చరిత్ర సృష్టిస్తాం..!మైఖేల్ జాక్సన్ ను నృత్యం లో ఓడించిన శ్రీకృష్ణ దేవరాయలు

‘‘ఏదో రుబ్బుతున్న సౌండ్ వస్తోంది. ఏం రుబ్బుతున్నావ్..?’’
‘‘చరిత్ర సృష్టిస్తున్నాను.. తెలుగు సినిమాలో చరిత్ర సృష్టించే ‘చరిత్ర కథ’ రాస్తున్నాను.’’
‘‘కథ చెప్పు.. ఒక ప్రేక్షకుడిగా నాకు నచ్చితే ఆ కథ సూపర్ హిట్ అయినట్టే!’’
‘‘మాకు కావలసింది మీలాంటి అభిమానులే. కథ చెబుతా.. కానీ మధ్యలో డౌట్లు అడగవద్దు ’’
‘‘పిచ్చోడా.. నేతి బీరలో నెయ్యి, వెలయాలిలో ప్రేమ, చారిత్రక కథలో కథ వెతకడం వృథా అని తెలిశాక డౌట్లు ఎందుకు? చెప్పు.. వింటాను’’

‘‘శ్రీకృష్ణదేవరాయలు రాజమందిరంలో దీర్ఘంగా ఆలోచిస్తున్నాడు. ఎప్పుడూ రాణులతో సరస సల్లాపాలతో గడిపే రాయలు వారం రోజుల నుంచి అన్యమనస్కంగా ఉన్నాడు. రాజును కవ్విస్తూ శృంగారతార సన్నీ లియోన్ డ్యాన్స్ చేసినా అటు వైపు కనె్నత్తి కూడా చూడలేదు. కంటి చూపుతో మహామహులను చిత్తు చేసిన సన్నీ లియోన్ మహారాణి వద్దకు వెళ్లి-‘నా మనసు ఏదో శంకిస్తోంది. రాజుగారిని ఇలా ఎప్పుడూ చూడలేదు. ఏం జరిగిందో తెలుసుకోండి’ అని సలహా ఇచ్చి వెనుతిరిగి వెళ్లింది. నిన్ను అపార్థం చేసుకున్నాను లియోన్.. నీలిచిత్రాల నటిగానే నిన్ను చూశాను.. కానీ నీలో ఒక సావిత్రి, భానుమతి, భారతి, కాంచన ఉందని కలలో కూడా అనుకోలేదు- అని మహారాణి కన్నీరు పెట్టుకుంది. ‘మహారాణీ.. ముందు మనం రాజుగారిని రక్షించుకోవాలి’ అంది సన్నీ లియోన్.
కామెడీకింగ్ సునీల్ తప్ప ఈ పరిస్థితిలో రాజుగారి వద్దకు వెళ్లే సాహసం ఎవరూ చేయలేరని అంతా అనుకున్నారు. అంతఃపురంలోకి కూడా వెళ్లగల ఏకైక వ్యక్తి సునీల్ ఒక్కడే
‘‘సారీ.. నీ కథ మధ్యలో జోక్యం చేసుకుంటున్నాను. చిన్న సందేహం- శ్రీకృష్ణదేవరాయలు మహాశక్తివంతమైన రాజు కదా? కమెడియన్లు క్లోజ్ ప్రెండ్ కావడం ఏమిటి? ఈ ఒక్క సందేహం తీర్చి కథ కొనసాగించు’’
‘‘నీకు తెలుగు సినిమాలు చూసే అలవాటు లేదా? ఎన్టీఆర్ నుంచి జూనియర్ ఎన్టీఆర్ వరకు, సూపర్‌స్టార్ కృష్ణ నుంచి ప్రిన్స్ మహేశ్‌బాబు వరకు మెగాస్టార్ నుంచి పవర్ స్టార్ వరకు తెలుగులో ఏ హీరోకైనా కమెడియనే క్లోజ్ ప్రెండ్‌గా ఉంటాడు. పాతాళభైరవిలో ఎన్టీఆర్‌కు అంజిగాడు మొదలుకొని, ఈ రోజు విడుదలైన సినిమా వరకు అంతా ఈ ఫార్ములాను పాటిస్తారు. నీ మిత్రులు ఎవరో చెప్పు నీవు ఎలాంటి వాడివో చెబుతాను అనే సూక్తి ఇక్కడ పని చేయదు. హీరో ఎంత శక్తివంతుడైనా కమెడియనే అతని స్నేహితుడు అయి తీరాలి.. నేను ఈ తరం ప్రేక్షకుల కోసం సినిమా తీస్తున్నాను కాబట్టి కథ ఏదైనా ఫార్ములా పాటించాల్సిందే’’

