి సినిమా ఏ థియేటర్‌లో విడుదల అవుతుందో నెలముందే చెప్పేవారు. అడవిరాముడు సినిమా అజంతా థియేటర్‌లో ఎన్ని రోజులు నడిచింది, ఎన్ని రోజులు హౌస్‌ఫుల్ అయింది, మార్నింగ్ షో, మ్యాట్ని ఏ షోలు ఎంత కలెక్షన్ చేసిందో మా పాండు లెక్కలతో సహా చెప్పేవాడు. వాళ్ల ఆవిడ కూడా అంతే తెలివైనది. సెక్రటరీ సినిమాలో వాణిశ్రీ ఎన్ని చీరలు కట్టింది, ఏ సీన్‌లో ఏ రంగు బ్లౌజ్ వేసుకుంది, ఏ సినిమాలో అక్కినేని ఎన్ని స్టెప్స్ వేశాడు, ఎన్ని డ్రెస్‌లు వేశాడో కళ్లు మూసుకుని చెప్పేది. పాండు అంత సమాచారం ఎలా సేకరిస్తాడా అని మాకు బోలెడు ఆశ్చర్యంగా ఉండేది. ఒక్కోసారి ఈర్ష్య కూడా వేసేది’’
‘‘పాండు ఏం చేసేవాడు?’’
‘‘సమాచార సేకరణలో బిజీగా ఉండే సరిగా చదువుకోలేకపోయాడు. బాగా అలవాటైన ప్లేస్ అని గాంధీనగర్ బాలాజీ థియేటర్ వద్ద పాన్‌షాప్ పెట్టాడు. చాలామంచోడు. ఎప్పుడు అడిగినా మేనేజర్‌కు చెప్పి టికెట్లు ఇప్పించేవాడు. థియేటర్ నడవక దానిని కూల్చి అపార్ట్‌మెంట్ కట్టారు. థియేటర్ లేనప్పుడు పాన్‌షాప్ ఉండదుకదా! రోడ్డునపడ్డాడు. ఇప్పుడు ఆర్టీసి క్రాస్‌రోడ్‌లో సినిమా పత్రికలు అద్దెకు తీసుకుని చదువుతూ కాలక్షేపం చేస్తున్నాడు. పాతతరం హీరోలు ఎవరివి ఎన్ని సినిమాలు వచ్చాయి. ఎన్ని రోజులు నడిచాయి, ఎంత వసూలు చేశాయి అనే లెక్కలు చెప్పడానికి పాండు ఎప్పుడూ రెడీగానే ఉంటాడు. కానీ వినేందుకు ఎవరూ సిద్ధంగా ఉండరు. పైగా పిచ్చోళ్లను చూసినట్లు చూస్తారు? ప్రతిభకు గుర్తింపులేదు పాపం!!
‘‘మీ పాండు అక్కడే ఉంటాడని ముందే ఊహించాను. సమాచారం అంటే రోడ్డుమీద కనిపించినదంతా తెచ్చి ఇంట్లో భద్రపరచుకోవడం కాదు. నీకు ఉపయోగపడేదో, నలుగురికి ఉపయోగపడేదో సమాచారం అవుతుంది కానీ, ఎన్ని డ్రస్‌లు మార్చారు. ఎన్ని దేవుళ్లకు మొక్కారు? ఉదయం వంకాయ కూర తిన్నారా? చిక్కుడు కాయ కూర తిన్నారా? పచ్చిపులుసుతో తిన్నారా? సాంబారు పోసుకున్నారా? అనేది సమాచారం కాదు. ఈ సమాచారం ఎవరికీ ఉపయోగకరం కాదు’’
‘‘సమాచారమే ఆయుధం అని నువ్వే చెప్పావుకదా?’’
‘‘నిజమే సమాచారం అనేది రెండువైపులా పదునైన కత్తిలాంటింది. పాకిస్తాన్ అణుశాస్తవ్రేత్త కొరియాకు అమ్ముకొన్న సమాచారం ఇప్పుడు ప్రపంచాన్ని భయపెడుతోంది. అదే మన భారతరత్న అబ్దుల్ కలాం సమాచారం అభాగ్యులైన దివ్యాంగులకు వరంగా మారింది. ఇక్కడ తప్పు సమాచారానిది కాదు. దానిని వినియోగించుకునేవారిది. అందరి మెదడు సైజు సమానంగానే ఉంటుంది. దానిలో ఎలాంటి సమాచారం నింపాలి అనే విజ్ఞత మనదే. ఏ తార ఏ పాటలో ఎన్ని డ్రెస్‌లు మార్చారు అనే సమాచారంతో నీ బుర్రను నింపుకుంటావా? నలుగురికి ఉపయోగపడే సమాచారంతో నింపుకుంటావా? అనే చాయిస్ నీదే.’’
‘‘ఇంతకు సమాచారం మంచిదా? కాదా?’’
‘‘అది ఉపయోగించుకొనేవారినిబట్టి ఉంటుంది.’’
‘‘సమాచారం నలుగురిలో నువ్వు తలెత్తుకుని నిలిచేలా చేస్తుంది. పనికిరాని సమాచారం ఆర్టీసి క్రాస్‌రోడ్డులో నిలబెడుతుంది. నలుగురు చూసి నవ్వుకొనేట్టు.’’
‘‘ఏంటో గందరగోళంగా ఉంది’’
‘‘బండి నడవడానికి పెట్రోల్ అవసరం. అదే పెట్రోల్ ఎక్కువయితే ఓవర్ ఫ్లో అయి బండి మొరాయిస్తుంది. ఏదైనా అంతే. తగు మోతాదులో ఉండాలి. సరైన రీతిలో సమాచారం విష్ణుమూర్తి చేతిలో చక్రం లాంటిది. దానికి తిరుగులేదు. ఎక్కడకు వెళ్లినా విజేతగా నిలబెడుతుంది. అదే దారితప్పిన సమాచారం భస్మాసురుని హస్తం లాంటిది. తనవెంటే ఉంటుంది. తన నెత్తిన చెయ్యిపెట్టి భస్మం చేస్తుంది. సక్రమంగా ఉపయోగిస్తే వజ్రాయుధం. దారి తప్పితే భస్మాసుర హస్తం’’.

