17, నవంబర్ 2011, గురువారం

అవినీతికి పెద్ద దిక్కు .... రాజకీయ వ్యంగ్యం



***
ఎవడో సామాన్యుడు సీతను అనుమానిస్తే శ్రీరాముడు సీతమ్మను అడవుల్లో వదిలి రమ్మని లక్ష్మణుడిని ఆదేశించాడు. సినిమా లక్ష్మణుడు కాంతారావు మాత్రం ఏ నిమిషానికి ఏమిజరుగునో అని ఏడుస్తూ అడవి బాట పట్టాడు. తనను రాముడు అడవుల్లో వదలిరమ్మన్నాడనే మాట విన్నప్పుడు ఆ సీతమ్మ ఎలా రియాక్ట్ అయి ఉంటారు. భూమి బద్ధలు అయ్యే ఉంటుందా? వద్దంటే వనవాసానికి శ్రీరాముడితో పాటు వచ్చి అడవుల పాలై, తరువాత రావణుడి పుణ్యమా అని లంకలో అశోకవనంలో గడిపి నానా కష్టాలు పడి వస్తే చివరకు రాముడు చేసిన సత్కారం ఇదా? ఆ మాట విన్నాక భూమి బద్దలైందో లేదో కానీ లవకుశులు శ్రీరాముడి చెంత చేరిన తరువాత నిజంగానే భూమి బద్దలై సీతమ్మ తల్లి ఒడిలోకి చేరుతుంది. అప్పుడు శ్రీరాముడి గుండె బద్దలై ఉంటుంది. నిజమే మరి వినకూడని మాట విన్నప్పుడు, ఊహించనివి జరిగినప్పుడు భూమి బద్దలు కావడం, సముద్రం ఉప్పొంగడం జరిగి తీరాల్సిందే.
***
అలానే ఈరోజు భూమి బద్దలవుతుందనుకుంటే కాలేదు. స్కైలాబ్ భూమిపై పడి సర్వ నాశనం అవుతుందని ప్రపంచం అంతా భయంతో గజగజవణికినప్పుడు అర్ధరాత్రి గుట్టుచప్పుడు కాకుండా సముద్రంలో పడి తుస్సుమంది. సినిమాల విషయంలోనూ ఇలానే జరుగుతుంది. షూటింగ్‌లో ఉన్న ప్రతి సినిమా విడుదల కాగానే భూమి బద్దలవుతుంది అన్నట్టుగా ప్రచారం సాగుతుంది. కానీ ఆ సినిమా ఎప్పుడొచ్చిందో, ఎప్పుడు పోయిందో తెలియకుండా ఉంటుంది. ఎన్టీఆర్ ముఖ్యమంత్రిగా ఉన్నప్పుడు ఇలానే బ్రహ్మర్షి విశ్వామిత్ర అనే సినిమా తీశారు. ఈ సినిమా దెబ్బతో ఓటు బాక్సులు బద్ధలవుతాయని అన్న నమ్మారు, కాంగ్రెస్ వాళ్లకు కూడా అదే భయం పట్టుకుంది. తీరా ఎన్నికల్లో అన్నగారు స్వయంగా ఓడిపోయారు, సినిమా విడుదలైంది బాక్స్ బద్దలు కాలేదు కానీ నిర్మాత నెత్తిన గుడ్డపడింది.
***
ఆ మాట వినగానే భూమి బద్ధలవుతుందేమో అనుకున్నా... బద్దలైన భూమిని చూద్దామని పరుగులు తీశా... కానీ అలా ఏమీ జరగలేదు. ఎక్కడ? ఏమిటి? అంటే?
***
బంజారాహిల్స్ పవిత్ర భూమి. దిగిపోయన ముఖ్యమంత్రులు, కాబోయే ముఖ్యమంత్రులు, సిఎంలం అయి తీరుతామని కలలు కనేవారు కొలువైన పుణ్యభూమి అది. ఎత్తయన భవనం. ఇక్కడ అన్నీ ఎత్తయిన భవనాలే. వాటన్నింటిలోకి ఎత్తయిన భవనం అది. ఆ భవనానికి ముందు భారీ హోర్డింగ్‌లు. ఆ హోర్డింగ్‌లకు ఎంత ఖర్చయింది? ఎవరు ఏర్పాటు చేశారు? ఎందుకు ఏర్పాటు చేశారు అనే రంధ్రానే్వషణ తగదు. హోర్డింగ్‌లోని నినాదాలకే మనం పరిమితం కావాలి. కళ్లముందున్న హోర్డింగ్ అందాన్ని చూడాలి కానీ ఖర్చు గురించి ఆలోచించవద్దు. ఎలాంటి వారైనా