‘‘ఇక కథ చెప్పు’’
‘‘రాజుగారు ఇలా ఎందుకున్నారో నాకు తెలుసు.. మహారాణి గారూ నాకు తెలుసు.. అని సునీల్ భారమైన మనసుతో ఆవేదనగా పలికాడు.
‘కామెడీ డైలాగులే తప్ప నీ నుంచి ఇంత భారమైన డైలాగులు వింటానని కలలో కూడా అనుకోలేదు సునీల్. ఏం జరిగిందో నాకు తెలియాలి’ అని మహారాణి అడిగింది.
‘అలెగ్జాండర్ మన దేశంపైకి దండయాత్రకు వస్తున్నాడు- అని సునీల్ ఒక్క క్షణం ఆగాడు. ఇంతోటి దానికే మన మహారాజు భయపడతారని నువ్వెలా అనుకున్నావ్ సునీల్- ఒక్కడు కాదు వంద మంది అలెగ్జాండర్లు.. నెపోలియన్, హిట్లర్‌ను వెంట పెట్టుకుని వచ్చినా మన రాయల వారి ముందు నిలువ లేరు. నీ ప్రాణ స్నేహితుని శక్తి సామర్ధ్యాల గురించి నీవింత తక్కువగా అంచనా వేస్తావని అనుకోలేదు సునీల్... అనుకోలేదు’ అని మహారాణి భారమైన హృదయంతో ఆవేదనగా పలికింది.
‘నన్ను తప్పుగా అర్ధం చేసుకుని మీ వంతు డైలాగులు మీరు ముందే చెప్పేశారు మహారాణి గారు. నన్ను పూర్తిగా చెప్పనివ్వండి. మహారాజు ఆవేదన చెందుతున్నది ప్రపంచ విలన్లంతా ఏకమైన వస్తున్నందుకు కాదు, వారిని ఎదిరించడం మహారాజుకు చిటికెలో పని. కానీ తాను కలలో కూడా ఊహించని విధంగా ట్రంప్ కూడా వీరికి మద్దతుగా ఉన్నాడని తెలిసి ఆవేదన చెందుతున్నారు అంతే. నిజానికి అమెరికా అధ్యక్ష ఎన్నికల్లో ట్రంప్ గెలవడానికి రష్యాతో తన స్నేహాన్ని ఉపయోగించి మన రాయల వారే సహకరించారు మహారాణీ. ట్రంప్ మిత్రద్రోహిగా మారాడని రాయలవారి ఆవేదన. రాయలవారు కొలంబస్‌కు- అమెరికాను కనుగొనమని చెప్పింది ఇందుకోసమేనా? వాస్కోడిగామాకు దారి చూపించింది ఇందుకోసమేనా? అనే ఆవేదన అంతే.. ’’
‘‘ఇక్కడ కథలో చిన్న ట్విస్ట్ ఉంటే బాగుంటుంది. మహారాణి కత్తి పట్టుకుని అలెగ్జాండర్ పని పట్టేందుకు వెళితే ఎలా ఉంటుంది? ’’
‘‘ నా కథలో నువ్వు జోక్యం చేసుకోవద్దు. నువ్వు చెప్పినట్టు చేస్తే ఇది హీరోయిన్ ఓరియంటెడ్ సినిమా అవుతుంది. అంత పొడవున్న అనుష్క రాణిరుద్రమగా నటిస్తేనే హీరోయిన్ ఓరియంటెడ్ సినిమా వర్కవుట్ కాలేదు. హీరో ఓరియంటెడ్ కథకే ఫిక్స్ అయ్యాను. ఇక మళ్లీ కథలోకి వస్తే రాజు యుద్ధానికి సన్నద్ధం అవుతుండగా-
‘మహారాజా డ్యాన్స్‌లో ముందు నన్ను ఓడించండి’ అని మైకేల్ జాక్సన్ సవాల్ విసిరాడు. రాజ్యాంలోని మహామహా డ్యాన్సర్లు తమ వల్ల కాదని చేతులు ఎత్తేశారు. రాయల వారు ఏ మాత్రం భయపడకుండా స్వయంగా రంగంలోకి దిగి అద్భుతంగా నాట్యం చేస్తే, మైకేల్ జాక్సన్ సిగ్గుతో తల దించుకున్నాడు. సన్నీ లియోన్, పక్కనున్న ఐశ్వర్యా రాయ్ మహారాజును ఓరకంట అదోలా చూశారు. ’’
‘‘ఇదేం చరిత్ర.. తిక్కతిక్కగా ఉంది. ఎక్కడి రాయలు, ఎక్కడి జాక్సన్ తలాతోకా లేకుండా ఏంటా కథ.’’
‘‘మరదే.. సాటి తెలుగువాడు ఎదిగితే సహించలేరు. చాణక్య- చంద్రగుప్తగా ఎన్టీఆర్ ఏయన్‌ఆర్‌తో పాటు శివాజీ గణేషన్‌కు కూడా అంతటి పాత్ర అవసరం అని అలెగ్జాండర్‌గా కనిపిస్తే చూస్తారు. తన కన్నా రెండు శతాబ్దాల ముందున్న విదేశీ రాజు డెమిట్రయస్‌ను శాతకర్ణి ఓడించినట్టు చూపితే చప్పట్లు కొట్టాం. రాయలు ఐదు వందల ఏళ్ల ముందుకు వచ్చి జాక్సన్‌ను డ్యాన్స్‌లో ఓడిస్తే తప్పా? ’’

‘‘ఇంతేనా? కథ.. ’’
‘‘ఇంకా చాలా ఉంది? విజయం సాధించిన వాడు చెప్పిందే కథ అనేది పాత మాట. సినిమా తీసే శక్తి ఎవరి చేతిలో ఉంటే వాళ్లు చెప్పిందే కథ.. ఇది నేటి చరిత్ర. చరిత్రను గుర్తు చేసినందుకు సంతోషించాలి కానీ రంధ్రానే్వషణ చేయవద్దు. అసలైన ముగింపు.. నిర్మాత, హీరో తేలాక చెబుతాను.’’
‘‘అంటే హీరో ఎవరైతే, రాయల వారిదీ అదే సామాజిక వర్గం అని తేలుస్తావు.. అంతే కదా? ’’
‘‘అరె చూశావా? నాతో ఆరగంట మాట్లాడగానే నీకెన్ని తెలివి తేటలు వచ్చాయి. అంతే..’’
‘‘చరిత్ర సృష్టించడం అంటే నేనే తప్పుగా అర్థం చేసుకున్నాను. రండి చరిత్ర సృష్టిద్దాం’’ *

-బుద్ధా మురళి (జనాంతికం 27-1-2017) 

నేరగాళ్ల సేఫ్ జోన్!

‘‘మొన్న సిటీలో మా బంధువుల ఇంటికి వెళ్లాను.. కాలనీలో రాత్రి దొంగతనం జరిగింది.’’
‘‘మీరో రాజరాజ నరేంద్రులు, మీ బోషాణంలో దొంగతనం జరిగితే దొంగలను పట్టుకునే బాధ్యత సైన్యాధ్యక్షుడైన నాకు అప్పగించినట్టు ఆ పోజులేంటి? ఈ రోజుల్లో దొంగతనాలు జరగని కాలనీలు ఉంటాయా? ఇది కామన్’’
‘‘జరిగిన సంఘటన చెబితే నువ్వు కూడా ఆశ్చర్యపోతావ్. అసలిలా ఎందుకు జరిగిందో నాకు ఇప్పటికీ అర్థం కావడం లేదు. అచ్చం విక్రమార్క బేతాళ కథలోలా సందేహాలున్నాయి. ’’


‘‘చెప్పు.. విక్రమార్కునిలా నేను సమాధానం చెబుతాను. శవంలా నువ్వు మారు మాట్లాడకుండా వెళ్లిపోతాను అంటే’’
‘‘ ముందు జరిగిందేమిటో విను.. తరువాత మనం పాత్రలను ఎంపిక చేసుకుందాం. దొంగతనం కామనే.. ఎవరూ పెద్దగా ఆశ్చర్యపోలేదు. కాలనీ సెక్రటరీ చలమేశ్వర్ ఫ్లాట్‌లో దొంగతనం జరిగింది. దొంగను రెడ్ హ్యాండెడ్‌గా పట్టుకుని అరవడంతో కాలనీ మొత్తం మేల్కొంది’’
‘‘ఇంకేం వాడ్ని తలా ఒకటి తగిలించి పోలీసులకు అప్పగించి ఉంటారు. ఇందలో కొత్తేముంది?’’
‘‘అక్కడే అసలైన ట్విస్ట్ ఉంది. ఆ దొంగను కొట్టడం కాదు. అందరినీ వాడే వణికించాడు.’’
‘‘ఎలా? ఎలా? ఆసక్తిగా ఉందే? ’’
‘‘ చలమేశ్వర్ అరుపులు వినగానే సెక్యూరిటీ వాడితో పాటు మేమంతా అక్కడికి చేరుకుని దొంగను ఉతికేందుకు సిద్ధమయ్యాయం. చలమేశ్వర్ ఇంట్లో దొంగతనం జరిగింది, పట్టుకున్నది చలమేశ్వరే కాబట్టి మొదటి చాన్స్ అతనికే అని తీర్మానించేశారు. చలమేశ్వర్ దొంగను కొట్టేందుకు చెయ్యి పై కెత్తే లోపే- ‘కబడ్డార్.. చట్టాన్ని చేతుల్లోకి తీసుకుంటే కటకటాల పాలవుతారు’ అంటూ దొంగ వార్నింగ్ ఇచ్చాడు. నేరం చేయడమే కాదు, నేరం చేసే వాడికి సహకరించిన వాళ్లు కూడా నేరస్తులే అవుతారు. నా ఒంటిపై చెయ్యి పడిందా? మీ అందరూ జైలులో ఉంటారు అని దొంగ బెదిరింపులతో ఒక్కసారిగా అంతా ఉలిక్కిపడ్డాం. మేం తేరుకోక ముందే ఆ దొంగోడు- ‘మాష్టారూ కాస్త సెల్‌ఫోన్ ఇస్తారా? పోలీసులను పిలవాలి’ అని అడిగే సరికి మాకు అంత చలిలోనూ మాకు చెమటలు పట్టాయి’’
‘‘నమ్మలేకపోతున్నాను.’’
‘‘అంతేనా.. ఇంకా విను’’