జనాంతికం - బుద్దా మురళి ( Friday, 22 September 2017)

buddhamurali2464@gmail.com

15, సెప్టెంబర్ 2017, శుక్రవారం

మన కెందుకీ ఆదర్శమూర్తులు

‘‘మీఏరియాలో ప్రజలకు ఉచితంగా వైద్యం చేసే డాక్టర్లు ఉన్నారా?’’
‘‘అవసరం లేకున్నా గర్భాశయం తొలగించే వైద్యులున్నారు. అమృతాంజనం రాస్తే పోయే తలనొప్పికి కూడా లక్ష రూపాయల చికిత్స చేసే ఖరీదైన డాక్టర్లూ ఉన్నారు. కానీ పుట్టి బుద్ధెరిగిన తరువాత పేదలకు ఉచితంగా వైద్యం చేసే డాక్టర్‌ను చూడలేదు.’’
‘‘నువ్వు చూడకపోతే ఉండరా? ’’
‘‘గుడిసెలో ముసలమ్మ దగ్గినా బ్యాగ్ పట్టుకొచ్చి ఉచితంగా వైద్యం చేసే డాక్టర్లు 1960 నుంచి దాదాపు 75 వరకు సినిమాల్లో కనిపించే వారు. వేటగాడు కాలం నుంచి అలాంటి మంచి డాక్టర్లు కనిపించడం లేదు. చిరంజీవి సినిమాలో చనిపోయిన శవానికి కూడా చికిత్స చేసిన డాక్టర్ కనిపించాడు. కానీ నువ్వన్న మంచి డాక్టర్లు కనిపించలేదు.? ’’
‘‘ధర్మ రాజు  ఊర్లోకి వెళ్లి చూస్తే, అంతా మంచివాళ్లే కనిపించారట! అదే దుర్యోధనుడికి అంతా చెడ్డవాళ్లే కనిపించారు. మనం చూసే దృష్టిని బట్టి ఉంటుంది’’
‘‘నీ దృష్టికి ఎవరైనా ఉచిత డాక్టర్లు కనిపించారా? ’’
‘‘కనిపించలేదు కానీ ఉన్నారు. లేకపోతే అదో పెద్ద మిస్టరీ అవుతుంది’’
‘‘కోటిన్నరతో సీటు కొనుక్కున్నవాళ్లు. లక్షలు ఫీజులు కట్టి రాత్రింబవళ్లు చదువుకున్న వాళ్లు ఉచితంగా వైద్యం చేయాలని కోరుకోవడం అత్యాశ కాదా? ’’
‘‘మంచి వైద్యుల లెక్కలు తేలుస్తున్నాను అంతే. ఈ లెక్క చూడు’’
‘‘ అరే ఈ అంకెలన్నీ దాచేపల్లి బుక్ డిపో వాళ్లు ప్రచురించిన ఎక్కాల పుస్తకంలోనివి కదా? నా చిన్నప్పుడు మహంకాళి గుడి దగ్గరున్న ఆ షాపులో ఎక్కాల బుక్ కొన్నాను బాగా గుర్తుంది’’
‘‘తెలంగాణ, ఆంధ్రప్రదేశ్‌లో ఉచితంగా పేదలకు వైద్యం చేసే డాక్టర్ల సంఖ్య ఇది. వాళ్లు ఎక్కడున్నారో కనుక్కోవాలి. ఎవరూ కనిపించడం లేదు అంటే ఏదో మిస్టరీ ఉంది. సమాజంలో ప్రతోడు గుమ్మడిలానే పెద్ద మనిషిలా కనిపిస్తాడు కానీ ఎన్టీఆర్‌లాంటి సిఐడి ఉంటే కానీ ఆ గుమ్మడే విలన్ అని తెలియదు.’’
