మీ రిటైర్‌మెంట్ వయసెంత?

ప్రశ్న తప్పుగా అనిపిస్తుంది కదూ? నిజమే రిటైర్‌మెంట్ వయసును మనకు మనం నిర్ణయించుకోలేం. ప్రభుత్వం నిర్ణయిస్తుంది ఆయా సంస్థలు నిర్ణయిస్తాయి. ప్రభుత్వ ఉద్యోగం అయితే ప్రభుత్వం నిర్ణయిస్తుంది. ప్రైవేటు ఉద్యోగం ఐతే ఆ కంపెనీ నిర్ణయిస్తుంది. ఇంతకు ముందు 58 ఏళ్లు రిటైర్‌మెంట్ వయసు ఐతే ఆంధ్రలో 60కి పెంచారు. 61కి పెంచనున్నట్టు తెలంగాణలో హామీ ఇచ్చారు. సగటు ఉద్యోగి అంచనాలు అన్నీ తన రిటైర్‌మెంట్ వయసుతో ముడిపడి ఉంటాయి. రిటైర్ అయ్యే లోగానే సొంతిళ్లు, పిల్లలు జీవితంలో స్థిరపడేట్టు చేయాలని సగటు వ్యక్తి కోరుకుంటాడు. సాధారణంగా రిటైర్‌మెంట్‌కు ఇంకో ఐదేళ్ల గడువు ఉంది అనగా ఈ ఆలోచనల్లో వేగం పెరుగుతుంది. ఉద్యోగంలో చేరినప్పటి నుంచే రిటైర్‌మెంట్ కోసం తగిన ప్రణాళిక రూపొందించుకునే వారు టెన్షన్ లేకుండా గడిపేస్తుంటే, ఐదేళ్లు అంత కన్నా తక్కువ సమయం ఉన్నవారిలో టెన్షన్ పెరుగుతుంటుంది. ఒక వైపు వయసు పెరుగుతుంటుంది. మరోవైపు పూర్తి కాని బాధ్యతలు, రిటైర్‌మెంట్ వయసు దగ్గర పడుతుండడం వీటన్నిటితో తీవ్రంగా ఆలోచించడంతో ఆరోగ్యంపై ప్రభావం పడుతుంది.
మన ఆరోగ్యానికి రిటైర్‌మెంట్ వయసుకు దగ్గరి సంబంధం ఉంది. కొంత ఆశ్చర్యం అనిపించినా అమెరికాలోని ఒక యూనివర్సిటీవారు 2002లో జరిపిన ఒక ఆధ్యయనంలో దీనికి సంబంధించి ఆసక్తికరమైన అంశాలను వెల్లడించారు.
ఈ అధ్యయనం గురించి చెప్పుకునే ముందు రిటైర్‌మెంట్ వయసు మన చేతిలోనే ఉంటుందని గ్రహించాలి. ప్రభుత్వం కావచ్చు, ప్రైవేటు సంస్థలు కావచ్చు రిటైర్‌మెంట్ వయసు 60 అని నిర్ణయించవచ్చు. మీరు దానికి కట్టుబడి 60 ఏళ్ల వరకు పని చేయాల్సిన అవసరం లేదు. మీ ప్రణాళిక, మీ ముందు చూపు బాగుంటే 50 ఏళ్ల లోపే రిటైర్ కావచ్చు. మిగిలిన కాలాన్ని మీకిష్టమైన విధంగా గడపవచ్చు. ఆయా వ్యక్తులకు ఉండే ఆసక్తి, అభిరుచి మేరకు వ్యాపారంలో, మరో వృత్తిలో, లేదా తమకు ఇష్టమైన వ్యాపకంతో గడపవచ్చు.
ఐతే దానికి ముందు నుంచే సరైన ప్రణాళిక అవసరం. తన ఉద్యోగం ద్వారా వస్తున్న జీతం ఎంతో, తాను ఉద్యోగం చేయకపోయినా ఆ మెరకు నెల నెలా వచ్చే విధంగా ఏర్పాటు చేసుకున్న వారు తక్కువ వయసులోనే రిటైర్ కావచ్చు. ఉదాహరణకు నెలకు లక్ష రూపాయ జీతం ఐతే ప్రారంభంలోనే పొదుపు మొత్తాన్ని సరైన రీతిలో ఇనె్వస్ట్ చేస్తే పదేళ్లలో తన జీతానికి సమానమైన ఆదాయం ఇనె్వస్ట్‌మెంట్ ద్వారా పొందవచ్చు. అలాంటి వారు ఫైనాన్షియల్ ఫ్రీడంతో తమకిష్టమైన పనిలో గడపడం ద్వారా ఒత్తిడి లేకుండా ఎక్కువ కాలం జీవిస్తారు.