‘‘ఇంతోటి దానికి పోలీసుల దాకా ఎందుకులే .. నిన్ను క్షమించి వదిలేస్తున్నానంటూ చలమేశ్వర్ మర్యాదగానే చెప్పాడు. దానికి దొంగోడు- నా దగ్గరా మీ వెదవ్వేషాలు. నాకు న్యాయ వ్యవస్థపై పూర్తి విశ్వాసం ఉంది. నమ్మకం ఉంది. అంతకన్నా ఎక్కువగా ఈ వ్యవస్థ గురించి అవగాహన ఉంది. దొంగ అని నా మీద ముద్ర వేసిన మీరు కోర్టులో నిరూపించాల్సిందే. పోలీస్ స్టేషన్‌కు రావలసిందే.. అని గద్దించాడు. మగాళ్ల వెనక చేరిన వాళ్ల వాళ్ల భార్యలు- అన్నయ్య గారూ ఈయన పొద్దునే్న ఆఫీసుకు వెళ్లాలి.. మేం ఇక ఇళ్లకు వెళతాం అంటూ ఒకరి తరువాత ఒకరు తమ భర్తలను తీసుకుని వెళ్లడానికి సిద్ధమయ్యారు. నన్నోక్కడిని ఇలా వదిలేసి వెళ్లడం మీకు ధర్మం కాదు అని కాళ్లా వేళ్లా పడి చలమేశ్వర్ వేడుకున్నాడు. కాలనీలో ఎవరికి ఏ కష్టం వచ్చినా అంతా కలిసే ఎదుర్కొన్నాం.. ఇప్పుడు నన్ను ఒంటరిని చేయవద్దని కన్నీళ్లు పెట్టుకునే సరికి అంతా సరే అన్నారు. నాకు న్యాయవ్యవస్థ మీద పూర్తి నమ్మకం ఉంది అని ఆ దొంగోడు మరోసారి అనగానే అంతా వణికిపోతుండగా- ‘చూడు బాబు నువ్వు దొంగతనానికి వస్తే ఏదో తెలియక పట్టుకున్నాం. నీకు కావలసింది తీసుకొని వెళ్లిపో’ అని చలమేశ్వర్ వేడుకున్నాడు. అంతా మద్దతుగా తలలూపారు. అంటే మీకు న్యాయవ్యవస్థపై నమ్మకం లేదా? అని వాడు గద్దించాడు. ఆ మాట పదే పదే అనకు మా అందరికీ న్యాయవ్యవస్థపై నమ్మకం ఉంది, అవగాహన ఉంది అని కోరస్‌గా పలికారు. సరే అని దొంగోడు క్షమిస్తున్నానని ప్రకటించాడు. దొంగతనానికి వచ్చి వట్టి చేతులతో వెళ్లడం మర్యాద కాదని చలమేశ్వర్ తన జేబులో ఉన్న మొత్తాన్ని దొంగోడి చేతిలో బలవంతంగా పెట్టాడు. దొంగోడు చలమేశ్వర్‌కు ఖాళీ పర్స్ ఇచ్చి, రేపు ఉదయం బస్సు చార్జీలకు ఇవి ఉంచుకో అని అందులో నుంచి పది రూపాయలు ఇచ్చి వెళ్లిపోయాడు. కాలనీ వాళ్లంతా బతుకు జీవుడా అనుకుని ఊపిరి పీల్చుకుని వెళ్లిపోయారు. నేను బయటి వాడిని కాబట్టి వాళ్ల అంతర్గత వ్యవహారాల్లో జోక్యం చేసుకోవద్దని వౌనంగా ఉన్నాను. ఎందుకిలా జరిగిందంటావ్?’’
‘‘ దొంగకు న్యాయవ్యవస్థపై నమ్మకమే కాదు, పూర్తి అవగాహన కూడా ఉంది. కాలనీ వాళ్లకు కూడా అవగాహన ఉంది. లేనిదల్లా నీ ఒక్కడికే?’’
‘‘అర్థం కాలేదు’’


‘‘ అర్థమయ్యేట్టు చెబుతా విను. ఆ దొంగ న్యాయవ్యవస్థను, చట్టాలను ఔపోసన పట్టిన వాడు. సల్మాన్‌ఖాన్ లాంటి స్టార్ హీరోల పుణ్యమాని కాలనీ వాసులకూ వ్యవస్థపై అవగాహన ఏర్పడింది. ఇందులో ఎవరి స్వార్థం వారిది. ఒక్క దొంగోడిది మాత్రమే సేఫ్ పొజీషన్ మిగిలిన అందరికీ రిస్క్. నువ్వనుకున్నట్టు మీ చలమేశ్వర్ వెర్రి బాగులోడేం కాదు. పోలీసులు వస్తే చలమేశ్వర్ ఇంట్లో దొంగ ఎత్తుకెళ్లిన విలువైన వస్తువులు వాళ్లు స్వాధీనం చేసుకుంటారు. కొనే్నళ్లపాటు కేసు సాగి పట్టు చీర కాస్తా, పీలికలుగా పది తులాల బంగారు ఆభరణం అర తులం గొలుసుగా తిరిగి వస్తుంది. కాలనీ వాళ్లంతా రోజూ కోర్టు చుట్టూ తిరగాలి. ఎవ్వరూ తనకు వ్యతిరేకంగా సాక్ష్యం చెప్పరని దొంగకు స్పష్టమైన అవగాహన ఉంది. సాక్షిగా ఉంటే ఏమవుతుందో కాలనీ వాళ్లందరికీ వ్యవస్థ గురించి స్పష్టమైన అవగాహన ఉంది. అందుకే దొంగను వేడుకున్నారు తమను వదిలేయమని. సల్మాన్ కారుతో గుద్ది రోడ్డుపక్క నిద్రిస్తున్న వారిని చంపిన కేసులో సాక్షంగా నిలిచిన బాడీగార్డ్ చివరకు ఉద్యోగం ఊడి, రోడ్డుమీద అనాథలా చనిపోయాడు. జింకల కేసూ అంతే. అందుకే అంతా సేఫ్ గేమ్ ఆడారు. దీంట్లో కాలనీ వాళ్లందరి కన్నా దొంగదే సేఫ్ పొజీషన్.’’
‘‘ఇంత కథ ఉందా? ’’