‘‘అర్థం కావడం లేదు’’
‘‘ఎంసెట్ ఫలితాలు వచ్చినప్పుడు పేపర్ చూడు. టాప్ ర్యాంకర్లు పది మంది ఇంటర్వ్యూలో డాక్టర్‌నై పేద ప్రజలకు సేవ చేస్తాను అంటారు. ఈ లెక్కన మెడికల్ విద్య పుట్టినప్పటి నుంచి, ఎంసెట్ పుట్టినప్పటి నుంచి ఏడాదికి పది మంది అంటే ఎంత మంది డాక్టర్లు అవుతారు. ఒక్కో నియోజక వర్గంలో ఎంత మంది ఉంటారు. అని లెక్క తీస్తున్నా, కనిపించడం లేదు అంటే ఏదో మతలబు ఉంది. అదేదో అక్కినేని సినిమాలో చిన్నపిల్లలందరినీ ఎత్తుకెళ్లి మరో ప్రపంచం సృష్టించాలని ప్రయత్నించినట్టు, ఈ ఉచిత డాక్టర్లను విదేశీ శక్తులో, మరో గ్రహంలోని శక్తులో ఎత్తుకెళ్లి ఉంటారని నా అనుమానం’’
‘‘ఏడ్చినట్టే ఉంది ఐనా నీకీ ఐడియా ఎందుకొచ్చింది?’’
‘‘సమాజంలో ఏ వృత్తిలో ఎంత మంది మంచివాళ్లు ఉన్నారని లెక్క తేల్చాలనుకుంటున్నా? ముందు డాక్టర్లతో మొదలు పెడదాం అని’’
‘‘నీ ఇష్టం వచ్చినట్టు మంచివాళ్ల జాబితాలో చేరిస్తే ఊరుకోరు. ఆధునిక సమాజం మంచితనానికి కొన్ని నియమ నిబంధనలు రూపొందించింది. పాత నిబంధనలు వేరు, లెటెస్ట్ నిబంధనలువేరు. ఉదాహరణకు మీ నియోజక వర్గం నేతపై నీ అభిప్రాయం ?’’
‘‘చాలా మంచోడు. ఇక్కడ రోడ్లన్నీ ఆయనే వేయించాడు. మా ఏరియాకు ఆ ఫ్యాక్టరీలు వచ్చాయంటే ఆయన కృషి కారణం. మా పొలాలు పచ్చగా ఉన్నాయంటే ఆయన పుణ్యమే? ఒకప్పుడు కరువు కాటకాలతో ఉన్న మా ప్రాంతానికి సాగునీరు వచ్చింది. వయసు సహకరించక పోటీ చేయలేదు’’
‘‘ ఇప్పుడు ఆయన ఎలా ఉన్నారు.?’’
‘‘ ఆయనకేం పిల్లలు స్థిరపడ్డారు. మనవళ్లతో కాలక్షేపం చేస్తున్నాడు. ఎవరైనా వెళ్లి సహాయం అడిగితే ఇప్పటికీ మాట సహాయం చేస్తారు. మంచి చెడూ చెబుతారు.’’
‘‘అంటే తినడానికి తిండి లేకపోవడం, గుడిసెలో బతకడం, ఆస్పత్రిలో చికిత్సకు డబ్బు లేకపోవడం వంటి అష్టదారిద్య్రాలు ఏమీ లేవా? ’’
‘‘ఛీ ఛీ ఆయన  శత్రువుకూడా అలాంటి కష్టాలు వద్దు’’