ఆ హోర్డింగ్ ముందు ఒకసారి నిలిచి తనివి తీరా చూసి ముచ్చట పడాల్సిందే. ఎడమ వైపు మహాత్మాగాంధీ. బానిస బ్రతుకు బతుకుతున్న భారతీయులను స్వాతంత్య్ర పోరాటం కోసం చైతన్య పరిచిన మహాత్ముడు. కుడివైపు అన్నా హజారే దేశానికి స్వాతంత్య్రం వచ్చిన ఆరు దశాబ్దాల తరువాత కూడా అవినీతి విచ్చలవిడిగా పెరిగిపోయిందని ఆవేదనతో అవినీతి వ్యతిరేక ఉద్యమాన్ని నడుపుతున్న మహనీయుడు. వారిద్దరి బుల్లి ఫోటోల మధ్య వెలిగిపోతున్న నిలువెత్తు బాబు. భుజంపై జాతీయ పతాకం, అవినీతికి వ్యతిరేకంగా నిప్పులు కురిపిస్తున్న కళ్లు. భారత మాత చేతిలో జాతీయ పతాకాన్ని పట్టుకుంటే బాబు గారు ఈ దేశంలోని నీతి భారం మొత్తం తన భుజాలపై మోస్తున్నట్టుగా సింబాలిక్‌గా భుజంపై జెండాతో చూపరులను ఆకట్టుకుంటున్నారు. ఆ భవన దర్శకులు ఏనాటికైనా ఈ దేశానికి బాబుగారే శరణ్యం అనుకుంటారు. అక్కడి నుండే మంగళహారతులతో బాబుగారిని అవినీతి వ్యతిరేక ఉద్యమ యాత్రకు పంపిస్తారు.
అన్నా హజారే దీక్ష పేరుతో పరుపుపై కూర్చున్న సమయంలోనే ఇక్కడ 60ఏళ్ల వయసులో సైతం అలసిపోకుండా భుజంపై బరువైన జాతీయ పతాకాన్ని మోస్తూ ఆరుకిలోమీటర్లు నడిచి అవినీతి వ్యతిరేక మహోద్యమాన్ని నడిపిన నవ మహాత్ముడు. రాష్ట్రంలో అవినీతి వ్యతిరేక ఉద్యమానికి పెద్ద దిక్కు. మిత్రునితో కలిసి కాలేజీల చుట్టూ తిరుగుతూ విద్యార్థులకు అవినీతి వ్యతిరేక పాఠాలు చెబుతున్నారు. ఒకవైపు రాందేవ్ బాబాతో అవినీతి వ్యతిరేక ఉద్యమానికి ఎంఓయు కుదుర్చుకుని రంగ ప్రవేశం చేయడానికి సన్నాహాలు చేసుకుంటున్నారు. ఇంతటి మహనీయుడిపై అవినీతి పిడుగు పడింది. మీ అబ్బాయి మా అబ్బాయిని కొట్టాడు అంటే మీ వాడేమన్నా తక్కువనా? అని ఇరుగుపొరుగు అమ్మలక్కలు తిట్టుకున్నట్టుగానే చినబాబు అవినీతి పరుడు అంటూ ఒకరు కోర్టుకు వెళితే, మా చినబాబు అవినీతిపరుడైతే, మీ పెదబాబు తక్కువ తిన్నాడా? రాజకీయాల్లోకి వచ్చాకే కదా పేదబాబుకాస్తా పెద్దబాబు అయింది, అధికారంలో ఉన్న తొమ్మిదేళ్లు రాష్ట్రాన్ని దోచుకున్నాడు, తమ వర్గం వారికి దోచిపెట్టాడు అంటూ తల్లి విజయమ్మ కోర్టుకెళ్లారు. కోర్టేమో బాబుగారి వ్వహారాలపై విచారణ జరపమని సిబిఐని ఆదేశించింది. హజారే దీక్ష ప్రారంభించగానే తొలుత బాబు ఆ వెంటనే జగన్, తరువాత గాలి జనార్దన్‌రెడ్డి మద్దతు ప్రకటించారు. ఈ ముగ్గురిపై సిబిఐ విచారణ జరగడం అంతర్జాతీయ కుట్ర కాకుంటే మరేమిటి?
***
కోర్టు ఆ మాట చెప్పగానే భూమి ఎందుకు బద్ధలు కాలేదు? ప్రకృతి ఎందుకు స్పందించలేదు? లావా ఉప్పొంగలేదేమీ... 2012లో యుగాంతం అన్నారు కదా? యుగాంతం సమీపిస్తున్నదా? మరిప్పుడు 

1 కామెంట్‌:

మీ అభిప్రాయానికి స్వాగతం