‘‘చూడోయ్.. ఆ చిన్న దోంగే కాదు.. రాజకీయాల్లో పెద్ద పెద్ద దొంగలు కూడా పట్టుపడగానే న్యాయవ్యవస్థపై మాకూ పూర్తి విశ్వాసం ఉందంటూ మీడియాలో వెంటనే ప్రకటిస్తారు. దానర్థం తెలుసా? ఎలా బయటపడాలో మాకు బాగా తెలుసు అని .. అది తెలియంది నీలాంటి అమాయకులకే.
*- - బుద్దా మురళి(జనాంతికం20-1-2017)

నిజం ..అంతా అబద్ధం!..

‘‘యుద్ధం చూస్తాం అని పిల్లలు ఒకటే గోల..’’
‘‘శివ సినిమా చూసి వావ్ తెలివైన దర్శకుడు తెలుగునాట పుట్టాడు అని అనుకుంటే తొండ ముదిరి ఊసరవెల్లి అయినట్టు థర్డ్ క్లాస్ సినిమాలతో పోటీ పడి అవే నయం అనిపించేంతగా వర్మ ఎదిగిపోయాడు. ఆ సినిమాలకు రానంటే రాను.. మీరు వెళ్లండి’’


‘‘పూర్తిగా వినకుండానే వర్మలానే తిక్కగా మాట్లాడకండి. పిల్లలు అడుగుతున్నది యుద్ధం సినిమా గురించి కాదు. రెండునెలల క్రితం మీరు యుద్ధానికి వెళుతున్నాను అని హడావుడిగా కెమెరా భుజాన వేసుకుని దేశ సరిహద్దుల్లోకి వెళ్లారు కదా? ఏ విషయంపైనైనా పిల్లలకు ఆశ కల్పించవద్దు. ఐతే అవుతుందని చెప్పాలి, లేదంటే లేదు. కానీ ఆశ పెట్టి వదిలేస్తే పిల్లలకు మీ మీద గౌరవం పోతుంది. మా డాడీ సినిమాల్లో మెగాస్టార్‌లా యుద్ధ రంగంలో ఎంట్రీ ఇస్తాడని పిల్లలు వాళ్ల ఫ్రెండ్స్‌కు చెప్పుకున్నారు. మీరేమో చిరంజీవి పొలిటికల్ ఎంట్రీలా తుస్సు మనిపించారు.’’
‘‘ఆ యుద్ధం గురించి నాకేం తెలుసు?’’
‘‘ఇదిగో యుద్ధం, ఇదిగో ఆయుధాలు అంటూ బీభత్సమైన సౌండ్‌తో మీరు మిలట్రీ డ్రెస్‌లో దేశ సరిహద్దులో కంచె వద్ద ఉన్నట్టు టీవీలో కనిపించింది’’
‘‘ఏ టీవీ వాళ్లయినా చేసేది ఇదే.. తాము వెళ్లి యుద్ధానికి శ్రీకారం చుట్టినట్టు, యుద్ధ రంగంలో ఉన్నట్టు చెప్పాలి లేకపోతే ఇక్కడి నుంచి అంత దూరం వెళ్లి ఖర్చులు దండగ అని అంటారు కదా?’’


‘‘రెండు నెలల క్రితం యుద్ధ మేఘాలు వచ్చాయన్నారు. అవేమన్నా ఈశాన్య ఋతుపవనానాల దోబూచులాడేందుకు? ఆ మేఘాలు ఏమయ్యాయి? ’’
‘‘మనం వెళ్లినప్పుడే కాదు.. సరిహద్దుల్లో ఎప్పుడూ వాతావరణం అలానే ఉంటుంది. ఏదో డ్రమటైజ్ చేసేందుకు అదిగో యుద్ధ మేఘాలు మా కెమెరాలో పట్టేశాం అని ఏదో చెప్పాల్సి వస్తుంది. అర్థం చేసుకోరు’’
‘‘నిజం చెప్పండి.. మోదీ గారు యుద్ధమేఘాలను అరెస్టు చేశారా..?’’
‘‘ఒక రకంగా అదే అనుకో. కరెన్సీ రద్దుతో టీవీ చానల్స్ అన్నీ సరిహద్దుల నుంచి ఎటిఎంలపై వాలిపోయాయి. మేఘాల నుంచి తమ కెమెరాలను జనం వైపు ఫోకస్ చేశాయ. అణ్వాయుధాలు ఉన్న రెండు దేశాల మధ్య యుద్ధం జరగదు. జరిగినా ఎవరూ గెలవరు. ’’
‘‘అంటే- మరి అదంతా నిజం కాదా..? ’’
‘‘జీవితమే ఒక నాటకం. ఆ దేవదేవుడు ఆడించే నాటకంలో మనమంతా పాత్ర ధారులం అని పెద్దలు కొన్ని వందల సంవత్సరాల క్రితమే చెప్పారు కదా? మన పాత్ర నిడివి ఎంతో మనకే తెలియదు. కానీ- జీవితం శాశ్వతం అనుకుంటాం. ’’
‘‘మెట్ట వేదాంతం వద్దు. నిజం చెప్పండి.. అంతా అబద్ధం కదూ.’’
‘
‘చూడు డియర్.. మధ్య తరగతి కుటుంబరావుల జీవితాల్లోనే క్షణక్షణం నటన ఉంటుంది. ఇంత పెద్ద దేశాలను నడపాలంటే ఎంతేసి నటనలు ఉండాలి. ’’
‘‘అంటే నా మీద మీ ప్రేమ, మీమీద నా ప్రేమ నటనేనా? ఇప్పుడే తేలాలి..’’
‘‘కరెన్సీ రద్దు గురించి ఆర్‌బిఐకి, దేశ ఆర్థిక మంత్రికే తెలియదు. ఇక తెలుగునాట ఉండే మామూలు టీవీ రిపోర్టర్‌ని నేను.. యుద్ధం ఎప్పుడో నాకేం తెలుస్తుంది? మన ప్రేమ గురించి అడిగావ్ బాగుంది. మన పెళ్లి రోజు గుర్తుందా? అదిగో అరుంధతి నక్షత్రం అని నీకు చూపించాను గుర్తుందా? ’’
‘‘అవును ఆ రోజుల్లో స్లిమ్‌గా ఎంత బాగుండేవారో, మా ఆయన టీవీలో కనిపిస్తారు అని బంధువులకు ఎంత మురిపెంగా చెప్పుకునే దాన్ని.. మీరు టీవీలో తప్ప ఇంట్లో కనిపించరని అప్పుడు నాకేం తెలుసు..?’’
‘‘ఆఫీసులో బాస్, ఇంట్లో నువ్వు చాన్స్ దొరికితే చాలు తిట్టేస్తారు. అరుంధతి నక్షత్రం సంగతి మాట్లాడుకుందాం. మా క్లాస్‌మెట్ విశాలాక్షిని చూపించినంత ఈజీగా ఆకాశంలోకి చూస్తూ అదిగో అరుంధతి నక్షత్రం అని నేను చూపించడం, కనిపించినట్టు నువ్వు తలూపడం అంతా నటన కాకుంటే మరేంటి డియర్? ఇంకో విషయం తెలుసా? అరుంధతి నక్షత్రాన్ని చూపించే పంతులుకు కూడా అదెక్కడుందో తెలియదు. ఆ పంతులేమీ ఖగోళ శాస్తవ్రేత్త కాదు. నేనూ కాదు. ఎవరి పాత్రలో వాళ్లు నటిస్తేనే ఆ పెళ్లి తంతు పూర్తవుతుంది. అది నిజం అందామా? అబద్ధం అందామా? అక్కడి నుంచే విజయవంతంగా అబద్ధాలు నేర్చుకుంటేనే మన కాపురం ఇలా కలకాలం ఉటుంది. దీన్ని అబద్ధం అందామా? నిజం అందామా? ’’