‘‘ఐతే మీ నేతకు మంచివాళ్ల జాబితాలో చోటు దక్కే ప్రసక్తే లేదు. ప్రజాప్రతినిధిగా నియోజక వర్గానికి ఆయన ఏం చేశాడు అనేది అనవసరం ఆయన చివరి దశలో అడుక్కు తింటూ బతకాలి. పట్టించుకునే వారు లేక అనాధలా గుడిసెలో కాలం వెళ్లదీయాలి అలా అయితేనే ఆదర్శప్రాయుడు’’
‘‘తన ఆస్తినంతా ప్రజలకు పంచి పెట్టి పేదరికంలో ఉంటే ఆదర్శం అన్నా... నియోజక వర్గానికి మంచి చేస్తే ఆదర్శం అంటే బాగుంటుంది కానీ .. ఏమీ చేయకపోయినా తినడానికి తిండిలేక కటిక పేదరికంలో బతికితేనే ఆదర్శం అంటే ఇదేం రూల్’’
‘‘హలో ఇది నవ సమాజం తయారు చేసి రూల్స్. అలా అయితేనే మేం ఆదర్శమూర్తిగా గుర్తించి ఆకాశానికెత్తుతాం. లక్షల మందికి ఉద్యోగం కల్పించి, లక్షల కోట్లు సంపాదించడం ఆదర్శం కాదు... ఉత్తమ విద్యార్థులను ఏ టీచరైనా తయారు చేస్తాడు కానీ, పిల్లలను అడవులకు పంపి తాను ఎన్‌కౌంటర్‌లో పోవడమే ఆదర్శం. ఒకప్పుడు పెద్ద పారిశ్రామిక వేత్తగా ఓ వెలుగు వెలిగి మోసపోయి రోడ్డున పడి బాబూ ధర్మం అని అడుక్కుతింటూ ఉంటే ఆదర్శ పారిశ్రామిక వేత్త అంటాం. తల్లిదండ్రులను ఎదిరించి స్కూల్ నుంచి పారిపోయి ఎవడో గన్నయ్యను పోలీస్ స్టేషన్‌లో పెళ్లి చేసుకుని తల్లిదండ్రులను అదే లాకప్‌లో వేయించే వారిది ఆదర్శ వివాహం అని డిసైడ్ చేసేశాం. తానున్న వృత్తిలో ఏం చేశాడు అనేది అనవసరం. ఉచ్చదశలో ఉన్నప్పుడు రోజూ తాగి తందనాలు ఆడి జీవితం పట్ల అవగాహన లేక సంపాదించింది తాగుడుకే ధారపోసినా పరవాలేదు. చివరి దశలో దీనంగా బతికితే చాలు
మా ఆదర్శ సమాజం ఆదర్శమూర్తి అనే ముద్ర వేస్తుంది.’’
‘‘పారిశ్రామిక వేత్త, ప్రజాప్రతినిధి, ఉద్యోగి, ఏ వృత్తిలో ఉన్నా, మనిషిగా ఎవరి బాధ్యత వాళ్లు సక్రమంగా నిర్వహించడం ఆదర్శం అవుతుంది.. కానీ అడుక్కుతింటూ బతికితేనే ఆదర్శం అనే నీ ఆదర్శ సూత్రాలు వింటేనే భయమేస్తుంది? ’’
‘‘నీకు మా ఆదర్శ సమాజంలో అడుగుపెట్టే అర్హత లేదు... పో వెళ్లిపో... భయటకు పో... దుర్మార్గుడా!’’
‘‘భగవంతుడా  నేటి కాలం ఆదర్శమూర్తి ముద్ర పడకుండా మమ్ములను నువ్వే కాపాడాలి’’
-బుద్దా మురళి( జనాంతికం 15. 09. 2017)