ఇక రిటైర్‌మెంట్ వయసుకు ఆయుఃప్రమాణానికి సంబంధించిన అధ్యయనం విషయానికి వస్తే....
చైనీస్ ఇన్‌స్టిట్యూట్ ఆఫ్ ఇంజనీర్స్ అమెరికా న్యూ యార్క్ చాప్టర్ వాళ్లు ఈ అంశంపై 2002లో ఒక అధ్యయనం చేశారు. ఎక్కువ కాలం ఉద్యోగంలో ఒత్తిడితో పని చేసే వారి ఆరోగ్యంపై తీవ్ర ప్రభావం పడుతుందట! ఆ సమయంలో ఎక్కువ మంది అమెరికాలో 65ఏళ్ల వయసులో రిటైర్ అయ్యేవాళ్లు. పెద్ద ఎత్తున పెన్షన్ ఫండ్స్ మిగిలిపోతున్నట్టు గమనించారు. 65ఏళ్ల వయసులో రిటైర్ అయ్యాక ఓ రెండేళ్లు మాత్రమే బతుకుతున్నారు. సగటున 66.8ఏళ్లకు మరణిస్తున్నట్టు తేలింది. అదే సమయంలో 55ఏళ్ల వయసులోనై రిటైర్ అయిన వారు సగటును 86ఏళ్ల వరకు జీవిస్తున్నారని తేలింది. 55ఏళ్లు దాటిని తరువాత బాగా ఒత్తిడిగా ఉండే ఉద్యోగాల వల్ల ఒక ఏడాది రెండేళ్ల ఆయుఃస్సు ప్రమాణం తగ్గుతున్నట్టు తేలింది. మరి 55ఏళ్ల వయసులో రిటైర్ అయిన వారు ఏ పనీ చేయకుండా కాలక్షేపం చేయడం వల్ల ఎక్కువ కాలం జీవించారా అంటే అది కాదట! ఉద్యోగంలో ఉన్న వారి మాదిరిగానే వీళ్లు కూడా పని చేస్తూనే ఉన్నారు. ఐతే ఉద్యోగంలో ఉన్న వాళ్లు ఆ నెల జీతం రాకపోతే సమస్యలు ఎదుర్కొనే వాళ్లు. పైగా వారి ఉద్యోగంలో టెన్షన్ ఎక్కువ. 55 ఏళ్లు దాటిన వారు తమ మెదడుకు, శరీరానికి ఎక్కువ శ్రమ కల్పించడం, టెన్షన్ వల్ల అనారోగ్యం పాలవుతున్నారని తేలింది. అదే 55 ఏళ్లకు రిటైర్ అయిన వారు మాత్రం దానికి ఎప్పటి నుంచో ఒక ప్రణాళిక రూపొందించుకుని, ఉద్యోగం లేకపోయినా ఆదాయం వచ్చే ఏర్పాటు చేసుకుని మానసికంగా ఎలాంటి ఒత్తిడికి గురి కాకుండా ప్రశాంతంగా తమకు నచ్చిన పని చేసుకుంటున్నారట! దాని వల్ల వారి ఆరోగ్యం కూడా మెరుగ్గా ఉండి ఎక్కువ కాలం బతికినట్టు తేలింది. అదే సమయంలో మరి జపాన్ ప్రజలు ఎక్కువ కాలం బతకడానికి కారణం ఏమిటా? అని కూడా పరిశీలించారు. వారిలో ఎక్కువ మంది 60 ఏళ్ల లోపే రిటైర్ అయి తమకు నచ్చిన పని చేసుకుంటారు.

మన రిటైర్‌మెంట్ వయసు ఎంత ఉండాలి అని మనకు మనమే నిర్ణయించుకోవాలి. ఆ వయసు తరువాత పని చేయవద్దు అని కాదు. పని చేయకపోయినా గడుస్తుంది అని ఆర్థిక భరోసా ఉండాలి అని చెప్పడమే ఉద్దేశం.

-బి. మురళి(7-4-2019