‘‘పెళ్లయిన కొత్తలో వడ్డాణం చేయిస్తానని మీరు చెప్పిన మాట ముమ్మాటికీ అబద్ధం. ’’
‘‘చేయిద్దామనే తొలుత ఆ హామీ ఇచ్చాను. ఆ తరువాతే పరిస్థితి మారి అబద్ధాలు చెప్పాను. దీన్ని నువ్వు అబద్ధం అంటావా? నిజం అంటావా? ఇంకో మాట చెప్పాలా? నిజం అబద్ధం విడదీయలేనంతగా కలిసిపోయి ఉంటాయి. ఆకాశం దించాలా? నెలవంకా తుంచాలా? అంటూ ప్రియుడు పాడే పాట అబద్ధం అని తెలిసినా, తెంచమంటే ప్రియుడు బేల చూపులు చూస్తాడని తెలిసినా అది నిజమే అని నమ్మినట్టుగా ప్రేయసి నటిస్తూ ముసిముసి నవ్వులు నవ్వుతుంది. ’’
‘‘సినిమాలను మించిన నటన రాజకీయాల్లో ఉంటుందని అందుకే అంటారేమో?’’
‘‘చక్రి ఎందెందు వెదికినా అందందు ఉంటాడన్నట్టు- నటన లేని రంగం అంటూ ఉండదు. సినిమాల్లో కన్నా బయటే నటుల విశ్వరూప నటన కనిపిస్తుంది. మామను అధికారం నుంచి దించేసింది అబద్ధమా? గోదావరిలో విగ్రహాన్ని ఏర్పాటు చేసి దేవునిగా పూజలు జరిపిస్తున్నది అబద్ధమా? అంటే రెండూ నిజమే, రెండూ అబద్ధమే! పాలలో నీళ్లలా రెండూ కలిసిపోయి ఉంటాయి. అవిభక్త కవలల్లా అబద్ధం, నిజం రెండూ కలిసిపోయాయి. రెండింటిని విడదీసే ప్రయత్నం చేయడం కన్నా- నిజమే అని నమ్మినట్టు నటించి మనమూ ఎంజాయ్ చేస్తే జీవితం హాయిగా గడిచిపోతుంది. ఏమంటావు?’’
‘‘ఆలోచిస్తే భయమేస్తుంది. మీరు చెప్పే ప్రతి మాటా అబద్ధమే అనిపిస్తోంది’’


‘‘అన్నీ నిజమే అని నమ్ము.. జీవితం హాయిగా గడిచిపోతుంది. స్వర్ణాంధ్ర, స్వర్ణ తెలంగాణ, స్వర్ణ భారత్, సింగపూర్‌ను మించిపోతున్నాం, శాశ్వతంగా అధికారం మనదే... అని ఎవరు ఏం చెప్పినా హాయిగా నమ్మేస్తే ఇబ్బందే లేదు.’’
‘‘అదేదో క్రీమ్.. వారం రోజులు వాడితే తెల్లబడతారు.. అని టీవీలో ప్రకటనలు చూసి పనె్నండేళ్ల నుంచి వాడుతున్నా. తెల్లబడలేదు, క్రీమ్ వాడడం మానలేదు. నమ్మకం మాత్రం పోలేదు. ఏమో గుర్రం ఎగరా వచ్చు.. 

అన్నట్టు ఈ నమ్మకమే మనిషిని బతికిస్తుంది. ఇంత కన్నా పోయేదేముంది ఎవరేం చెప్పినా నమ్మేద్దాం ’’
-బుద్ధా మురళి (జనాంతికం 12.1. 2017) 

కవిత్వంతో ఎన్‌కౌంటర్!

‘‘ఏంటీ.. అలా మెలికలు తిరిగిపోతున్నావ్..! ఏదో చెప్పాలనుకుంటున్నట్టున్నావ్! చెప్పు.. ’’
‘‘మబ్బు అడ్డం వస్తే సూర్యుడు కనిపించడు
బస్సు అడ్డం వస్తే స్కూటర్ కనిపించదు
మనం కోరుకున్నప్పుడు బస్సు రాదు
వచ్చిన బస్సు మన ఇంటికి పోదు.. ఇదేరా జీవితం’’