8, సెప్టెంబర్ 2017, శుక్రవారం

తెలుగు సినిమా -భాష -కాంగ్రెస్ -చిరంజీవి

‘‘ఇప్పుడెంతో హాయిగా ఉంది. ఏమవుతుందో అనే టెన్షన్‌తో ఇన్నాళ్లూ బుర్ర వేడెక్కింది. ఇ ప్పుడు ఆకాశంలో పక్షిలా విహరిస్తున్నంత హాయిగా ఉంది’’
‘‘దేనికి టెన్షన్? రైళ్లో వచ్చావా? పరీక్షలన్నాక తప్పే వాళ్లూ ఉంటారు. పట్టాలున్నదే తప్పడానికి, అసలు పట్టాలు తప్పినప్పుడే పట్టాలంటూ ఉంటాయని తెలిసేది. దానికి టెన్షన్ ఎందుకు?’’
‘‘రైలు పట్టాలు తప్పితే ఆశ్చర్యపోయేంత అమాయకుడిలా కనిపిస్తున్నానా?’’


‘‘ టెన్షన్ దేనికి? రింగురోడ్డు మీద కారును బస్సు ఢీకొట్టినట్టు వారం రోజుల్లో అదేదో గ్ర హం వచ్చి భూమిని ఢీ కొడుతుంది. అంతా చనిపోతారని వాడెవడో చెప్పిన జోస్యం గురించా?’’
‘‘వారంలో యుగాంతం అని ప్రతి వారం ఎవరో ఒకరు జోస్యం చెబుతూనే ఉంటారు. చిన్నప్పుడు తెగ భయపడేవాడ్ని, ‘నాసా’నో ఇంకేదో కానీ ఐదువేల ఏళ్లలో భూమి అంతరించి పోతుందని ఓ నాలుగు దశాబ్దాల క్రితం ప్రకటించింది. ప్రతి రోజూ నిద్ర పోయేప్పుడు ఐదువేల ఏళ్లలో ఇంకా ఎన్ని సంవత్సరాలు మిగిలి ఉన్నాయని లెక్కపెట్టే వాణ్ణి. ఓ నెల గడిచాక బోర్ కొట్టేసి నేను బతికున్నంత వరకు ఐదువేల ఏళ్లు పూర్తి కావని తెలిసింది. నేను పోయాక కొన్ని వేల ఏళ్ల తరువాత భూమి ఆంతరిస్తే ఇప్పటి నుంచే ఆందోళన అవసరమా? అని నన్ను నేను సముదాయించుకున్నాను. చిన్నప్పుడు ‘నాసా’ చెబితేనే తేలిగ్గా తీసుకున్నా. చిలకజోస్యం వాడు చెబితే పట్టించుకుంటామా? ’’