‘‘ఏంటీ.. కవిత్వం మొదలు పెట్టావా? ఇలాంటి విషయాల్లో నేను చాలా నిర్దాక్షిణ్యంగా ఉంటాను. కాలేజీలో నేను విపరీతంగా ప్రేమించిన అనుపమతో రిలేషన్స్ కట్ అయింది ఈ కవిత్వం వల్లే. గిరిజతో కలిసి నక్సలైట్లతో కలిసిపోవడానికైనా సిద్ధమే.. కానీ నీతో కలిసి కవి సమ్మెళనాలకు రానంటే రానన్నాను. గిరిజ ఎన్‌కౌంటర్‌లో చనిపోయింది. అనుపమ మాత్రం ఇంకా కవి సమ్మేళనాల్లో తన కవిత్వంతో అమాయకులను ఎన్‌కౌంటర్ చేస్తూనే ఉంది.’’
‘‘చూడోయ్.. జీవితం అన్నాక కష్టాలు, దీర్ఘ కవిత లు వినాల్సి వస్తుంది.. తప్పుదు.. ‘ఇంటికి ఆలస్యంగా ఎందుకొచ్చావ్..?’- అంటే మనం చెప్పే కథలు భార్యలు వినకపోయినా మనం చెప్పడం మానం కదా? ఇదీ అంతే. పాలలో పెరుగుంటుంది కానీ అది మనకు కనిపించదు. జీవితమూ అంతే..’’
‘‘అలా తిక్కతిక్కగా మాట్లాడకు.. విషయం ఏంటో చెప్పు. పాలలో పెరుగుంటే- ఒక పాల ప్యాకెట్ తీసుకొని పాలకు, అందులో ఉన్న పెరుగుకు విడివిడిగా డబ్బులు ఇవ్వు’’
‘‘కవి హృదయాన్ని అర్థం చేసుకోవు. పాలలో కనిపించని పెరుగుంటుంది అని చెప్పగానే- ఎంతగా ఎదిగి పోయావురా! అని ఆకాశమంత ఎత్తు ఎదిగిన నన్ను చెమ్మగిల్లిన కళ్లతో చూస్తావనుకుంటే అలా మాట్లాడుతున్నావ్’’
‘‘పాలలో కనిపించని పెరుగే కాదు కళ్ల ముందే నీళ్లు కలపడం కూడా చూశాక ఈ ఉపమానాలు నన్ను కదిలించడం మానేశాయి. అప్పుడెప్పుడో నీకు మేధావి జబ్బు చేసిందని తెలుసు కానీ ఇప్పుడు ఇలా’’


‘‘గల్లీగల్లీకి వందమంది మేధావులు కనిపిస్తున్నారు. ఇప్పుడు నేను మేధావి దశ దాటి ఆధ్యాత్మిక జ్ఞాని దశకు చేరుకున్నాను’’
‘‘జరిగితే జ్వరం అంత సుఖం లేదని అంటారు. నీకేంటిరా? నిరుద్యోగ జీవితం, ఉద్యోగం చేసే భార్య, తల్లిదండ్రులు సం పాదించిన సొంతిళ్లు. జ్ఞానికి కావలసిన అర్హతలన్నీ నీలో ఉన్నాయి.’’
‘‘నీకు వంద కోట్లు వస్తే ఏం చేస్తావురా..?’’
‘‘రోజంతా ఎటిఎంల ముందు నిలబడితే, రెండువేలు వస్తే సంబరపడ్డవాడ్ని , ఈరోజు ఎటిఎంల వద్ద జనం లేరు, పైగా రోజుకు నాలుగున్నర వేలు వస్తేనే ఏం చేసుకోవాలో తెలియడం లేదు. ఇక వంద కోట్లు అంటే గుండె ఆగిపోతుంది’’
‘‘దేనికైనా గుండె ధైర్యం ఉండాలి. నాకైతే వంద కోట్లకు మంచి ప్లాన్ ఉంది’’
‘‘క్యాష్‌లెస్ అని మోదీ, క్యాష్ ఇస్తేనే ఇంట్లో ఉండాలని ఇంటి ఓనర్ ఇద్దరి మధ్య నలిగిపోతూ ఈనెల కిరాయి ఎలారా భగవంతుడా? అని ఆలోచిస్తే, నువ్వోచ్చి వంద కోట్లు అంటే తల తిరుగుతోంది..’’
‘‘నేను వంద కోట్ల గురించి మాట్లాడుతుంటే నువ్వు ఇంటి అద్దె, కందిపప్పు ధర, కూరగాయల గురించి మాట్లాడతావ్! కాస్త ఎదుగు.. విశాలంగా ఆలోచించడం నేర్చుకో! దంగల్ సినిమా చూశావా? ’’
‘‘నాకు హిందీ రాదు’’
‘‘మా అబ్బాయిని ఎప్పుడైనా గమనించావా? తెలివి తేటల్లో వాడు నన్ను మించిపోతున్నాడు?’’
‘‘పువ్వు పుట్టగానే పరమళించినట్టు నీలానే వాడు కూడా నాలుగో తరగతి నుంచే అమ్మాయిలను ప్రేమించడం మొదలు పెట్టాడా? ఏంటి? ’’
‘‘నాది చిన్నప్పటి నుంచే కళాత్మక హృదయం.. నీలాంటి వాడికి అది అర్థం కాదు కానీ. మా ఆవిడ నాకు కనిపించకుండా పరుపుకింద, కారం పొడి డబ్బాలో డబ్బు దాచిపెడితే, మా వాడు ఎలా కనిపెడతాడో కానీ క్షణంలో మాయం చేస్తాడు. చేతికి కారం అంట కుండా ఆ డబ్బాలోని వంద నోటు లాగించేయడం అంటే మాటలా? వాడు ఎప్పటికైనా గొప్ప శాస్తవ్రేత్త అవుతాడని నాకు గట్టి నమ్మకం.’’
‘‘అలా డబ్బులు ఎత్తుకెళ్లేవాడు ఐతే దొంగోడు అవుతాడు. చదువుకుంటే ఆదాయం పన్ను శాఖలో  రాణిస్తాడు. కానీ- శాస్తవ్రేత్త ఎందుకవుతాడు?’’


‘‘అందుకే చెప్పాను కాస్త ఎదగమని. ఆపిల్ చెట్టు నుంచి పండు పడడం ఎందరో చూశారు. న్యూటన్  మాత్రమే అది చూసి భూమికి ఆకర్షణ శక్తి ఉందని కనిపెట్టాడు. నీలా సాధారణంగా ఆలోచిస్తే అలానే అనిపిస్తుంది. కానీ ఓ జ్ఞానిలా ఆలోచిస్తే.. ఎవరికీ కనిపించని వంద నోటు మా వాడికి కనిపించింది అంటే వాడు కచ్చితంగా సైంటిస్ట్ అవుతాడు. నీకు గుర్తుందా? మనం పరీక్షల్లో ఎన్ని చిట్టీలు పట్టుకుపోయినా ప్రశ్నాపత్రం చేతికి ఇవ్వగానే ఏ ప్రశ్నకు సమాధానం ఏ జెబులోని చిట్టీలో ఉందో క్షణంలో కనిపెట్టేవాడ్ని. ఈ తెలివి తేటలు మా వాడికి జీన్స్ ద్వారా అబ్బి ఉంటాయి. నేనో గొప్ప సైంటిస్ట్‌ను అవుతానని అప్పుడే అనిపించింది.. పరిస్థితుల వల్ల కాలేక పోయాను. నేను చేయలేకపోయిన దాన్ని మా అబ్బాయి చేస్తాడు.’’
‘‘ఏ ఒక్కదానికీ సంబంధం లేకుండా మాట్లాడుతున్నావ్! వంద కోట్లు అంటావ్, దంగల్ అంటావ్, అప్పుడే సైంటిస్ట్ అంటావు? ’’
‘‘అన్నింటికీ సంబంధం ఉంది. అందుకే దంగల్ గురించి అడిగా. బంగారు పతకం సాధించాలని కలలు కన్న హీరో అమీర్ ఖాన్ తాను చేయలేని పని తన కూతురు చేస్తుందని మల్లయోధురాలిగా తీర్చి దిద్దాడు. ఇదే స్ఫూర్తితో మా అబ్బాయిని సైంటిస్ట్‌ను చేస్తాను. వంద కోట్లు కొట్టేస్తాను’’
‘‘ఇప్పుడు అర్థమైంది.. నోబెల్ బహుమతి వస్తే వంద కోట్లు ఇస్తానని ఆ ముఖ్యమంత్రి చేసిన ప్రకటనపై బాగానే ఆశలు పెట్టుకున్నావ్. అది సరే నిరుద్యోగ భృతి రెండువేలు వస్తుందన్నావు నీకు వచ్చిందా? ’’
‘‘నా టార్గెట్ వంద కోట్లు.. 2 వేల గురించి ఆలోచించను’’
‘‘బడుల్లో టీచర్లు లేరు. పిల్లలకు కనీసం టాయిలెట్స్, తాగడానికి మంచినీళ్లు ఏర్పాటు చేయాలని సుప్రీం కోర్టు ఇప్పటికే దేశంలోని అన్ని రాష్ట్రాలకు చాలా సార్లు మొట్టికాయలు వేసింది. గడవు విధించింది. మన రెండు తెలుగు రాష్ట్రాల్లో ఆ సమస్య అలానే ఉంది. ఆ వంద కోట్లతో టాయ్‌లెట్స్, మంచినీళ్లు ఇవ్వవచ్చు కదా? ’’


‘‘మరదే.. గొప్ప వాళ్లకు గొప్ప ఆలోచనలు వస్తాయి, నీలాంటి వాడికి మంచినీళ్లు, స్కూల్‌లో సైన్స్ ల్యాబ్ అని చిన్నచిన్న ఆలోచనలు వస్తాయి.’’
‘‘అంతకుముందు ఉన్న దానినే  సైటింస్ట్‌లు కనిపెడతారు. ఏమీ లేకపోయినా ఏదో చేశామని కోట్లాది మందిని నమ్మించే పాలకులను మించిన సైంటిస్ట్‌లు ఎవరుంటారు? ఆ వంద కోట్లు అవార్డు పొందే అర్హత దేశంలోని పాలకులందరికీ ఉంది.’’
బుద్ధా మురళి ( జనాంతికం 6-1-2016)
*

మరో యాభై.. ఇంకో యాభై..!

‘‘రావోయ్ రా..! సమయానికి వచ్చావు.. టీవీలో చాలా ఇంట్రస్టింగ్ న్యూస్ వస్తోంది. ప్రముఖ వ్యాపారి గన్నయ్య ఇంటిని పోలీసులు చుట్టు ముట్టారు. వందల కోట్ల రూపాయల కరెన్సీ ఉందని సమాచారం అందడంతో ఐటి శాఖ అధికారులు దాడి జరిపారు. నోట్ల కట్టలను టీవీలో జూమ్ చేసి మరీ చూపిస్తున్నారు. ‘మన్నుతిన్నావా?’ అని తల్లి అడిగితే తన నోటిలో విశ్వానంతటినీ చూపించిన ద్వాపర యుగం కన్నయ్యలా నింపాదిగా గన్నయ్య నవ్వుతూ మీడియాతో మాట్లాడుతున్నాడు. ఇదంతా నా ఎదుగుదలను చూసి ఓర్వలేని వారు చేసిన కుట్ర. చట్టానికి వ్యతిరేకంగా నా వద్ద ఎలాంటి కరెన్సీ లేదు అని ధీమాగా చెబుతున్నాడు’’
‘‘అన్నయ్య గారూ ఆయన టీవీ వార్తల్తో నిండా మునిగిపోయారు. ఇప్పట్లో మన లోకంలోకి రారు. ఆయన్ని చూస్తే భయంగా ఉంది. పిచ్చిపిచ్చిగా మాట్లాడుతున్నాడో ఏమైందో మీరే చూడండి అన్నయ్య గారూ’’
‘‘నువ్వు చాలా గ్రేట్! నీలో ఏ మార్పూ లేదు. అదే పాత చేతక్ బండిమీద వచ్చావు, అదే టీ తాగుతున్నావ్.. యూ ఆర్ గ్రేట్..’’


‘‘ఆపరా బాబూ నీ సోది... ఏదో పాతికేళ్ల తరువాత చూసినట్టు ఆ పిచ్చి చూపులేంది.?’’
‘‘ఇంకా మీరు నయమండి అన్నయ్య గారు! రాత్రి అంతా ఒకేసారి పడుకున్నాం. ఉదయం లేవగానే పిల్లలను చూస్తూ- అరే మీరు అచ్చం అలానే ఉన్నారు ఏమీ మారలేదు అని పలకరించే సరికి పాపం.. వాళ్లు బిత్తర పోయారు. ఇంటిని వింతగా చూస్తూ మార్పేమీ లేదు అంటున్నాడు. కడుపు చించుకుంటే కాళ్ల మీద పడుతుంది అన్నయ్య గారూ! చివరకు నన్ను కూడా ఏదో ఆర్ట్ సినిమాలో ఐశ్వర్యారాయ్‌లా మార్పేమీ లేకుండా అలానే ఉన్నావు అంటూ వింతగా చూస్తున్నాడు. ఒకే గదిలో పడుకున్నామా! ఉదయం లేవగానే నువ్వు నువ్వేనా? అని వింతగా మాట్లాడితే ఏమనుకోవాలి?’’