‘‘రోజూ అబద్ధాలతో నీ బుర్ర వేడెక్కింది. ఇప్పుడు బాబుగారు అన్నీ నిజాలే మాట్లాడాలంటూ కర్తవ్యబోధ చేశారు అందుకే కదా నీలో సంతోషం ’’
‘‘పిచ్చోడా!ప్రతివాడూ ఎదుటి వాడు నిజాలు మాట్లాడాలని కోరుకుంటాడు. ఆ ప్రతివాడిలో నువ్వూ ఉంటావు, నేనూ ఉంటాను బాబూ ఉంటారు. తాను తప్ప అంతా నిజాలే మాట్లాడాలని అనుకోవడంతో ఏతావతా తేలేది ఏమంటే నిజాలు ఎవరూ మాట్లాడరు. రాజుగారింట్లో పెళ్లికి తలో చెంబుడు పాలు తెమ్మంటే ప్రతివాడూ ఎవరు చూడొచ్చారని నీళ్లు పోస్తాడు.. ఆ కథ తెలుసు కదా? ఆ పాల చెంబులోని నీళ్ల లాంటివే నిజాలు. టెక్నాలజీ పెరిగితే- ఊపిరి పీల్చుకోకున్నా బతికే రోజులు వస్తాయేమో కానీ, ఎంత టెక్నాలజీ పెరిగినా రాజకీయాల్లో ఉంటూ నిజాలు మాట్లాడే రోజులు రావు. నీ ప్రశ్న సిల్లీగా ఉంది. అబద్ధాలు లేని ప్రపంచాన్ని ఊహించలేం’’
‘‘అంటే అందరివీ అబద్ధాలేనా?’’


‘‘అష్టాదశ పురాణాల్లో అబద్ధం చెప్పని ఏకైక పాత్ర ధర్మరాజు. చివరకు అతనూ అబద్ధం ఆడాడు. దేవుళ్లే అబద్ధాలు అడందే బతకలేనప్పుడు? ఇక మనిషి ఎంత? రాత్రి ఆలస్యంగా ఇంటికెందుకు వచ్చావని భార్య అడిగిన ప్రశ్నకు నిజాలు మాట్లాడితే బతుకు జడ్కాబండికి చేరుతుంది. రోజా చెంప దెబ్బకొడుతుంది, జీవిత తిడుతుంది. సుమలత ఏడిపిస్తుంది. ఇంటర్వ్యూకని చెప్పి ఎక్కడికెళ్లావురా? అని తండ్రి అడిగినపుడు కొడుకు నిజం చెబితే రోడ్డున పడతాడు. బాస్ అడిగిన వాటికి నిజం చెబితే ఉద్యోగం ఊడుతుంది. అంతెందుకు? ఈ భూమి తన చుట్టూ తాను ఎలా తిరుగుతుందో తెలుసా? అబద్ధం అనే ఇరుసును ఆధారంగా చేసుకుని తిరుగుతుంది. అబద్ధం లేకపోతే జీవితమే కాదు, అసలే భూమి నిలువదు. అంత పవిత్రమైన అబద్ధాన్ని తక్కువ చేయడం అన్యాయం. మన జీవితానికి ఆసరా ఇచ్చే అబద్ధాన్ని ఎప్పుడూ చిన్న చూపు చూడకూడదు. ఓటుకు నోటు కేసులో బాబైనా, కెసిఆరైనా నిజం చెబితే ఇంకేమైనా ఉందా? కేసు భయం, పదవీ గండం ఆయనది, సెక్షన్ 8, ఉమ్మడి రాజధాని, గవర్నర్ చేతిలో శాంతిభద్రతల సమస్య ఈయనది. నిజం ఇద్దరికీ నష్టం.. అబద్ధం ఇద్దరికీ క్షేమం. విన్‌విన్ స్ట్రాటజీ అన్నట్టు. అబద్ధం ఇద్దరినీ గెలిపించి, ఆశలు పెట్టుకున్న జగన్‌ను ఓడిచింది. ఇద్దరం జైలు నేతలమే అని జగన్‌కు చెప్పుకునే చాన్స్ లేకుండా చేశారు’’
‘‘ఐతే హైదరాబాద్ పోలీసులు హత్యాయత్నం చేసిన కేసును పన్నెండు  గంటల్లోనే ఛేదించినందుకా సంతోషం?’’
‘‘నువ్వేక్కడున్నావ్? హైదరాబాద్‌లో జరిగిన సంఘటన హైదరాబాద్‌లో ఉండే పోలీసులు చేధించేందుకు పన్నెండు  గంటలు పట్టింది. కానీ దేశంలో అక్కడెక్కడో హత్య జరిగితే ఆ రాష్ట్ర ముఖ్యమంత్రి, డిజిపి కూడా ఎవరు చేశారో చెప్పలేదు కానీ వాట్సప్‌లో, ఫేస్‌బుక్‌లో ఐదు నిమిషాల్లో నిందితులు ఎవరో చెప్పడమే కాకుండా శిక్షను కూడా ఖరారు చేశారు. టెక్నాలజీ బాగా పెరిగింది.. నువ్వే చాలా వెనుకబడి ఉన్నావ్’’