‘‘ఆపండి మీ గోల.. టీవీలో ఆ నోట్ల కట్టలు చూడు నల్లధనం బయటకి వస్తుంది? అంటే మీరు నమ్మలేదు కదా? ఇప్పుడు చూడండి. నిన్నటి వరకు ఆ గన్నయ్య ఏదో బుద్ధిమంతుడని అనుకున్నాం కదా? చూడు వాడింట్లో నోట్ల కట్టలు గుట్టలు గుట్టలుగా ఉన్నాయి. అయినా సిగ్గులేకుండా ఆ మనిషి ఎలా నవ్వుతూ ధైర్యంగా ఉన్నాడో. ముందు ఆ వార్తలు చూడండి మనం మళ్లీ మాట్లాడుకుందాం’’
***
‘‘సారీ గన్నయ్య గారూ.. మిమ్మల్ని ఇబ్బంది పెట్టినందుకు క్షమించాలి. మీ వద్ద నోట్ల కట్టలు ఉన్నాయని పక్కా సమాచారం రావడంతో దాడి చేయాల్సి వచ్చింది. మీలాంటి వ్యాపారుల ఇంటిపై దాడి చేసినందుకు సిగ్గుపడుతున్నాం.’’
‘‘వ్యాపారం అన్నాక ఇలాంటి దాడులు సాధారణమే. సరే మీ పోలీసులకు చెప్పి ఆ నోట్ల కట్టలు బస్తాలన్నీ ఎప్పటి మాదిరిగానే ఇంట్లో పెట్టి వెళ్లమనండి’’
***
‘‘అదేంటి? అన్ని బస్తాల నోట్ల కట్టలు కనిపిస్తుంటే ఐటి అధికారులు క్షమాపణ చెప్పడం ఏమిటి? పోలీసులు నోట్ల కట్టల బస్తాలను ఇంట్లో పేర్చడం, అదీ టివీలో చూపించడం వింతగా ఉందండి’’
‘‘పిచ్చి డియర్.. అవి నోట్ల కట్టలు నిజమే. అవి ఒరిజినల్ నోట్ల కట్టలు కావు నకిలీ నోట్ల కట్టల బస్తాలు. గన్నయ్య వ్యాపారంలో ఒకేసారి పైకి ఎలా వచ్చాడా? అని అనుకున్నా.. ఈ నకిలీ నోట్ల వ్యాపారం పుణ్యమాని ఇంతలా ఎదిగాడన్నమాట!’’


‘‘మరి పోలీసులు అలా వదిలేయడమేమిటి?’’
‘‘చట్టాన్ని ఎవరూ చేతుల్లోకి తీసుకోవద్దు. చట్టం ఏం చెబితే అదే చేయాలి. ఐదు వందలు, వెయ్యి రూపాయల నోట్లను రద్దు చేస్తున్నట్టు ప్రధానమంత్రి ప్రకటించారు. ఇప్పుడు రద్దయిన ఆ నోట్లు ఎవరి వద్దనైనా ఉంటే కఠినంగా శిక్షించేలా ఆర్డినెన్స్ తెచ్చారు. గన్నయ్య ఇంట్లో దొరికినవి రద్దయిన నోట్లు కాదు నకిలీ కరెన్సీ. దాంతో ఐటి అధికారులు, పోలీసులు బిక్కమొఖం వేశారు. నకిలీ కరెన్సీ కాబట్టి బతికి పోయాడు. ఒకవేళ ఒరిజినల్ నోట్లు ఉంటే.. అమ్మో తలుచుకుంటేనే ఒళ్లు జలదరిస్తోంది.. చట్టమే గన్నయ్యను రక్షించింది’’


‘‘ఏంటోరా! లోకం తలకిందులుగా ఉన్నట్టు అనిపిస్తోంది. ఓ ఎమ్మెల్యే ‘ఫిజిక్స్ ’పై ఆసక్తితో బికాం చేశానని చెప్పాడు. ఏ డిగ్రీలో ఏ సబ్జెక్ట్ కూడా ఉంటుందో తెలియని వాళ్లు ఎమ్మెల్యేలైపోయారని మా అబ్బాయితో చెబితే- వాడెమన్నడో తెలుసా? కామర్స్‌పై ఇష్టంతో బికాం చదివిన నీకు ఏ సబ్జెక్ట్స్ ఉంటాయో తెలవడం వల్ల ఫస్ట్ క్లాస్‌లో పాసై, క్లర్క్ అయ్యావు. కొడుక్కు బైక్ ఇప్పించలేవు. బికామ్‌లో ఫిజిక్స్ ఉంటుందని చెప్పిన ఆ నేత ఎమ్మెల్యే అయి తరతరాలకూ సరిపోయే సంపద కూడ గట్టాడు. ఇప్పుడు చెప్పు.. బికామ్ లో కామర్స్ తెలిసిన వాడు తెలివైన వాడా? జీవితంలో ఆదాయం లెక్కలు తెలిసిన వాడు తెలివైన వాడా? అని అబ్బాయి అడిగితే- తల కొట్టేసినట్టు అనిపించింది అనుకో? నా సంగతి సరేరా! అదేంటి తిక్కతిక్కగా మాట్లాడుతున్నావట! చెల్లెమ్మ చెప్పింది. నన్ను కూడా వింతగా చూస్తూ పిచ్చిపిచ్చి ప్రశ్నలు అడుగుతున్నావ్! ’’
‘‘ మన ముచ్చట్లకేముంది కానీ పద.. ఆ శ్మశాన వాటికకు వెళ్లి వద్దాం! శవాలు పైకి లేస్తాయి. చూసొద్దాం’’
‘‘నిజమేనమ్మా నువ్వు చెబితే ఏదో అనుకున్నా.. వీడికి నిజంగానే ఏదో గాలి సోకినట్టుగా ఉంది.’’


‘‘నాకేమీ కాలేదు. మీకే ఏదో అయినట్టుగా ఉంది. నేను స్పృహలోనే ఉన్నా. గాలి సోకింది మీకే.. మీరంతా దేశద్రోహులు ’’
‘‘డాక్టర్ గారూ.. వీడికి ఏమైంది? ఏదేదో మాట్లాడుతున్నాడు’’
‘‘ కంగారు పడకండి 50 రోజుల పాటు మందులు వాడాల్సి ఉంటుంది. తగ్గిపోతుంది’’
‘‘ ఇంతకూ ఏమైంది డాక్టర్?’’
‘‘ పెద్దనోట్ల రద్దు తర్వాత 50 రోజులకు ఏవో అద్భుతాలు జరుగుతాయని గట్టిగా ఫిక్స్ అయ్యాడు. పేదలు సంపన్నులతో సమానం అవుతారని, అవినీతి నిర్మూలన అవుతుందని, ఎటిఎం క్యూలో ప్రాణాలు పోయిన వారు తిరిగి బతుకతారని ఏదో ఊహా ప్రపంచంలో ఉండిపోయాడు. ఇదే సమయంలో టీవీలో ఆ ఎమ్మెల్యే ఎవరో బికామ్‌లో ఫిజిక్స్ చదివి జీవితంలో ఎంతో ఎత్తుకు ఎదిగినట్టు వార్త వినడంతో చిన్నమెదడుపై తీవ్ర ప్రభావం చూపించి ఏదేదో మాట్లాడుతున్నాడు! ఓ 50 రోజులు అయితే మామూలు మనిషి అవుతాడు’’


‘‘50 రోజుల్లో మామూలు మనిషి కాకపోతే ఎలా డాక్టర్..?’’
‘‘ఇంకో 50 రోజులు ఎదురు చూడాలి. ఇలా యాభైయేసి రోజుల చొప్పున చికిత్స పెంచుకుంటూ పోవాలి. అంతకు మించి చేయగలిగిందేమీ లేదు ’’
-బుద్ధా మురళి (జనాంతికం 30. 12. 2016)