‘‘నేనూహించలేను నువ్వే చెప్పేయ్. కొంపతీసి ముఖ్యమంత్రి పిల్లలు కనమని చెప్పారని ఆ పనిలో పడతావే ఏంటి? ’’
‘‘మనకంత అదృష్టమా? అది కాదు కానీ.. కనీసం మనం ఇంకా ఓ 20 ఏళ్లు బతుకుతాం కదా?’’
‘‘ఈ పొల్యూషన్ ఇంత కన్నా పెరగకుండా ఉంటే మందులతో బతకొచ్చు’’
‘‘ఈ 20ఏళ్ల జీవితం ఎలా గడపాలా? అని జీవితంలో చాలా టెన్షన్‌గా ఉండేది. బాలకృష్ణ కుమారుడు మోక్షజ్ఞ, రవితేజ కుమారుడు, పూరీ జగన్నాథ్ కుమారుడు హీరోలుగా నటించేందుకు అంగీకరించారు. ఈ జీవితానికి ఇంకేం కావాలి? మన శేషజీవితం హాయిగా గడిచిపోవడానికి మనమీద కరుణించి వాళ్లు హీరోలుగా నటించేందుకు ఒప్పుకున్నారంటే ఇంత కన్నా అదృష్టం ఏముంటుంది? ఆ వార్త తెలిసినప్పటి నుంచి ఆకాశంలో తేలిపోయినట్టుంది. ఆ తరువాత నాగచైతన్య సమంత సంతానం ఎలాగూ మనల్ని ఆదుకుంటుంది. హీరోలుగా నటించేందుకు ఒప్పుకుంటూ..’


‘‘నీ సంతోషం నీ ఇష్టం. కాంగ్రెస్, తెలుగుసినిమా ఒకే విధంగా ఉందనిపిస్తోంది. ఒకటి వంద దాటింది. ఇంకోటి వందకు చేరువగా ఉంది. రెండూ క్రమంగా క్షీణిస్తున్నాయి. ఆరుపదులు దాటిన  యువ నేతలు, సినిమాల్లో ఆ వయసు వారే హీరోలు. రెండూ ఒకప్పుడు బాగా బతికాయి. కాలం తెచ్చిన మార్పులను అర్థం చేసుకోలేక రెండూ దెబ్బతింటున్నాయి. రెండింటికి వారసులే గుదిబండగా మారారు. అన్ని సినిమాలను హనుమంతన్న ఆదుకోలేడు కదా? ఆ బాబా ఎవరో కాళ్లతో తన్నడమే దీవించడం అట .. పోస్టర్ చింపడమే హనుమన్న దీవెనలు .. సినిమా పోస్టర్ లు చింపడం లో పడిపోయి పార్టీ పోస్టర్ చిరిగిపోతున్న విషయం మరిచి పోతున్నారు  ’’
‘‘కాంగ్రెస్‌కు, తెలుగు భాషకు, తెలుగు సినిమాకు మరణం లేదు.’’
‘‘మరణం లేకపోవడం వేరు, బతకడం వేరు. బతకడం వేరు, బాగా బతకడం వేరు. బతికి బట్టకట్టాలంటే రెండింటికీ కొత్తరక్తం కావాలి. కొత్త ఆలోచనలు కావాలి’’
*బుద్దా మురళి (జనాంతికం 8. 9. 2017)